گینه منیم ئورگیم شعلۀ شراره یانار
سولان جفائیله گُلهای نو بهاره یانار
تعجبَّم نیه گول پرپر اولدی گولدی فلک
هامی جهانیده دائم بو طرزکاره یانار
ویروبدی اوچیا قوّتلی قول کمان دوتسون
فلکده یوخدی مروّت مگر شکاره یانار
عزیزی خوار ایلینده نه لذّتی آپارور
وورار گوجون نه بیلور درد بیشماره یانار
سیزیلدیاندا #یتیم لر فلک چوخ حظّ ایلر
دئمز ترحُّم ائدیم ظلم روزگاره یانار
یتیم آدی دیلیمه گلدی گئچمرم یازارام
آتاسی ئولدی اوشاقون دوشر فشاره یانار
نه حاله دوشدی اباالفضلین اوغلی عبدالله
حسینچی لر غم و دردینده آشکاره یانار
دئدیله کوچه ده بیر گون یتیم قییتدی ائوه
گوروبدور ام بنین یاش توکر عذاره یانار
دئدی باشووا دونوم سالما باشووی اشاقا
گوزل اوغول سنه کیم ایلیر نظاره یانار
بولوط کیمی دوتولوبسان گوزون قاداسین آلیم
بیلورسن حالووه دائم بو بخت قاره یانار
یانقلی سوزلرووی سالما قلبووه منه دئ
چکنده آهی سنه عرشیده ستاره یانار
هاچان سیزیلتون اوجالسا ایله مؤثر دور
جوان قوجا یانار هئچ ، بلکه شیرخواره یانار
گلوب تَکلُّمه اظهار ایدوبدور عبدالله
آنا دئسَم سوزومی طیریده هزاره یانار
منه نه علتی وار کوچه ده یتیم دیولور
سارالورام بدنیم سوزلرینده تاره یانار
سفارش ایله بیریندن دئسون آتالارینا
سوزون یتیشسه اگر خرد و هم کباره یانار
اوشاقلارینون الیندن یاپشماسین آتالار
گلور دِنَن بو بالام هر گون آه و زاره یانار
لباس تازه گییندیرمه سین بالالارینا
آنام وطنده باخار چشم اشک باره یانار
صفاسی دای وطنون یوخدی آیری شهره گئدک
وجودیمیز بئله کی نارِِ اِنزِجاره یانار
بیر آزدا طعنه منه وورسالار یقین ئولَّم
بابام گلینجه منی کیم قویار مزاره یانار
یتیشدی کامه فلک کربلاده اهل عزا
دئدیم سوزوم اولا تا عارفه اشاره یانار
مدینیه یتشوبدور قطار آل الله
گلوب باخانلار عزیزانِ کردگاره یانار
نه گوردولر بالاجا سیّدیله بیر عورت
همان خانمدور اباالفضل نامداره یانار
یتیشدی محضر زینبده قالدی ام بنین
دئدی خانم ئورگیم غصه لی صغاره یانار
گوزی یولوزدا قالوبدور یانیمدا کی بالانون
باخان مدینه ده بو دیدۀ خماره یانار
سسین ائشیتدی بشیرین دئدی چخاق ائودن
هامی گله گله گوردوم بو یادگاره یانار
مدینه دن گئجه عزتلی ائللریم گئتدی
گونون دالیجا دوشوب ماه انوریم گئتدی
خانم بیان ائله محبوب حی داور هانی
نظر حسیندور همان عرش و فرشه لنگر هانی
جلالیله سیزی سالدیم یولا گئجه یاریسی
سپاهوزه نه گلوب پس امیر لشگر هانی
حسینه نوکر ابالفضله قوشدوم اوچ قارداش
گئدوبدور عزتیله عون و فضل و جعفر هانی
نه اکبرون آناسی آز زمانیده قوجالوب
جمال یوسفی حیران قویاردی اکبر هانی
رباب ایکی الینی قوینونا قویوبدی مَلَر
باشین اشاقه سالوب سینه سینده اصغر هانی
سیزیله گئتدی گئجه اوچ یاشیندا نازلی بالا
رقیه دیللریمیز ازبری او دختر هانی
ائشیتدی یثربه گلدوز سووندی عبدالله
خبر وئره ک دئدی صغرای زار و مضطر هانی
گَله گَله دئدی یولداشلارینا گَلدی آتام
منه مدینه ده هر گون یتیم دِیَنلَر هانی
خانم حسینوون اوّل ملالین آختارورام
صورا گئدنلریمون شرح حالین آختارورام
دئدی منم آنا محنت نشانی آختارما
حسینیم ئولدی چخوب تشنه جانی آختارما
سوروشما قانلو بیابانیده ائویم یخلوب
دریلدی گوللریمیز باغبانی آختارما
قولی دوشوب سووا خاطر گتورموشم علمین
باخوب صاقا صولا صاحب لوانی آختارما
عباده اکبریمون نعشی گلدی خیمه لره
رسول اکرمه بنذر جوانی آختارما
حسن نشانه سینه کربلاده طوی دوتدوم
گَلین گَلوب ولی نوکدخدانی آختارما
ربابیوون تزه مولودی آلتی آی یاشادی
بَزَه دی دوشلوگونی لخته قانی آختارما
بیچیلدی تیریله حلقی قولاقیدن قولاقا
باشی آخوب دالی دیلسیز بالانی آختارما
باجیسی شامیده بیر قانلو باشی گوزلردی
رقیه دختر شیرین زبانی آختارما
ساتاشدی قانلو باشا گوزلری گوزون یومدی
مزاره گئتدی همان مه لقانی آختارما
« معزی » نوکر شایسته افتخار آپارور
بَیَنسه گر آقا انعام بیشمار آپارور
- پنج شنبه
- 25
- بهمن
- 1397
- ساعت
- 11:4
- نوشته شده توسط
- ابوالفضل عابدی پور
- شاعر:
-
استاد یوسف معزی اردبیلی
ارسال دیدگاه