گَل ابوالفضل آناوام دیده سی گریان ئولورم
گوزلریم یولدا ئوزوم یرده اؤرک قان ئولورم
بوش اتاقلاردا گئجه گوندوز او قدر آغلامیشام
گُل عمروم دوشه آز قالدی بوداقدان ئولورم
جان یئتوب سینه مه حسرت باخیرام صاق و سولا
گورورم بوشدی یریز ایلیرم افغان ئولورم
اوجا قدّیم بوکولوب ای بویی بویلاردان اوجا
ایندی گورسن دیه بولّم تانیمازسان ئولورم
آیریلیق دردی ائله درده سالیبدور آناوی
گلسه لقمان ائده بیلمز منه درمان ئولورم
تشنهٔ جام وصالم ولی حیف اولسون اوغول
بحر محنتده گرفتارم هراسان ئولورم
کشتیِ عمرومی غرق ایله دی طوفان بلا
ممکن اولمادی چیخا ساحله بیر آن ئوولورم
ائلین آغ بیرچه گیَم حیف اولا ائلدن اوزاقام
بولمورم کیم دوتاجاق شام غریبان ئولورم
گورمه دیم کرب و بلانی یتیشم کامه اوغول
قالدی قلبیمده بو نسگیل منیم الان ئولورم
بولمورم کیم قازاجاق قبرین اوغولسوز ننه وین
کیم دوتار ماتم، اولار کیمسه نواخوان ئولورم
معجریم قاره گوزوم یاشلی ائویم بیت الحزن
یاسلیام چیخمامیشام من هله یاسدان ئولورم
قنادیم اولسا اوچوب کرب و بلایه قونارام
سیندیریب شهپریمی ظلمیله طوفان ئولورم
سیز گیدندن آغاران ساچلاریمی هورمه میشم
اولدی زلفوم کیمی حالیمده پریشان ئولورم
اولمادیم کرب وبلاده دولانیدیم باشیزا
سسلییدیم آناز اولسون سیزه قربان ئولورم
آنازین عزّتی یغمایه حسینیله گئدوب
آیریلاندان ائلیوب گویلومی ویران ئولورم
یاس دوتاندا سیزه اوّلده حسین وای دئیرم
ایندی ده سسلیرم ای شاه شهیدان ئولورم
بالان عبدالله آلوبدور دیزی اوسته باشیمی
دیورم آغلاما ای روحیمه ریحان ئولورم
دئدیلر خیردادی قبرین من اینانمیردیم ازل
علّتین بیلجاق اوغول دؤشدوم ایاقدان ئولورم
تا ائشیتدیم که دَیوب ساغ گوزوه زهرلی اوخ
گوزومه تار اولوب عالم او زماندان ئولورم
دئمیشم پرچمیوی قبریمین اوسته چَکلَر
یورولان روحیم آلا عطریوی اوندان ئولورم
گوزل اوغلوم بو «نصیری» قاپیمون سائلیدور
آناوا خاطر اونا قیل گوزل احسان ئولورم
- سه شنبه
- 30
- بهمن
- 1397
- ساعت
- 14:43
- نوشته شده توسط
- ابوالفضل عابدی پور
ارسال دیدگاه