زُوجهء شیرِ خداوند وحید
فاطمه، اُمِّ ابوالفضلِ رشید
ویردی ترتیب اوُل ستم کش دورت مزار
هر بیری بیر نو جوانه یادگار
اِیتدی قبرستاندا دائم مسکنین
عرشِ اَعلایه اوجاتدی شیونین
یاد اِیدردی اوز عزیزِ جان لارین
تشنه لب جاندان گِیچن اوغلان لارین
وای اوغول وای دلده، گوزده اشکِ ناب
یثربین اهلی نه اِیلردی خطاب
حالیمی بی حد پریشان اِیتمیون
رحم ایدون گوزیاشیمی قان اِیتمیون
اولمیون راضی اولوم چوخ دل کباب
ایتمیون اُمّ البنین آدی خطاب
سویلینده سیز منه اُمّ البنین
آرتی رور بو آد منه شور و اَنین
یادی مه قهراً دوشور اوغلان لاریم
قوّتِ روحیم عزیزِ جان لاریم
واریدی دُورت سروِ آزادیم منیم
اونلاریله خاطرِ شادیم منیم
نه روا دور بیر اوغول سوز مادرین
سسلَ سونلر آدینی اُمّ البنین
وای منه ایوای بلالی قلبی مه
وا اَسف ایوای یارالی قلبی مه
نقل ایدولّر کربلادن بیر خبر
بو خبر اِیلور منی شوریده سر
اوغلوم عبّاسین دیولّر اهلِ شام
اللّرین قطع ایلیوب لر تشنه کام
ای منیم شیر اوغلوم، ای آرامِ جام
ای آدی عبّاس، اوزی شیرِ ژیان
من ایشیتدیم بیر ستم کارِ عَنود
کربلاده ووردی باشوندان عَمود
سن که دعواده آجیقلی شیری دون
صاحبِ سر پنجه و شمشیری دون
واریدی کیمده جسارت بر ملا
سن کیمی شیره اِیده بیله جفا
اَلده گر اولسیدی شمشیرون سنون
ایلین مزدی جسارت دشمنون
بس بیله معلوم اولور قومِ شریر
اللّرون کسمی شدی ای شیرِ دلیر
تا حیاتیم وار بو دنیاده ملول
وا ابوالفضلا دیوب یانّام اوغول
قولی نه فعلی له بانوی جهان
ویردی دنیاده غریبه امتحان
جان ویرون جه ایتدی افغان آغلادی
توکدی گوزدن خونِ دل، قان آغلادی
یثربون والی سی مروانِ شرور
جنبِ قبرستان دان ایلوردی عبور
گوردی بیر عُورت اِیله فریاد ایدور
وای اوغول وای دلده آه و داد ایدور
شش جهاتی دولدوروب شیون سسی
پارچالور قلبی فغان و ناله سی
سویلدی کیم دور بو سینه داغلوری
هانسی ثُکلا اوغلونا قان آغلوری
ویردیلر اُول سنگدل شومه جواب
بو بلا هم خانه سی خانه خراب
بوترابه زُوجه دور اُمّ البنین
مادرِ عبّاس فُهلِ بی قرین
شمری دَن آرتوق شَقی مروانِ دُون
گوزیاشین توکدی، غمی اولدی فُزون
بیر بیره چالدی اَلین اول نابکار
سویلدی اُمّ البنینون حقّی وار
واردی تا دنیا یوزینده کائنات
دوغماز عبّاسین نظیرین اُمّهات
ای بنی هاشم آیی کانِ ادب
وی اولان باب الحوائج منتخب
من (حسینی) ناخوشام هم بی کسم
دامنون محکم دوتوب وِیرّم قسم
بیر حسین اول شاهِ دینین جانی نه
بیر آنان اُمّ البنینون جانی نه
ایسته اللّهون دان ای کانِ وفا
بو مرضدن تیز منه ویرسون شَفا
اوچ آیی گِیچدی ملول و دل غمین
بیر تصادم اِیلیوب خانه نشین
نه سینق چی باش تاپور نه بیر طبیب
باری سن لطفون دَن اِیت مه بی نصیب
تا شفا وِیرسون خدای لایَنام
آستانوزده اِیدوم خدمت مُدام
- سه شنبه
- 30
- شهریور
- 1400
- ساعت
- 20:50
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه