لوحه ثبت ائتدی قلم محضر دلداره سلام
کهکشانلاردا دیور اول گل بی خاره سلام
عرش و فرش اهلی دیور حیدر کرّاره سلام
ورد ائدوب جنّ و پری، مفخر طاهایه سلام
ملکوت اهلی دیور همسر زهرایه سلام
نجه حیدر، اولوب آئینه ی ذات ازلی
اؤزونه ائتدی ولی ذات حق لم یزلی
اسداللهدی ، یداللهدی، خدانین اؤز الی
کون و امکاندا بو مولادی گوزللر گوزلی
اولدی مین فخریله مشتق او علی دن بو علی
یازدیلار متن تواریخیده بو عنوانی
طول و تفسیریله دولدوردولا هر دیوانی
اختصاراً یازیرام اولمیا تا طولانی
هاشمه عامر آدیندا بیر اوغول وئردی خدا
مکّیان عبد مطلّب لقبی وئردی اونا
اون اوغول وئردی خداوند اونا چوخ پُر بَر و بار
تک به تک عالم و فاضل یل هیجا، دیندار
آتانین امرینه طاعت ائلین، کوه وقار
بیری چوخ عالم و فاضل اؤزی دریای هنر
پهلوان، قدّی رسا، پنجه قوی، سینه سپر
قهرمانیدی دلاور یلیدی بی همتا
آدی عمران اؤزی شاعر همی شیخ بطحا
لقب پاکی ابوطالبیدی خصم دغا
یار پیغمبریدی، جان جهان سسلردی
اونی اؤز اوغلی کیمی عزّتیلن بسلردی
دهریدن عبد مطلّب ائلین دم رحلت
سویلدی اوغلی ابوطالبه یوخدور فرصت
بو دم آخر اوغول صحبتیمه قیل دقت
قیل حمایت بو محمددن ائله سعی و تلاش
هم کفیل اول بونا هم اول آتا هم اول قارداش
مصطفا اولدی ابوطالبیچون نور بصر
هر خطر گلدی ابوطالب ائدوب سینه سپر
جان طاهادن ائدوب الّی اوچ ایل دفع خطر
ذوق و شوقیله اولوب حضرت طاهایه کفیل
خالق عالم اؤزی وئرسون اونا اجر جزیل
تا ابوطالب آلوب فاطمه بنت اسدی
مکّه کفاری شروع ایلدی بغض و حسدی
لعن و نفرینه دچار ائتدی حق اول مِن مَسدی(۱)
فاطمه کنز بنی هاشمه بیر گوهریدی
فخر نسوانیدی اهل ادبه محوریدی
وئردی پاداش ابوطالبه حیّ ازلی
دست پرورده ی پیغمبر حق اولدی علی
انجلا تاپدی بو انواریله اول نور جلی
مرتضی اوتوز اوچ ایل سایه ی طاهاده قالوب
علم طاهایه اولوب باب گوزل بهره آلوب
مکّه دن هجرت ائدوب یثربه تا ختم رسول
مرتضی ایستور ائده همسر شایسته قبول
اوخونوب حیدر کرّار آدینا عقد بتول
عمری آز اولدی پیمبر گلونون غملری چوخ
غملرین یازماقا هئچ بیر قلمین قدرتی یوخ
ترک دنیا ائلدی تا که رسول مدنی
غم هجرانه دچار ائتدی او بحر مُحنی
آناسیز قویدی او بانوده حسین و حسنی
مرتضی گوردی قالوبلار بالالار آواره
فکر ائدوب ائتسون او آواره لره بیر چاره
فاطمیلن بو علینون نقدر نسبتی وار
هر یانا دوندرور اوز فاطمه دن قسمتی وار
سرّی وار فاطمه آدیلان اونون الفتی وار
ذات حق گوردی علینون ائوینون درد و غمین
دئدی وئرّم سنیچون فاطمه ی امّ بنین
امر ائدوب قارداشینا میر عجم شاه عرب
بین اعرابیده آختار زن با اصل و نسب
شیر زن قدّی رسا فخر عرب کنز ادب
