من امیرالمؤمنینم دینه خدمت ایلرم
آند اولا اللهه عدلیله حکومت ایلرم
قویمارام بیر حبّه بیت المالی حیف میل اولا
من حریم دین دن جدّاً حمایت ایلرم
سرزمینهایی که او غیر اهلینه اهدا اولوب
اهلینه قیتررم احیای عدالت ایلرم
عایدات ملک غصبی دن دوتولمیش طویلاری
ماتمه دؤندررم اجرای شریعت ایلرم
عدلیده وسعت گشایش وار هامی انسانلارا
من قصاص آلّام حدود شرعه دقّت ایلرم
ظالمین ظلمی ولی بیر دخمه دی تاریک و تنگ
نفرتیم وار ظلم ائدن شخصه سیاست ایلرم
من علیّ بن ابیطالب زَره آلّانمارام
آب خالص نان جو افطاره عادت ایلرم
تاج و تخت و رخت ابریشم منه شایسته دی
لیک من بو کهنه دستاره کفایت ایلرم
سفره ی رنگینی وئردیم زاده ی سفیانلارا
کاسه ی شیره سویقه من قناعت ایلرم
حامی مستضعفینم دشمن مستکبرین
بوترابم توپراق اوسته استراحت ایلرم
اولمارام تبعیضه قائل دادگاه حکمده
من اوتوررام تخته سنگ اوسته قضاوت ایلرم
پهلوانلار جنگیده شمشیریمه تعظیم ائدر
هر ایشیمده قربتاً لله نیّت ایلرم
دشمنیم یا مرحب اولسون یا که عمرو عبدود
دشمنیمله راه انصافی رعایت ایلرم
مسکنیم غار اولسا یا خار مغیلان بستریم
بیر کسه ظلم ائتمرم خلقه محبت ایلرم
یاعلی سسلنسه هرکس من بلی وئرّم جواب
مشگله دوشسه اگر شیعم اعانت ایلرم
جان وئرن وقتینده گلّم شیعه مین فریادینه
یا غریب اولسا مریض اولسا عیادت ایلرم
مؤمن اولسون یا منافق جان وئرن هنگامیده
حاضر اولّام باشینون اوسته زیارت ایلرم
اَشهَدُ اَنَّ عَلیّاً حُجّة الله قائلین
قویمارام یانسین قیامتده شفاعت ایلرم
دل ملولم اولموشام یرمی بش ایل خانه نشین
یوخسا عام المنفعه اعماله سبقت ایلرم
آدینی مؤمن قویانلار قتلیمه آماده دی
من منافقدن قیامتده شکایت ایلرم
نیلمیشدیم اود ووروب درگاهیمی یاندیردیلار
دوگدولر ناموسیمی احساس خفّت ایلرم
قول سینیق پهلو شکسته قبره گئتدی فاطمه
حضرت خیرالبشردن شرم و خجلت ایلرم
زور بازو قدرتیمدن استفاده ائتمدیم
سلمم اؤز معبودیمه جلب رضایت ایلرم
ووردیلار زهرا یوزوندن سیلی دؤزدوم دینمدیم
دینون استقلالینه هر ظلمه طاقت ایلرم
وئرسه وجدانیم اجازه ضدّ ایمان اولماسا
حیله و مکریمده من دنیاده شهرت ایلرم
مکر و حیله یا خیانت ننگدور انسانلارا
کینه و ظلم و جنایتدن برائت ایلرم
بعضی روحانی نمالردن ابوموسی کیمی
حشر بازارینده دعویّ خسارت ایلرم
قوخماسام قهر خدادن کیفر کرداریدن
منده بیت المالی ثالث گونه غارت ایلرم
حفظ بیت المال واجبدی سران کشوره
من ولیّ مسلمین حفظ امانت ایلرم
امتیازیمدور بویانماق قانیمه محرابیده
مسجد و محرابی قانیمله عمارت ایلرم
باشیمون قانی اگر اولسا حنا سقّالیمه
سجده ده معبودیمه عرض ارادت ایلرم
کلمه ی فُزتُ بِربّ الکعبه چوخ آسان دگول
بسته دور آیات عشقه من تلاوت ایلرم
زاهدم من وئرمیشم دنیایه اوچ دفعه طلاق
بیرده دنیایه نجه من میل و رغبت ایلرم
نوش جان اولسون جهانخوارانه جام سلطنت
من نه استعماریله غصب خلافت ایلرم
بو خلافت منصبین الله منه اعطا ائدوب
امته مِن جانب الله من امامت ایلرم
زندگی نامم منیم یکسر کتاب نوحه دی
شرح ائدم هر لحظه سین ذکر مصیبت ایلرم
زنده بادا آل هاشم مرگ بر سفیانیان
من همیشه خائن قرآنه لعنت ایلرم
من«کریمی»جام عشق مرتضادن سرخوشام
گونده بش دفعه اونا تجدید بیعت ایلرم
یازدیقیم بو قطعه شعره گر آقام وئرسه صله
«هاشمی» وادار ائدوبدی اونلا قسمت ایلرم
- پنج شنبه
- 2
- اسفند
- 1397
- ساعت
- 12:7
- نوشته شده توسط
- ابوالفضل عابدی پور
ارسال دیدگاه