حکمتله بشر! من هامی دنیانی یاراتدیم ۱
لوح و قلم و کرسی و کیهانی یاراتدیم
« کُن » امر ائلدیم هر نَیَه یئتدی « فیکونه » ۲
بیر « کُن » بویوروب کونیله امکانی یاراتدیم
« فی سِتَّةِ یَومٍ » ۳ قورولوب « سَبعَ سَماوات » ۴
جنّ و ملک و آدم و حیوانی یاراتدیم
یئرده ئوزومه خلق ائلدیم شانلی خلیفه ۵
خلّاقینه احسن دئدیم انسانی یاراتدیم ۶
سجده ائده امر ائتدیم اونا کلّ ملائک ۷
افلاکیده بو حکمیله غوغانی یاراتدیم
ابلیس اِبا ایلدی قوودوم او رجیمی ۸
انسان دئمه چون مظهر سبحانی یاراتدیم
بیرعدّه ملکلر سوروشوبلار بو سؤالی
علت ندی« مَن یُفسِدُفیها » نی یاراتدیم ۹
چکدیم او زمان پردهٔ اسراری کناره
تا غلغلۀ « عَلَّمَ الاَسما » نی یاراتدیم ۱۰
آخر دئدیم ای فوج ملائک خبروز وار؟
من نسل بشرده نه احبّانی یاراتدیم ۱۱
اوندا که اثر هئچ یوخودی کون و مکاندان
مین دوره قاباقراق کی بو دورانی یاراتدیم
یئر گوی یوخودی،جنّ و ملکدن یوخودی آد
اوندان نچه مین ایل سورا اکوانی یاراتدیم
بیر سؤز دئیورم حجتیمی ایلورم اتمام
بو سؤزده ره حلّ معمانی یاراتدیم
خلق ایلمیشم گر چه رسولان معظم
او عده یه عزّ و شرف و شانی یاراتدیم
نه فخر ائدورم آدمه امّا نه خلیله
نه فخر ائدورم موسی و عیسانی یاراتدیم
نه یونس و داوود و نه یحیی نه سلیمان
نه فخر ائدورم یوسف کنعانی یاراتدیم
اؤز نوریمی بیر چهره ده ائتدیم متجلّی
سلطان سُبُل، ختم رسولانی یاراتدیم
یئرده منه مظهردی بیلون احمد محمود
مرآت خدا سید بطحانی یاراتدیم
افلاکی اونون شوقینه خلق ایلمیشم من ۱۲
طاهایه گؤره یکسره دنیانی یاراتدیم
دنیا هاموسی بیر یانادی بیر یانا طاها
اؤز جلوهٔ جانانه مه طاهانی یاراتدیم
تک قالماقینی سئومدیم عالمده او شاهین
فوراً علی عالی اعلانی یاراتدیم ۱۳
دنیانه گتیررم من علینی اؤز ائویمده
یعنی کی بیلون قبلهٔ ایمانی یاراتدیم
هر چند اولارا عاشقم اما ایکی سینده
عاشق ائلدیم دلبر والانی یاراتدیم
طاهانی نه من خلق ائلیردیم نه علینی
ائتدیم ولی خلق اوندا کی زهرانی یاراتدیم ۱۴
بو ایکّی گؤزل خلقته علّتدیلر اما
علت اولارا خیرة نسوانی یاراتدیم
زهرا و علی نوریلرین بیر بیره قاتدیم
اونلاردان ایکی نو گل زیبانی یاراتدیم
چونکی قاریشوب بیربیرینه غیرت و عصمت ۱۵
جوشدی کرمیم« لؤلؤ و مرجانی » یاراتدیم ۱۶
حُسنی حَسنون گلمزیدی وصفه جهاندا
نوریندن اونون روضهٔ رضوانی یاراتدیم
اما نه حسین خلقتیم اولسون اونا قربان
اؤزعشقیمه معنا او دل آرانی یاراتدیم
بو آدلاری هر کیم ائشیدیب سجدیه دوشدی ۱۷
چون بیلدیله انوار تولّانی یاراتدیم
هر قلبیده یوخدی بولارین حبّ و رضاسی
عقباده اونا دوزخ و نیرانی یاراتدیم
بو بِش نفرین فاطمه دی محورعشقی ۱۸
جان بونلارا صدیقهٔ کبرانی یاراتدیم
زهراییله ائتدیم بولاری عالمه تعریف
منشور اب و بعل و بنوهانی یاراتدیم ۱۹
ــــــــــــــــــــــــــــــــــــــ
(1) - وهوالذی خلق السموات والارض... (انعام،آیه ۷۳)
(2) - انماقَولُنالشیٍ اذا اردناه ان تقول له کن فیکون (نحل،آیه ۴۰)
(3) - الله الذی خلق السموات والارض... (سجده،آیه۴)
(4) - هوالذی خلق لکم مافی الارض جمیعا... (بقره،آیه۲۹)
(5) - و اذ قال ربک للملائکه انی جاعلٌ... (بقره،آیه۳۰)
(6) - فتبارک الله احسن الخالقین (مومنون،آیه۱۴)
(7) - و اذ قلنا للملائکه اسجدوا لآدم (بقره،آیه۳۴)
(8) - فسجدوا الاابلیس ابی واستکبر (بقره،آیه۳۴)
(9) - قالواتجعل فیهامن یفسدفیها... (بقره،آیه۳۰)
(10) - وعلَّم آدم الاسما کلها (بقره،آیه۳۱)
(11) - قال انی اعلم مالاتعلمون (بقره،همان)
(12) - لولاک لماخلقت الافلاک
(13) - لولاعلی لماخلقتک
(14) - لولافاطمه لماخلقتکما
(15) - مرج البحرین یلتقیان (الرحمان،آیه۱۹)
(16) - یخرج منهمااللؤلؤ و المرجان (الرحمان،آیه۲۲)
(17) - ثم عرضهم علی الملائکه (بقره،آیه۳۱)
(18) - یاملائکتی ویاسکان سمواتی... ( مفاتیح الجنان،حدیث شریف کسا )
(19) - هُم فاطمة و ابوها و بعلها و بنوها ( همان )
ـــــــــــــــ
روز چهارشنبه 17 مرداد 97 ، برابر با 25 ذی القعده ، روز دحوالارض میباشد.
- جمعه
- 3
- اسفند
- 1397
- ساعت
- 15:57
- نوشته شده توسط
- ابوالفضل عابدی پور
- شاعر:
-
علیرضا حضرتی (ناعمی)
ارسال دیدگاه