یارادوب خالق عالم سنی عاقل، ای عقیل
سعی قیل اول بو مهم امره لیاقتلی دلیل
امر مولایه اطاعت ائلیوب ائتدی تلاش
تاپدی بیر گل که او گل اولدی هامی گلدن باش
عرض ائدوب امریوی اجرا ائلدیم آی قارداش
تاپموشام بیر قیز اؤزی کان حیا صورتی ماه
اونی حتماً سنیچون خلق ائلیوبدی الله
اولدی همراه عقیلیله نچه یار علی
بوذر و مالک و سلمان او مددکار علی
خواستگاری اولونوب یار وفادار علی
آلدیلار حضرته توکیل اولوب قاری اؤزی
خطبه ی عقدی او مولا ائلدی جاری اؤزی
گئدوری منزل داماده خانم ناقه سوار
پر صلابت اوتوروب ناقه ده چون کوه وقار
یوز قویا درگه زهرایه ائدور لحظه شمار
اودلانان درگه زهرایه دوشن لحظه گوزی
دئدی یافاطمه آهسته یره اندی اؤزی
یوزینی قویدی اؤپوب درگهینین تربتینی
عرض ائدوب سن بو کنیزین بولوسن نیّتینی
حق اؤزی لایق درگاه ائلسون خدمتینی
گلموشم عترتیوه خدمت شایان ائلیم
سایوزه دالدالانام عمریمی پایان ائلیم
طبعمین روحینه دم وئرسه اگر روح الامین
شعریمه دوز قاتار عباسه گوره امّ بنین
ائدر عباس اؤزوده نوکرینه لطف یقین
یازارام منده اؤرک سوزلریمی دفتریمه
ائدرم عرض ارادت او گوزل سروریمه
تا قدم قویدی علی منزلینه امّ بنین
آگه اولدی اولارین نسگلینه امّ بنین
یار اولوب فاطمه نین دورت گولونه امّ بنین
عرض ائدوب محضر مولایه خانم بو سخنی
سسلمه فاطمه بوندان صورا دای بیرده منی
فاطمه آدی گلور گللریمون رنگی صولور
حسنینین گوزی خلوتده سرشگیله دولور
روح زهراده بو کیفیّته ناراحت اولور
اولما راضی بالالار برگ خزان تک صولالار
ابر نیسان کیمی باران غمیله دولالار
باغبان اولدی صولان گلشن زهرایه خانم
اؤزونی وقف ائلیوب درگه مولایه خانم
خدمت ائتدی ، یتیشوب رتبهٔ اعلایه خانم
پرورش وئردی امامت باغینین گللرینی
آنانین قویمادی احساس ائده لر بوش یرینی
دولانوب چرخ زمان گونلری ائتدی سپری
بارور اولدی خانم امّ بنینین شجری
بحر عصمت صدفیندن آییروبدی گهری
دسته گل مثلی اوغوللار گتوروب امّ بنین
خدمتین زینبه باشه یتیروب امّ بنین
نیه زینب دیورم صبر ائله ائتمه عجله
تیر عشقی بو یانان قلبیمی آز قالدی دله
یازورام وصفینی تا که گله منظوریم اله
زینبه اولدی ابوالفضل همیشه غمخوار
دئدی من نوکریوم تا نقدر عمروم وار
بو همان آل عبانین قولونون قوّتیدی
مرتضی عترتینون عزتیدی شوکتیدی
بو حسین ابن علینون دیزینون طاقتیدی
بو ابوالفضلیدی هر مشگلی آسان ائلیر
یر یوزون درد آلا بیر لحظه ده درمان ائلیر
ماه شعبانیده دوردون گونی هنگام اذان
گوز آچوب عالمه بو پور علی گریه کنان
آغلیوب امّ بنینین اورگین ایلدی قان
هرکس آغوشه آلوب ناله ی جانسوز چکوب
گوزیاشین دانه ی مرجان کیمی رخساره چکوب
