امّ البنین نجیبۀ دور زمانیدی
مولا ائوینده خادمۀ جانفشانیدی
از بس حسینیلن حسنه خدمت ایلدی
دنیا نقدری واردی آدی جاودانیدی
زهرانی ایستینلر اونا حرمت ایلسین
چون زینبیله کلثوما چوخ مهربانیدی
حفظ ایلدی امام حسن احترامینی
چونکی حسن پیمبره روح و روانیدی
اما ائشیتدی فاطمه مولایه تاپشیروب
اوندان حسینه عاشقیدی ایستی قانیدی
زینب گلین گئدنده مؤقّر یولا سالیب
چون افتخار و محترم دودمانیدی
کلثومی قویمادی آناسیزلیق غمی چکه
چون قیز اوشاقینه آناسیزلیق گرانیدی
بیر شیر زن صفتلیدی شاهکار ائدیب صودی
اوغلانلاری دلاوریدی قهرمانیدی
قیرخی قاریشدی فاطمه نین اربعینینه
یعنی وفاتیده ادبیندن نشانیدی
دائم کنیزلریله ئوزون همردیف ائدیب
زهرا ائوی کنیزلیقا عالی مکانیدی
دنیا دولاندی حیف،عوض اولدی روزگار
گوردی حسینه ئوز وطنی بی امانیدی
آل علی گجیله چخیبلار مدینه دن
بولدی بویوک ملال و مصیبت نهانیدی
دورد اوغلونی گتوردی حسینین حضورینه
عرض ایلدی بولار قاپووین پاسبانیدی
نوکرلیقا قبول ائلسن افتخار ائدر
امّ البنینه مرحلۀ امتحانیدی
اما گئدن گئدیبدی قالیب بیر یتیم بالا
گوز یاشلاری ملال فراقه روانیدی
ائللر گئدیب بوشالدی بنی هاشم ائولری
گویا بهار و گلشنه فصل خزانیدی
بیر لحظه لرده ترک ادب ائتمدی خانم
عباسیدن حسینینه چوخ ناگرانیدی
ساخلاردی کاروانلاری یولدا حزین سسی
از بس کی آه و ناله لری جانستانیدی
شهره گلوب گئدنلری تعقیب ائدردی چوخ
چون کی امید حسرتی بیر کاروانیدی
بیر گون ائشیتدی تا کی بشیرین صداسینی
اما صدا دئمه عجب آه فغانیدی
عبداللهین گیوندوروب اما یتیم کیمن
بولمم نه واریدی بدنی ناتوانیدی
شهر اهلی گوردولر گلور اما همان دگول
دنیاسی درد و غملیدی قدی کمانیدی
- پنج شنبه
- 25
- بهمن
- 1397
- ساعت
- 11:2
- نوشته شده توسط
- ابوالفضل عابدی پور
- شاعر:
-
واصف مرندی
ارسال دیدگاه