آلله آدیلا باشلانان ایش پایدار اولار
چون لطف کردگار او ایشه اعتبار اولار
امر ایلسه خزانه، دونوب نوبهار اولار
خلق ایلیوبدی کُن فیَکونیله هر زادی
خوشدور سوزه طلیعه ائدم اُول گوزل آدی
ای دل! صبور و صابر و صبّاردور خدا
قدر و قدیر و قادر و قهّاردور خدا
حیّ و حکیم و حاکم و داداردور خدا
هر نه او مصلحت بیله تسلیم اولاق گرَک
عبرت بگیرِ مجلس ترحیم اولاق گرَک
یاز ای قلم! که حُرمته معنادی تسلیت
غم دفترینده کلمه‌ی زیبادی تسلیت
آرام‌بخش قلب مُعزّادی تسلیت
بیزلر وظیفه فرض ائدوب احساسه گلمیشوق
بیر تسلیت دئماخلیقا بو یاسه گلمیشوق
چوخ یاخشی رسمدور گلیسوز مجلس غمه
تا عرض تعزیت ائده‌سوز اهل ماتمه
ایندی گلون منیله ائدون سیزده زمزمه
یارب! مصیبت اهلینه "صبر جمیل" وئر
روز جزاده بونلارا "اجر جزیل" وئر
ای عاشقان! گوروم اورَگوز اولماسین ملول
با معرفت اولان ائلییر حق سوزی قبول
فرمایش ایلیوب بو سوزی حضرت رسول
سعی ایلیون ئولن‌لری یاددان چیخاتمیون
بو دهریدن گئدن‌لری یاددان چیخاتمیون
یارب! گوروم که گلمه‌سین هئچ باشه آیریلیق
چون که گلنده گلموری دای باشه آیریلیق
جان شیشه‌سین همیشه چالار داشه آیریلیق
آغلار دوشنده آیریلیقا یولداشی ئولن
اوغلی ئولن، آتاسی ئولن، قارداشی ئولن
گل ای قلم! گریز گتور بو زمینیه
غملی سوزون شراره سالار غملی سینیه
گویلوم چوخ ایستیور گئده شهر مدینیه
ام البنینون آغلاماقی یادیمه دوشوب
عبّاسین او یتیم اوشاقی یادیمه دوشوب
قلبین شرار آهیله داغلاردی اُول ننه
اشک دلین عذارینه باغلاردی اُول ننه
ائوده، ائشیکده اوغلونا آغلاردی اُول ننه
عبداللها باخاندا او دریای عزّ و جاه
یاده سالاردی قولسوز ابالفضلی آه آه
هردن دییردی: یادیوه بو باغریقانی سال
گل گل دوزنمورم بالا! دائم یانیمدا قال
بایرامدی گل یتیم بالاوا تازه کوینَک آل
تای توشلارین گورنده اورَک داغلیار یتیم
هر بیر زادی بهانه ائدر آغلیار یتیم
گاهی دوتور یوزون منه سویلور که: ای آنا
سن تک آنا دیینده، اونا سسلورم: جانا
آغلور دیور بابام هانی؟ قلبیم دونور قانا
غم گوندوزون فراقیله آخشام ائدنمورم
سن گل اوزون، من اوغلوی آرام ائدنمورم
غم یولداشی بو رسم دی یولداشی گوزلییر
دل داغلاناندا گوز اوزی گوزیاشی گوزلییر
بایرام اولاندا هر باجی قارداشی گوزلییر
خوشدور که باغبان چمنه تسلیت دییه
زینب باجون گلوبدی منه تسلیت دییه
سن‌سیز دولوبدی قلبیمه درد و ملال اوغول
آغلار کئچور گئجه گونوزوم ماه و سال اوغول
گل زینبیله کلثوما بایراملیق آل اوغول
ای وای اولوبدی سوزلری سن‌سیز، حسین سیز
یولدا قالوبدی گوزلری سن‌سیز، حسین سیز
یول گوزلَمَک چتیندی ائدر قامتی کمان
شیعه اودور که، نی تک ائدور ناله و فغان
گوزلر سنون یولوندادی یاصاحب‌الزمان
چشم کرمله دفتر «سیّد بشیره» باخ
بانی اولان بو شعره رحیم دبیره باخ
- دوشنبه
- 20
- اسفند
- 1397
- ساعت
- 16:7
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه