بو گئجه وجده گرکدور هامی دنیا گلسون
ایستیور یر یوزینه زهرۀ زهرا گلسون
گُل و گُلزار جهان خرّم و خندان اولسون
چمن خلقته ایستر چمن آرا گلسون
آچیلور نرگس شهلا بو چمنزار ایچره
شوره هر بلبل آشفته و شیوا گلسون
باغ و بستان رسالت اولاجاق عطر آگین
بو گلستانه گرک دلبر زیبا گلسون
یازورام اصل سوزی گلشن و گلدن گئچدیم
امر اولوب عالمه انسیۀ حورا گلسون
سببِ خلقت افلاکه سببدور زهرا
بو گئجه شوره گرک عالم بالا گلسون
تهنیت وئرمگه بو خوش خبری طاهایه
یری وار یر یوزینه آدم و حوّا گلسون
گوزلروز آیدین اولا تاپدی تولّد زهرا
سویلیرکن بو سوزی حضرت موسی گلسون
شرف آرتردی بیزه والدۀ اون بیر امام
مادر فاطمیه خلعت دیبا گلسون
ملکوت اهلی هامی تاج شرافت قویسون
عرشیدن فرشه کیمین زینته یکجا گلسون
بانوان قُرَشی بیلمدی زهرا قدرین
امر اولوب خدمتینه مریم و سارا گلسون
باب رحمت آچیلوب خلق جهان شاد اولسون
هر کیم ایستر ائده حقدن نه تمنّا گلسون
مفخر پنج تن آل عبا زهرادور
آدلانان وقتیده اول نام دل آرا گلسون
اشرف ما خلقه مژده وئروب جبرائیل
الینه بوسه وورا سرور بطحا گلسون
آسمانِ شرف و عصمته پارلاق اولدوز
که مُقرّردی ائده یرده تجلّی گلسون
ساقی کوثره دنیاده یوخیدی هم کفّو
وقت اولوب حیدره بیر همسر و همتا گلسون
ایکی دریای کرامت قاریشا بیر بیرینه
تا ایکی گوهر رخشنده و زیبا گلسون
ئوزی دنیایه گلن وقته گلوبدور مریم
وضع حملینده گرک یثربه «لعیا» گلسون
سیر ائدوب چرخ زمان گلدی درخشان ایّام
وقت اولوب عالمه بیر مرد توانا گلسون
بئله ارزنده برازنده اولان مادردن
صبری حیرتده قویان زینب کبری گلسون
گلدی زینب آدی گوز کاسه سی لبریز اولدی
حقّی وار حشره کیمی رقّته دنیا گلسون
مکتب فاطمه دن درس شهامت آلدی
منتظر قالدی خانم مقتله تنها گلسون
اولدی عاشور محرم کسیلوب قربانلار
آز قالوب یر یوزینه گنبد خضرا گلسون
اللری باشدا قاچوب قتلگهه سرعتیلن
دئدی بس هاردادی بو مقتله زهرا گلسون
«فکرینون» دردینه درمان ایله سن یا زهرا
اوغلوون نوکری قلبینده تمنّا گلسون
- سه شنبه
- 7
- اسفند
- 1397
- ساعت
- 20:13
- نوشته شده توسط
- ابوالفضل عابدی پور
- شاعر:
-
مرحوم خالق فکری
ارسال دیدگاه