عیادت ائتمگه بو داغداریدن گل اوغول
قوتار غریب آنووی انتظاریدن گل اوغول
هایانداسان ئولورم آی وفالی عباسیم
چیخانمورام اجل آچمیش حصاریدن گل اوغول
ئولوم نشانه سینون منده کی سویوق ترینی
الونله سیلمگه سولموش عذاریدن گل اوغول
ئولن رباب کیمی گوزلریم قالوب قاپیدا
قیتدی هر گئدن اوچی شکاریدن گل اوغول
ائلیکی مشکوه اوخ دگدی آخدی سو بیلورم
خجالت ائتدی سنی شیرخواریدن گل اوغول
رباب ده ائله سندن خجالت اولدی بالا
داخی اوتانما سن اول شرمساریدن گل اوغول
نجه باخاردون آخان وقتیده سو مشکوندن
یولا اوجور باخورام انتظاریدن گل اوغول
خجالت ایلمزیدی قباقه چیخسیدی
کی درسین آلمیشیدی دوز، نگاریدن گل اوغول
باجون منه دئدی بیربیر نلر گلوب باشوا
گیلیلیم ولی اول داغداریدن گل اوغول
دانیشدی هر سوزوی بیر غمون ولی دئمه دی
یقین اوتاندی من سوگواریدن گل اوغول
اوَل بیر اوخ سوزی آچدی دوباره گیزلتدی
دئیشدی صحبتینی اضطراریدن گل اوغول
سوزوندن اوخ سوزونون اصل مطلبین سئچدیم
آچیلدی پرده غم مستتاریدن گل اوغول
بئله خیال ائدورم اوخ دگوبدی صاق گوزوه
کسوب نگاهوی رخسار یاریدن گل اوغول
گوزونده اوخ یارادان یاروه ننون قربان
قرا اولوب گونوزوم لیل تاریدن گل اوغول
تزه هر ایل تزه لندی منیمده دردلریم
توان آپاردی دل زخمداریدن گل اوغول
ترانه سیله منه غم گتیردی بلبل لر
گلنده شوقه نسیم بهاریدن گل اوغول
کسنده تیغ خزان سرو خوللارین جبراً
بولردی قلبیمی غملر فشاریدن گل اوغول
سالاردی یادیمه نهر اوسته آیریلان قولوی
گیلیلیم فلک کج مداریدن گل اوغول
گلور دوشور یادیما سیزلن اوتدوقوم گونلر
کی دویمادیم ائله خوش روزگاریدن گل اوغول
فصول عمرومی دورت گل منه بهار ائله دی
کی هر بیری باشیدی مین بهاریدن گل اوغول
او دورت گلوم اوتوران وقتیده قوجاقیمده
آلاردی باج اتگیم لاله زاریدن گل اوغول
سیزه باخاندا دیردیم ئولنده وار نه غمیم
آدیمدا دوشمیه جک اعتباریدن گل اوغول
مدینه ده اولاجاق کفن و دفنیم عزّتیلن
جهانه فخر ائدورم من وقاریدن گل اوغول
گئدنده قبر ائوینه قویدولار کی تابوته
بو دورت بالام دوتاجاق دورت کناریدن گل اوغول
مدینت اهلی حسینه گوره گلر یاسیما
یئتیشمز هئچ کیمه بو افتخاریدن گل اوغول
بسیمدی بیر یول حسینیم دئسه ننم لایلای
آیرماسا منی زهرای زاریدن گل اوغول
سن افتخار ائلیرسن حسین دئینده ننه
من اوندا جان دیرم تئز مزاریدن گل اوغول
خانیملارا ننه سیز زینب اوخشاما دیه جک
یانقلی سوزلری واردور شراریدن گل اوغول
گل ایندی بیر گلولن عیبی یوخ بهار ائلیوم
شفا آلیم ایاقوندا غباریدن گل اوغول
بو خلق ایندیده امّ البنین دئیولّه منه
یانور ئورک محن بیشماریدن گل اوغول
امیدینون چراغی غفلتاً سؤنن آنوام
ئورکده آرزیلاری حسرته دؤنن آنوام
- چهارشنبه
- 24
- بهمن
- 1397
- ساعت
- 10:50
- نوشته شده توسط
- ابوالفضل عابدی پور
- شاعر:
-
مهدی قلندری اردبیلی
ارسال دیدگاه