کیم سفر ایتمیشدی گلدی آنا
اهل بیتون گوزی دینجلدی آنا
گنه آخشام یتشوب یاندی چراغ
گوزومیز قالدی ولی یوللّاردا
گون بگون اولدی پریشان ایویمیز
منه تاریک دور هر آن ایویمیز
هانسی گون گَلسه بیزیم اِئللّریمیز
اولاجاق جنّت رضوان ایویمیز
ایله بیل طاقتیمی غم آلاجاق
گوزلریم یولدا وطنده قالاجاق
بو فلک قویمیاجاق بیرده گُلم
باشیمی چوخلی بلایه سالاجاق
غصّه تار ایلدی گوندوزلریمی
دیورم محضرووه سوزلریمی
چوخ بو گونلر سنه قربان آناجان
ئوپوسن قولّلاریمی گوزلریمی
گزمیشم کوچه ده دل داغلامیشام
قیدوب تیز قاپونی باغلامیشام
یانمیشام ایوده یتیم قالماقیما
اوتوروب بیر نفَسه آغلامیشام
قلبیمی غم اوخی یثربده دَلَر
گوزلریم صورتیمه اشگین اَلَر
اوره گیمدن کسیلوب صبر و قرار
بس بابامدان نه زمان نامه گَلَر
باغلوسان خیردا عَمامه باشیما
گیدورم تا قوشولام یولداشیما
تَزه لیکده باشیما اَل چَکِلور
گورورم غرق اولورام گوز یاشیما
گرد غم قونموش آنا یوزلریمه
آغلاما یاندریجی سوزلریمه
قاپیا گلدی هاچان سائلیمیز
باخدی اوّلده منیم گوزلریمه
- سه شنبه
- 30
- بهمن
- 1397
- ساعت
- 14:54
- نوشته شده توسط
- ابوالفضل عابدی پور
- شاعر:
-
استاد یوسف معزی اردبیلی
ارسال دیدگاه