سولدی چمنیم سینه سی سوزانم الهی
دورت اوغلوم ئولوب حالی پریشانم الهی
دنیا یوزی گورمز او جوانلاری دوباره
دویمازدی باخان هر قَدَر ائتسیدی نظاره
عاشق دویا بیلمز نَقَدَر باخسا نگاره
اولسون ئورگیم جعفریمه فضلیمه قربان
یوخ یوخ هامیمیز قولسوز اباالفضلیمه قربان
هر بیر آنا فکر ایلیورم ایستر ئولنده
اوغلانلاری گوز یاشی توکه قبره گئدنده
تشییع اولا خوار اولمیا تابوتی وطنده
من هئچ دئمورم کرب وبلادن گَلَن اولسون
ای کاش منه عباس علمیندن کفن اولسون
اوغلانلاریم اللرده ئولوب عرصه ده سوز یوخ
عباسیمه اما یانورام من هامیدان چوخ
گویا توخانوب ساق گوزونه زهریلی بیر اوخ
بیر گون خبر آللام یوخودا گورسم ئوزوندن
قولسوز نئجه پیکانی چکوب قانلی گوزوندن
زینب منه تعریف ایلیوبدی جریانین
حق اوسته نیستاندا توکوبلر یره قانین
فخریم بودی قربان ایلیوب دینینه جانین
دوزدی منی عباسیمون هجرانی قوجالتدی
اما باشیمی فاطمه یانینده اوجالتدی
واردور یری قلبیم آلیشا نارِ غمیندن
عباسیمی آگاه ایلین یوخ حرمیندن
اوغلی هی ئوپور قانه بویانمیش عَلَمیندن
سسلور بابا ، جانیم اولا ایثاریوه قربان
گَل آل منی آغوشووه قوللاریوه قربان
گاهی ئورگین بنده سالار درد و غم آغلار
پرچم گوتورر سینه وورار دمبدم آغلار
هر دنده دیَر قوللاری اولدی قلم آغلار
مشکین کی سالور چیگنینه دنیالری داغلور
بیر معجری سالم گوزینون اوستونه باغلور
صغرانی قویا بیلمدی تنها و پریشان
امر ایلدی یثربده قالام شاه شهیدان
تمکین ایلدیم امرینه اجرا اولا فرمان
ای کاش ولی زلفِ غمی شانه دارِیدی
اوغلوم منیده زینبه کُلفت آپارِیدی
دنیا منه زندان کیمی اولدی بو وطنده
اولسیدیم اگر منده همان دشت و دمنده
زینب بالامون قوللارینا قمچی دگنده
ایلردیم او ناکسلره ئوز عشقیمی ابراز
عباس بجردن آنانون قورخوسی اولماز
گئتسیدیم اگر منده او گون کرب و بلایه
شاید بیله دوشمِیدی باشیم درد و بلایه
زینب چاغیراندا هامونی بزمِ عزایه
از بس منه قائلدی فضیلت او هما فضل
قارداشینی اوّل اُوخور آخرده اباالفضل
- چهارشنبه
- 24
- بهمن
- 1397
- ساعت
- 13:47
- نوشته شده توسط
- ابوالفضل عابدی پور
- شاعر:
-
استاد حسین غفاری اردبیلی
ارسال دیدگاه