• پنج شنبه 9 فروردین 03


متن شعر ترکی مدح حضرت امیرالمومنین علیه السلام -(ای جلوه بخش آینه ی هَل اَتی علی)

727
1

ای جلوه بخش آینه ی هَل اَتی علی
منصوص نصّ بیّنه ی اِنَّما علی

قوت روان نفوس عوالمده صورتاً
معناده روح پیکره ی ماسوا علی

مهره فروغ ویرمسه گر ماه طلعتون
اولماز تاپا سپیده نی لیلُ الدُّجا علی

خلد برین تبسّم لعلوندن اخذ ایدوب
مین لرله لطف و بهجت و ذوق و صفا علی

خورشید و مه هوای حریمون هواسینه
روشن ایدلّه عالمی صبح و مسا علی

تاپدی فروغ لم یزلی تا جمالوین
درک ایتدی فیض نورونی بیت خدا علی

تا اُپدی پای عرش مسیرون خرامده
مسجود اولوب فلک لره امُّ القری علی

ایلر حدیث قامت طوبی مثالیوی
نجوا ایدنده سرویله باد صبا علی

تفهیم اولوب ملک لره قدر فتوّتون
جبریل، لافتانی ایدنده ندا علی

گر گوش جان اولا بُله اسراره آشنا
ذرّات کوندن ایشیدر بانگ یا علی

غرّا جبینون آینه گردانی اولماقا
تزیین ایدر جمالینی شمسُ الضُّحی علی

تا عالمی منوّر ایده اولدی جلوه گر
حول حرمده لمعه ی نور هدا علی

اقطار کونی چولقادی انوار وحدته
آئینه ی جمال جمیل خدا علی

معنای عدل سنله اولوب زاده توأمان
حق سنله تاپدی کونده نشو و نما علی

سعی و تلاشیویله اولوب روزگاریده
احیا مکاتب و سنن انبیا علی

گر ایتمسِیدی جلوه جمالون هر آینه
اولمازدی روشن آینه ی حق نما علی

علّت علوّ مرتبتوندور که بیر گروه
اولموب ایده امامتیوه اکتفا علی

عنوان بوترابیله تا تاپدون افتخار
معناده اولدی رشک ثریّا ثری علی

باش سجدیه قویاندا مصلّای عشقیده
ایلوب سنه حقیقت دین اقتدا علی

ویردون صفا صحیفه ی اخلاصه اشکیله
بو آینه سنیله تاپوب انجلا علی

سنسن او که مراحل تنزیل و وحی ده
اظهار ایدوب نبی که تَری ما اَری علی

اولماز دچار لغزش و زَلّت مسیرده
هر کیم ایده ولایتیوه اتّکا علی

آلموش گل سپیده دموندن شمیم خلد
انفاس صبحگاه اولوب مشکسا علی

ماه و ستاره راز و نیازونله آشنا
صحرا و دشت ناله ویله هم نوا علی

بطحاده نخله لر سنله آشنای راز
یثربده هر مکان سنه یار دعا علی

کوفه هنوز محودی بانگ اذانیوه
حفظ ایلیوب بو نغمه نی موج فضا علی

گوردی سیاهی شب مُظلِم وضوحله
ظلمات چاه دور سنله آشنا علی

گر قعر چاه دل آچا پردرد نای له
نی تک ایدر جهان هامی داد و نوا علی

بیر شمّه درد سینه گدازون عیان اولا
سوز غمه یانار دل ارض و سما علی

داغ دلوندن آلدی شرر یاندی لاله لر
دشت حجاز شعله اولوب جابجا علی

یاندون نجه که شمع یانار اشک و آهیله
بو خاکدان مگر تاپا نور و سَنا علی

سن نور محض سن ولی اولموب بصیرتی
بو تیره خاکون آلماقا سندن ضیا علی

دنیا هامی جلالیله اقبال ایدوب سنه
بیر ذرّه لیک ایلمدون اعتنا علی

پوسیده استخوانه مثلدور بلی جهان
سن اوج قاف همّته همچون هما علی

بُلدون اسیر دام هوای جهان اولان
ممکن دگول بو دامدن اولسون رها علی

آتدون ولیک مین الیله دوتدی اوزگه لر
تا برق جهل گوزلره اولدی غِشا علی

سن پایمال ایتدیقوا سجده ایتدیلر
بیر عدّه پایبند و اسیر هوا علی

بالّهی مست جام تمنّای نفس اولان
اولماز که حقّه طالب اولا مطلقا علی

دنیا تمنّیاتینه مفتون اولانلارا
افسانه دور عذاب و عقاب و جزا علی

سن جذبه ی عبادتی آلدون خلوصیله
دل اولدی محو جاذبه ی کبریا علی

دنیا گوزونده چهره ی منحوس اولوب سنون
بیر عدّه یه ولیک هامی مدّعا علی

درده گتوردی قلبیوی آلام جانگزا
ای بیر نگاهیله هامی درده دوا علی

بیر لحظه اولمیوب اولا آسوده خاطرون
گویا مشیّت ایتدی بیله اقتضا علی

آری بلادی لازمه ی جوهر ولا
ای سنله کونده متحقّق ولا علی

بیر کیمسه اولمیوب اولا مظلوم سن کیمی
نه ابتدا ملالیوه نه انتها علی

بیر همسرون بتولیدی طغیان دردیده
سنله انیس و هم نفس و هم صدا علی

زهرا که چلچراغ حریم عفافدی
زینت تاپاردی اونلا امامت سرا علی

قرص جوین عقیق لبوندن خجل ولی
خوان عطایه عالمه ویردون صَلا علی

توپراق سریرون اولدی اگرچه عنایتون
ویردی ترابه خاصیت کیمیا علی

جمع نفوس عالیه ارباب اقتدا
مجموع ماسوالّهه سن مقتدا علی

اسلامی زنده ایلدی خندقده ضربتون
سویلوب سنه حقیقت دین مرحبا علی

افتاده "عابدم" دوت الیمدن عنایتاً
سن شهریار کون و مکان من گدا علی

سندن سزادی مرحمت و رحمت و کرم
مندن نیاز و مسکنت و التجا علی

کیمدور تظلّم ایلیه سندنصورا فقیر
کیم غیر سن جهانیده وار ملتجا علی

مشکلده دور اصالت اسلام راستین
ای مشکلات عالمه مشکل گشا علی

دل ویردی رأفتون من درمانده شعریله
اوج کمال و شانیوی ایتدیم ثنا علی

یوخسا ندور جسارتی معیار عقلیده
دم آفتابدن وورا بُلسون سُها علی

یوخ یوخ که وار تناسبی مهرین سُهائیله
سن وجهه ی عوالم و من چون هَبا علی

عفو ایله هر قصوریمی لفظ و بیانیده
یا مظهر العجائب یا مرتضی علی

  • جمعه
  • 3
  • اسفند
  • 1397
  • ساعت
  • 15:13
  • نوشته شده توسط
  • ابوالفضل عابدی پور

برای بارگذاری فایل در سایت اکانت مداحی بسازید



ارسال دیدگاه



ورود با حساب گوگل

ورود کاربران