کعبه دورینده گزور مادر حیدر بو گئجه
گتوروب مثل صدف کعبیه گوهر بو گئجه
مکه مبهوت باخور گویده عجب منظره وار
کعبیه ساری آچوب فوج ملک پر بو گئجه
کعبه نوریله دولوب ماه چخوب سیره مگر ؟
یا غروب ایلمیوب مِهر منور بو گئجه
گورمیوب عالم خلقت بئله بیر منظره نی
اولدی بیر معجزه ی غیر مکرر بو گئجه
سس گلوب وارد اول ای فاطمه ی بنت اسد
گوزلیور مقدمیوی خانه ی داور بو گئجه
گل قدمگاهون ائله بوسه گهِ رُکن و حَجَر
تا قویا مقدموه فوج ملک سر بو گئجه
عرض ائدیب دوندرن ای لیل سیاهی سحره
لطفووی فاطمیه ایله مُیَسَّر بو گئجه
مقصده تا که سلامت یتوروم گوهریمی
چون امانتدی منه عالمه محور بو گئجه
گوردی تاریخ بشر گورمدیگی واقعه نی
اولدی مهمان خدا ماهیله اختر بو گئجه
سندی دیوار حرم دعوت اولوب مام علی
خلقته جلوه وئروب عالمه سرور بو گئجه
صدف بحر شرف گوهرینی قویدی یره
یعنی دنیایه گلوب ساقی کوثر بو گئجه
گلدی دیوار آدی یارب شب میلاد علی
یادیمه دوشدی منیم دخت پیمبر بو گئجه
بیر سوال اولدی تداعی منه بو سوزده ولی
بو سؤال ایلدی یارب گوزیمی تر بو گئجه
سیندی دیوار حرم تا که علینون آناسی
غصه دن راحت اولا، اولمیا مضطر بو گئجه
پس ندن سینمادی دیواریله در فاطمیه؟
سالدی بو غصه منیم قلبیمه آذر بو گئجه
یازارام نیلدی دیواریله در فاطمیه
طایر طبعیمه وئردی ئوزی شهپر بو گئجه
بو همان فاطمه دی ئوپدی پیمبر الینی
ئوپرم پاک آدینی منده مکرر بو گئجه
خلق اولوبدور بو جهان حضرت زهرایه گوره
ائتمیشم علت اودور آدینی ازبر بو گئجه
بیلمورم سرّی ندور فاطمه تا یازدی قلم
لبلریم گوردوم اوخور سوره کوثر بو گئجه
شرح ائدیم مطلبی تا روشن اولا اهل دله
بلکه محفل تاپا بیر جلوه ی دیگر بو گئجه
سالدی بیر حاله گُلِ خلقتی دیواریله در
شرحینه الده قلم آغلادی جوهر بو گئجه
سؤزی پوشیده یازیم دوشدی فشاره بدنی
یازمشام رمزیله تا شعر اولا بهتر بو گئجه
چونکه راضیه رضا اولدی ئوله گلدی اجل
دئدی آخر گئجه دی ای گُلِ پرپر بو گئجه
سویلدی گل ئولورم واردی سؤزوم دیلده علی
منتظردور گوره زهرانی پیمبر بو گئجه
گل عم اوغلی ئولورم فاطمه نی ایله حلال
آیریلیق سختیدی اما ائله باور بو گئجه
غسل وئر کوینگین اوستن بو غریبِ وطنه
حاضر ائت زینبیمه بیر قره معجر بو گئجه
یومدی زهرا گوزینی شیر خدا گلدی دیله
راحت اولدون دئدی ای حیدره یاور بو گئجه
یازدی « داور » بو سؤزی حضرت زهرا آدینا
صله سین وئردی یازوب آدینی نوکر بو گئجه
- جمعه
- 10
- اسفند
- 1397
- ساعت
- 18:34
- نوشته شده توسط
- ابوالفضل عابدی پور
- شاعر:
-
حاج داود بیدق داری
ارسال دیدگاه