ساقیا دولدور پیاله ویرایچوم ماء معین
جسم و فکریمدن اوزاق گزسون او ابلیس لعین
تا نفس باقیدی صهبائی پیاله ویرمدام
ایله احسان لا یُضیعُ الله اَجرالمُحسنین
نشئیه می عاشقانه چون ویرر صبر جمیل
صابرم من چون که وَاللهُ یُحبُ الصّابرین
الامان ساقی درِمیخانه باغلی قالماسون
صف چکوب میخواره لرهم یساروهم یمین
جام می ویرمی پرستانه دیوم من آشکار
بو همان جنّات عَدنوز فَادخُلوها خالدین
باده نوشانی ملامت ایتمسین زاهد گرک
آختارورمسجدّه او میخانه ده من راه دین
اوز وصالین آختارور منده وصال یاریمی
هرکسین بیرقسمتی واللهُ خَیرالرّازقین
مسجدیم میخانه محرابیم ایکی ابروی یار
قبله دورلوح جبین و یار بینُ الحاجبین
اسم معشوقیله آلّام آب میدن دستماز
گونده اون دفعه نگاره سویلرم من نستعین
قاسم الرّرزاق ایدوب قسمت اولام من می پرست
بنده لیق توفیقی منده شکر ربّ العالمین
ویراومیدن ساقیاجرأت ویرولسون خاممه
ایستوری طبعیم ایده مدح امیرالمؤمنین
ویر اومیدن مرغ طبعیم پرآچا شاهین وار
مدحیمه احسن دیسون هم حاضرین هم غائبین
خلقتین سرّ سرشتی قرآنا ناموس علی
ما سِوا کُلاّ طُفیلون اوّلین و آخرین
باء بسم اللهَه نقطه قل هواللهَه مثل
ایلیوب خلقتده غوغا ایزد جان آفرین
محورخلقتده اصل و نور حق لم یزل
ایلیین تکمیل دین و مصطفایه جانشین
صفحۀ رویون اولوب آیینیۀ قدرت نما
ظاهر و باهردی سندن پرتو دین مبین
سن دلیل ممکنات و سن امیرکاینات
مقتدای هر دو عالم لنگر عرش برین
نسل انسانه معلم ناشر قرآن و دین
چون ملقبسن ولی الله هه یا حبل المتین
اولماسیدون اولمازیدی یریوزنده ممکنات
سن جواز خلق دنیا دست قدرتده نگین
استوار اولدی دم شمشیریوه احکام دین
صفدر و دشمن شکن سن امیر امجدین
طعمۀ تیغونله مرحب تاپدی تا راه سقر
یکّه تاز هر غزا سن فاتح بدر و حنین
لات و عزّی سرنگون و باب خیبر چون خراب
اولموسان عامل بو امره سن امام العارفین
کشورعلمیدی احمدسن اوکشورایچره باب
جنّ و انسه رهنما سن شیعییه حصن حصین
سن امیرالمؤمنین سن ملک علمه آفتاب
کل موجوده وجودون اولدی دنیاده مُعین
یا علی ای مظهرذات خداوند و دود
سن نمازاوستونده ویردون سائله انگشترین
مکتبونده پرورش تاپدی حسین و هم حسن
معرض اجرایه قویدی هررموزاتی حسین
درس آلوب عباس نام آورسنون تک شیریدن
قارداشا ایتسون حمایت دینه ویردی اللرین
«عدلی» مدح حیدرین بحرینده لنگرسال دِنَه
عاصیم یوخ حشره توشه ای ولی مسلمین
من هارا مداحی شاهنشه دوران هارا
وصف اوصافین ایدنموب کل وصف الواصفین
- جمعه
- 10
- اسفند
- 1397
- ساعت
- 18:3
- نوشته شده توسط
- ابوالفضل عابدی پور
- شاعر:
-
حاج اصغر فرشچی
ارسال دیدگاه