ای يكّه تاز عرصۀ ميدان هايانداسان
امّ البنينی دردی قوجالدان هايانداسان
گل قويما آغليان گوزومی انتظاريده
بيكس ننون ملالووه قربان هايانداسان
قلبيم سينيقدی آغ ساچيمون ساخلا حرمتين
روياده گل گوروم سنی بير آن هايانداسان
گل گور قالوب نه حاله اوغولسوز قالان ننون
سال ياده قويما بی سر و سامان هايانداسان
من هر گئجه قرانلوق ائويمده عزاليام
برپادی بزم شام غريبان هايانداسان
باب الحوائجيم بالا گل چوخدی دردمند
ئوز دردينه گزور هامی درمان هايانداسان
چوخدی سكينه تك يولووی گوزلين سنون
گلسون اولارلا دست بدامان هايانداسان
دائم قيزيم سكينه مذمّت ائدر ئوزون
ايلر گوزونده گوزياشی طوفان هايانداسان
گه ديسگينر شيرين يوخودان سو دييه دييه
سويلر منی باغيشلا عموجان هايانداسان
بير كهنه داغ اولوب سو تمنّاسی قلبينه
هر آن قالوب ديلينده بو عنوان هايانداسان
يانّام عمو او گون نييه سندن سو ايستديم
ای كاش ئوليديم اوردا لب عطشان هايانداسان
عمروم نقدری اولسا سنون شرمسارووم
اولدون سو اوسته قانووه غلطان هايانداسان
سقّای شرمسار بنات حسين، سو يوخ
لطفيله ايله بير نظر احسان هايانداسان
هردم باخاندا اوغلووا قلبيم الولانار
سينم اولار بو روحيمه زندان هايانداسان
ياده سنون اوشاقليقووی سالّام آغلارام
سونمز اوركده آتش سوزان هايانداسان
دوتدوم الون اياق دوتاسان مين اميديلن
دردونده دوشدوم آخر اياقدان هايانداسان
گوزدن سنه چوخ اوخشاری واردی يتيموون
گاهی باخاندا اولّام هراسان هايانداسان
فكر ايلرم كی سن باخوسان روبرو منه
بيردن اولار خيال ائوی ويران هايانداسان
عبدالّلهين گوزوندن ايراق ياديمه دوشر
زينب باجون دانيشديقی جريان هايانداسان
گويا دئيور گوزل گوزووه گوز دگوب سنون
ياره آچوبدی زهريلی پيكان هايانداسان
گون باتدی قان محاقی دوتان صورتون كيمی
يوخدی چراغيم ای مه تابان هايانداسان
چوخ گوزلديم سنی گينه گون باتدی گلمدون
حسرتده قالدی ديدۀ گريان هايانداسان
آغلار گورنده گوزلريمی گون حيا ائدور
لنگه سالور غروبی كماكان هايانداسان
گونده يورولسا گوزده اوغول، من يورولمارام
يولّام غمونده زلف پريشان هايانداسان
مأيوس اولمارام نقدر تا نفس واريم
جانيم چيخنجا ايلرم افغان هايانداسان
«مهدی» فراق نارينه يان سنده روز و شب
لبلرده ورد حضرت جانان هايانداسان
عشق و اميد هر بشری زنده ساخليار
نوميد اولاندا سسلير انسان هايانداسان
دنياده آرزوی ظهوريله عمر ائله
هر بير نفس چاغور شه خوبان هايانداسان
ای ذبح اعظمون قانينون غملی وارثی
يابن الحسن، ذخيرۀ يزدان هايانداسان
گل جدّوون قصاصينی آل اهل ظلمدن
زهرا مزارين ايله نمايان هايانداسان
- سه شنبه
- 23
- بهمن
- 1397
- ساعت
- 13:44
- نوشته شده توسط
- ابوالفضل عابدی پور
- شاعر:
-
مهدی قلندری اردبیلی
ارسال دیدگاه