من کی بی بنینم اوغولسوزام
یوخ الیمده بیر چارم آغلارام
نچّه ایلدی بو درده دوشموشم
درد الینده بیمارم آغلارام
(وای منیم بو احوالیمه خدا)
او قبیله نین قیزییَم عقیل
یتیروب منی بیله عزّته
اوجالیبدی دهریده شوکتیم
یتیشنده باب ولایته
زینبه ددیم گلمیشم کنیز
یتمیشم اودور بو جلالته
من ددیم سیزه اولمارام آنا
گُل یانیندا بیر خارم آغلارام
صاحبیم گلنده ایوه منی
سسلینده ادرکنی فاطمه
فاطمه دینده اوشاقلارین
قلبی چوخ دوشردی تلاطمه
خواهش ایلدیم آدیمی دیمه
بلکه غملری تاپدی خاتمه
دوتموشام دیله زینبی ددیم
غم یمه کی غمخوارم آغلارام
دورت اوغول آناسی ایدوب خدا
اولموشام من ام البنین لقب
سعی قیلدیم اوغلانلاریم اولا
کانِ رحمت و معدن ادب
بیر مسافرت ایلدی منه
گوندوزی قرانلیق چو تیره شب
نصف شب منی ترک قیلدیلار
شمع محفل ِ تارم آغلارام
کربلا چولونده بالالاریم
دوغرانوب جفائیله سر به سر
دورت مزارین عکسین یر اوستونه
بارماقیله چکدیم به اشک تر
من بیرین ولی چکمیشم کیچیک
دوغرانوبدی گویا اوگون قمر
آغلینده دشمنلریم منه
حق ویروبله غَمبارم آغلارم
بیر گَلون مدینه خانیملاری
من سیزه کتاب اَلم یازیم
ایکّی قول سوزون سیزلره آچیم
یا صحیفه ی درد و غم یازیم
صاق گوزون،سوزون آچمییم سیزه
اوخلی مشکیله بیر عَلَم یازیم
سیزلره ابوالفضلیدن دیوم
سیز گورون شرر بارم آغلارام
زینبیم دیوب نچّه سوز منه
سن دیمه اورک یاره لنمیوب
باشینا دگوبدی عمودِ کین
قان گیدوبدی از بس دوزنمیوب
آنّنینا ووروبلار سه شعبه اوخ
ساخلیوب آتی بیر اَننمیوب
دادینه گمان فاطمه گلوب
سویلیوب دل افکارم آغلارام
ای دوشن یوزی اوسته توپراقا
قانلی دشته سن ویرموسن صفا
غیرتون زبانزد دی عالمه
ای شکسته پر ،معدن وفا
خیرداجا مزارون براتینی
(بیکَسه) اگر ایله سن عطا
خویش و اقربایه دییَر گَلون
یوللانیم کی زوّارم آغلارام
- چهارشنبه
- 24
- بهمن
- 1397
- ساعت
- 18:20
- نوشته شده توسط
- ابوالفضل عابدی پور
- شاعر:
-
مهدی عبادی(بیکس)
ارسال دیدگاه