سرورِ هر سه عالم و نور چهار سو علی
کعبه طوفِ شش جهت سیّدِ هفت کو علی
گوردی شب عروجده حضرت ختم الانبیا
ثبت اولوب اوچ مکانیده نامِ علیِّ مرتضا
بیت مقدّس ایچره بیر صَخره نین اوسته ابتدا
بین ستونِ عرش وهم شاخهِ سِدر مُنتها
شُهرَه دی کائناتیده مظهرِ ذاتِ هو علی
اونداکی ختم الانبیا قُبّهِ ی کهکشانیده
پرده به پرده سیر ائدوب وادی لامکانیده
محور عرش اعظم حضرت جاودانیده
گوردی جناب مصطفی چارمین آسمانیده
گلدی سرادقاتیده حضرته روبرو علی
روح الامینیدن سوآل ائیله دی سیّدُ البشر
هانسی زمان بوتراب عرشه عروج اِئدوب مگر؟
گلدی جواب علی دگول گوردوگون ای حمیده فر
بلکه بو بیر فرشته دور شکل علییّه مفتخر
یعنی همیشه عرشیده واردی گشاده رو علی
رتبه ی قاب قوسه تا احمد اِئدوبدی فتح باب
گوردی نماز حمد اِئدور حضرت صانِع الغیاب
تا سَبَقَت عُطُوفَتی مِن غَضَبی اولوب خطاب
گوردی علی صداسیدور لَحنِ مُدَ بّر الحجاب
لَحنی رسادی گوئیا ائیله دی گفتگو علی
وحیِ بدون واسطه گَلدی رسول اکرمه
واردی علاقون ای نبی قلبیده هانسی بَندَه مه؟
عرض اِئلیوبدی بندِه ی خالص ِحیِّ اَعلَمه
گلدی ندا علی کیمین گَلمه دی گَلمَز عالمه
فخریدی متّقی لره مفخر اِتَّقو علی
کیمدی علی مگر چاتوب عرشیده بو لیاقته؟
کیمدی علی مگر اولوب شُهره ذَوِی الکرامته؟
کیمدی علی مگر اولوب عدلی بها عدالته؟
کیمدی علی مگر آدی وئردی شرف شرافته؟
شکلی بشر نما اولوب ذاتی فرشته خو علی
لنگر آفرینش و حاجب احتجابیدور
بیر آدی بوالغرایب و بیر آدی بو ترابیدور
پنچه قهر حضرت مُحتَسِب اُلحِسابیدور
کفریدی اوخشادام آیا چون ئوزی آفتابیدور
گوندی گونه باخامّیوب یازدلا ماهرو علی
باخما کی حقِّ مرتضا دهریده پایمال اولوب
شاه ولادی عشقی چوخ سینه لره مدال اولوب
چوخلاری واردی حیدرین حقّینه کج خیال اولوب
دشمن مرتضا ولی شیعه گورنده لال اولوب
ارث ائِلیوبدی شیعیه غیرت و آبرو علی
عابد لیل تاریدی ،عرصه ده تک سواریدی
صحنه ی کارزاریده شیر بلا شکاریدی
قاچمازیدی جدالیدن شاًنینه ننگ و عاریدی
قومازیدی قاچانلاری ، گور نئجه شهریاریدی
رزمینه گلدی کیم ولی ائِیله دی پشت و رو علی
مرحب اسفل اونداکی خشمه گتیردی حیدری
گوردی علی مرتضا اولدی یهودیلر جری
خیبره وئردی بیر تکان قهریله آلله اللری
پنجه لریله سیندیروب خندقه آتدی خیبری
سالدی سپاه مومن و مُشرکه های و هو علی
گَلّه یِ روبهانه تا حمله اِئدوب او شرزه شیر
اسدی تمام هیکل مرحب سفله چون اسیر
الله الی گلنلری تپراقا یئخدی بیر به بیر
ائتدی رجز دیینلرین دیللری لبلرینده گیر
ائیله دی گویی لبلری نیزه ایلن رفو علی
دهریده نامدار اولان صاحب اقتدار اولار
صاحب اقتدار اولان شرزه ی کارزار اولار
شرزه ی کارزار اولان حق ضعیفه یار اولار
حق ضعیفه یار اولان بیر بله شهریار اولار
اولدی خلیفه منتهی آجلقا ائتدی خو علی
وصف علینی ایسته سون واردی بونا شباهتی
صفریدن آز تلاش اِئده شرح ائلیه نهایتی
شرح علینی آختاران معنی اِ ئدَر عدالتی
حق علینی غصب ائدن عدله ائِدوب خیانتی
یوخسا آییردی عدلیده رشته ی تار مو علی
رهبر مسلمین اولوب گئیمه دی تازه بیر عبا
عترتینون غذاسینی اوچ گئجه آلدی بیر گدا
دردینی چاه کوفیه هی دِئیوب آغلیان آقا
هرگون اولوبدی بیوه و طفل یتیمه هم نوا
گزدی فقیرو سائلی هر گئجه کوبکو علی
آند اولا ئوز جلالینه تکدی علی و مکتبی
پادشهی کی غبطه حوریلر اولدی منصبی
شیرحقی کی سرنگون تپراقا ائتدی مرحبی
اِئولرَه باش چکن زمان اِئوده آجیدی زینبی
گور کیمی قویدی کیملری ائیله دی جستجو علی
دوزدی کی اهل کوفه نین ثابت اولوب خیانتی
دوز دوکی شیخ گونه لر ائیله دیلر جنایتی
دوزدی کی ابن ملجمین چکدی شرر عداوتی
یخدی علینی آند اولا عدلینه ئوز عدالتی
یاده سالوبدی قاتلی آلدی سورا وضو علی
شیعه گرکدی فخر ائده مرتضوی جلالینه
پاک و مطهر عشقینه سینه ده کی ملالینه
بی سر و پا اولانمیوب عاشق علینین آلینه
صبر ائلیون #امانی تک شوقینه هم ملالینه
عرض ارادت ایلیون مزدی وئرر نکو علی
- چهارشنبه
- 24
- بهمن
- 1397
- ساعت
- 19:2
- نوشته شده توسط
- ابوالفضل عابدی پور
- شاعر:
-
علیرضا امانی مجد
ارسال دیدگاه