کیمدی زهرا مدحی سیغماز عالمین قاموسینه
جان عالملر فدا پیغمبرین مأنوسینه
اشتیاقیلن گلردی فاطمه دست بوسینه
یعنی هر دردین دواسی من ، اوپن اللر ددی
تا جهان وار حضرت زهرا آدی دللرددی
کیمدی زهرا نور رخساری جهاندا مُنجلی
اون بیر عیسی نون آناسی دختر ختم نبی
عشقه معنا فاطمیدی ، غیرته معنا علی
عشقی تفسیر ایلین قدرتده زهرا نینکیدی
هر نه الله خلق ائدوب خلقتتده زهرا نینکیدی
کیمدی زهرا درگهوندن فیض آلوب قدوسیان
آستانینده اولوب خیل ملائک پاسبان
درس ایثار اور گشوبدی مکتبیندن عاشقان
دینه قان بذل ایلین انصار ، زهرا نینکیدی
مرحبی آتدان سالان سردار ، زهرانینکیدی
کیمدی زهرا ناری ابراهیمه گلزار ایلین
حضرت موسایه دریا موجین هموار ایلین
قدرت حق لن آنا بطنینده گفتار ایلین
بحر زهرانینکیدی، گلزار زهرانینکیدی
عالمی روشن ایدن انوار زهرانینکیدی
کیمدی زهرا بذل و بخششده هانی همپایه سی
مریم وسارا چکر منّت اولا همسایه سی
شکر اولا ایرانیلار باشیندا واردی سایه سی
ملت ایراندا کی عزتده ، زهرانینکیدی
داعشی محو ایلیلن همتده ، زهرانینکیدی
کیمدی زهرا شیر پاکی زینبی شیر ایلین
اهلبیتین دشمنین خوار وزمین گیر ایلین
گوشه ی چشمی قرا تپراقی اِکسیر ایلین
مُرده نی ِاحیا ائدن امکاندا زهرانینکیدی
سوره ی کوثرده کی عنواندا ، زهرا نیکیدی
کیمدی زهرا قدرتی مافوق تحلیل بشر
فاطمه آدی گلنده شیعه لر فلبی اَسَر
سسله یازهرا بو آد ، وهابیتین نسلین کَسَر
بنده یازهرا دئیر ، جُنبنده یا زهرا دئیر
دشمنین قلبین سُوکن رزمنده یا زهرا دئیر
کیمدی زهرا آستانیندن اوپوپ ام البنین
طوی لباسیله قویوب یوز تپراقا تازه گَلین
باخدی دیوار و دره آغلار گوزیله دل غمین
عرض ائدوب من بیر کنیزم ، خانه ، زهرا نینکیدی
باغبانم دورت گُله ، گُلخانه زهرانینکیدی
کیمدی زهرا اولین جان بر کف کوی ولا
در ره دین و ولایت جانینی ائتدی فدا
درگهی اوت دوتدی یاندی قلب پاک مرتضی
پشت درده قوزانان افغاندا ، زهرانینکیدی
سینه سین مسمار ائدن القاندا زهرا نینکیدی
یاندی قلبیم ای قلم اوتان دانیشما گیچ سوزی
گلسه مهدی بو یانقلی روضه نی باشلار ئوزی
حضرت زهرا غمینده ایندیده آغلار گوزی
سسلنر ای ظلم اوتوندا سینه سی سوزان آنا
قدری مجهول ، قبری پنهان ، من سنه قربان آنا
ای آتاسیندان صورا ماتم لباسین سویمو یان
آی آتام مظلوم علینی عرصه ده تک قویمویان
کربلا شاهی حسیندن ، زینبیندن دویمویان
زینب عممّ ایندیده امدادینه سسلیر سنی
شامیده قبری خطرده دادینه سسلیر سنی
آغلا زهرایه گوزوم عمرونده خوش گون گورمدی
بیر دویونجا زینبین نازیله زلفون هورمدی
بعد پیغمبر ئوزی دنیاده غمدن گولمدی
شمع تک یاندی وجودی قلبینی غم داغلادی
چوخ گیجه صبحه کیمی اشگین عذاره باغلادی
الغرض زهرانی دلدن سالدی مسمار یاره سی
گیتدی دنیادن یارالی باشدا طاها قاره سی
مرتضی گوز یاشی توکدی اولمادی بیر چاره سی
یوز یوزه قویدی چکوب بیر آه سوزان آغلادی
آچدی باشینن قراسین گوزلرینی باغلادی
سسلدی زهرا علینین الدن آلدین قدرتین
فرقتین سیندیردی ایندی مرتضانین قامتین
ئولدورر زهرا منی والله بو نیلی صورتین
وای منه زهرا اورکده سوزلرین گیزلین قالوب
ایندی بیلدیم غصه و غم لر سنی دلدن سالوب
الله الله شاهد اول زهرانی مندن آلدیلار
یادگار حضرت طاها نی مندن آلدیلار
ئوز اویمده یاریمی باخ گور نه حاله سالدیلار
(ماه پرور) سسله زهرانی اورکدن داده گل
درگه زهرایه دائم ساده و افتاده گل
- چهارشنبه
- 8
- اسفند
- 1397
- ساعت
- 20:11
- نوشته شده توسط
- ابوالفضل عابدی پور
- شاعر:
-
رضا ماه پری زنجانی
ارسال دیدگاه