سسلدی امّ بنین نیلیوم؟ آغلیور بو بالام
نه اَمور صود نه یاتور نه قویور آغوشه آلام
بالاما چاره ائدون قویمیون آواره قالام
بیت مولاده هامی آغلاشوری اهل حرم
زینب اوخشور بویورور آغلاما نازین چکرم
او هیاهوده کی نسوانی دوتوب سوز و گداز
منزله قویدی قدم بلبل گلزار حجاز
گوردی قارداشینی گریان ائدوب آغوشینی باز
قولّارین آچدی حسین سمت ابوالفضله قاچوب
تا حسینی گوروب عباسیده قوش تک پر آچوب
باغرینا باسدی حسین اؤپدی گوزل گوزلرینی
گئتدی بیر گوشیه آهسته دئدی سوزلرینی
ایکی قارداش ائلیوب غرق نگاه اؤزلرینی
گوئیا سویلوب حسین آغلاما غمخواریم یات
قارداشیم دال دایاقیم تشنه علمداریم یات
گون به گون بو بالانون نور رُخی جلوه لنوب
برگ گل تک دوداقوندان یره غنچا اَلنوب
حُسن زیباسینی هرکس گورور الحق بینوب
او خانملار که گوروب بو بالانون طلعتینی
در و همساییه پخش ایلدی کیفیّتینی
سالدیلار دیللره یثربده زنانه سخنی
غم دوتار زینب و کلثوم و حسین و حسنی
بو اوشاق دای ائله مشغول ائده جاق فاطمه نی
زینبون قلبینی درد آناسیزلیق سیخاجاق
اؤزی قارداشلاری بوندان بئله یاددان چیخاجاق
باخوری امّ بنین حیرتیله صاق و صولا
کوچه بیر لحظه ده نسوانیله آز قالدی دولا
آلوب آغوشه ابوالفضلینی تئز دوشدی یولا
دئدی عباسی فدا وئردوم ایکی قارداشینا
یدّی دفعه دولانوبدی حسنینین باشینا
ای خانملار بو بالا کنز وفا گوهریدی
بئله فکر ایلمیون سیز بولارون سروریدی
منیم اوغلومدی حسینیله حسن نوکریدی
نه قدر جانیم اولا زینبیمه جان وئرّم
مین ابوالفضلیم اولا زینبه قربان وئرّم
گردش چرخ فلک گونلرین ائتدی سپری
کاتب دست قضا یازدی قضا و قدری
اولوب اوتوز بش ایل عباس حسینون سپری
کربلاده آلوب اطراف شهی لشگر کین
بیر علمدار قالوب بیر صود امر بیر شه دین
تشنه لر ناله سی اخیامیدن عرشه اوجالوب
قلب سقّا سیخیلوب صبر و قراری آزالوب
سو یولون آچماقا حیدر بالاسی رخصت آلوب
دئدی مولا باخا بیلمم بیلوسن گوز یاشیوا
منه لطف ایله اجازه ، دولانیم من باشیوا
سر سپاهم قولووی بوینوما بیر لحظه دولا
بیزه هیهات بو لحظه گنه ده قسمت اولا
شه قوجاقلاشدی وزیریلن اونی سالدی یولا
ایاقین قویدی رکاب اوسته علمدار رشید
غیظیدن گلدی عتاب اوسته علمدار رشید
ایستورم من قوتارام ذهنیمه سوز تازه گلور
مرغ طبعیم پر آچوب ذوقیدن آوازه گلور
سویلوری ایله نظر تلّیده شهبازه، گلور
ای«ستوده» بو گوزل مطلبیوون ارزشی وار
وزنی آهنگی دگیش یاز گلور اول یکّه سوار
ـــــــــــــــ
(۱)مراد زن ابولهب می باشد که در سوره مسد نیز از او با نفرت یاد شده است.
- سه شنبه
- 23
- بهمن
- 1397
- ساعت
- 20:5
- نوشته شده توسط
- ابوالفضل عابدی پور
- شاعر:
-
ستوده زنجانی
ارسال دیدگاه