سالار شهیدان ائدوب آماده قطاری
یثربده گجه عازم اولا مکیّه ساری
صغری بوش اطاقدا اوزونی قالمالی بیلدی
گفتاره گله اشگینی رخساریده سیلدی
عرض ائتدی بابا قویما فراقوزده یانوم من
آخشام چاقیلار گوزلری یولدا دایانوم من
سایونده سنون ایستیورم دالدالانوم من
احوالیمه باخ چک الیوی باشیمه گئتمه
ناخوش قیزوام رحم ائله گوزیاشیمه گئتمه
گئتسونده اگر قوش منی نسوان عزیزه
البته نیازوز اولاجاق یولدا کنیزه
خدمتچی گئدوم یوسف زیبای حَجیزه
کاکلّرینه قونسا اگر توز یووارام من
حتی باشینون اوسته گجه سو قویارام من
گر قالمالیام اکبر زیبانی آپارما
بیز هاشمیه ماه درخشانی آپارما
قالسین منیله فاطمهٔ ثانی آپارما
گل یوزلی باجیم نازلی رقیه قالا خوشدی
ائومیزده علی اصغره لایلای چالا خوشدی
حضرت دئدی صغری،علی اکبر قالا بیلمز
اسپهر وفایه مه انور قالا بیلمز
عمّونده گئدور ائوده مکدّر قالا بیلمز
پژمرده ائدوب روحیمیزی آل امیّه
لایلای چالاجاق اصغره یوللاردا رقیه
بیز آل عبا خوش بیلروک ذکر و دعانی
توکمه سفرا و ستونده یوزه اشگ روانی
قال ایله دعا قافله ی کرب و بلانی
قیزلاری ستاره سیاقی ماهوه تاپشور
آزاده مسافرلری اللهوه تاپشور
ترک ائتدی ائوی فاطمه نون نور دوعینی
پوزمشدی فراقین غمی رخسار حسینی
اوپدی او گجه قبر رسول الثقلینی
عرض ائتدی بابا غصه لیم صحبته گلدیم
جان اوسته منی درک ائده سن دعوته گلدیم
لعنت او معاویهٔ می شوم و پلیده
ئولدی یتیشوب سلطنتی اوغلی یزیده
بیرنامه یازوب شامیده گوندردی ولیده
مجلسده یوزون دوتدی منه والیِ جانی
تأیید ائله سنده دئدی سلطان جوانی
مسجدده جوابین کی دئدیم ایلرم اعلان
قویما گئده فرزند رسولی دئدی مروان
آل بیعتی بعداً گئده بو حجت سبحان
مروانه آجیقلاندیم ائشیتدی سسی اکبر
آچدی قاپونی شیر تک عباس دلاور
مروان اورگین نعرهٔ تکبیریده سیخدی
بیر آنیده دوتدی یاخاسیندان یره یخدی
اولدورسون اونی سینه سینون اوستونه چخدی
زهرانی قسم وئردی منه دشمن نادان
مروانی دئدیم عفو ائله قوللاروه قربان
گئتدیم قاباقا عطر شه خیبری آلدیم
مین حسرتیلن قوللاریمی بوینونا سالدیم
بیر قدری اباالفضلیمیلن یوزیوزه قالدیم
لبریز اولونوب کاسهٔ مهریم یوزون اوپدوم
آغوشه چکوب حیدر اوپن صاق گوزون اوپدوم
ای ختم رسل حامی اولان آل عبایه
دور سال یولا گیزلین گئدورم کرببلایه
مستغرق اولار اهل حرم بحر بلایه
زهرا ننه می کرب و بلایه گتوررسن
معناده یولا باشین عزایه گتوررسن
قبر اوسته یوخی دوتدی شه تشنه لبانی
رؤیاده گوروب چوخ نگران خیر ورانی
دلبندینه فرمایش ائدوب دلده فغانی
اولما نگران مقصد و منظوره چاتارسان
اؤز قانوه صحرای غم افزاده باتارسان
آز قالدی سولا فاطمه نون گلشن و باغی
آز قالدی سونه کرب و معلاده چراغی
آز قالدی گوره قلبون حسینیم بالا داغی
باران کیمی رخساروه گوزیاش توکه جکسن
اعضاسینی میداندا عبایه بوکه جکسن
آز قالدی ئوله قاسم شهزاده ی زیبا
آز قالدی وئره قوللارین عباس توانا
آز قالدی گوره گؤزیاراسی ماه دل آرا
قوللارینی میدانیده یردن گوتوررسن
امکانی گر اولسا باشی اوسته گتوررسن
آز قالدی ستاره کیمی اصغرده سوزولسون
آز قالدی قوجاقونده سوسوز حلقی اوزولسون
آز قالدی قانی دوشلوگونون اوسته دوزولسون
اوخ یاره سینی کوی نگارونده اؤپرسن
قانیندن حسینیم بیر اووج عرشه سپرسن
آز قالدی دوتا خیرداجا قیزلار اتگوندن
آز قالدی دگه زهریلی پیکان اورگوندن
آز قالدی چیخا زحمتیلن اوخ کوره گوندن
قورخار بالالار باد مخالف اسیلنده
سو وئرمیه جکلر سنه باشون کسیلنده
توک گوزیاشینی صفحه ی رخساره«معزی»
دوز ویرسون حسین یازدیقون اشعاره«معزی»
مجلسده یاپیشسون سوزون حضّاره«معزی»
هر ماه محرمده اولار قاره گیللر
سر مطلع اشعاریوی یوللاردا دیه للر
- چهارشنبه
- 22
- اسفند
- 1397
- ساعت
- 15:49
- نوشته شده توسط
- ابوالفضل عابدی پور
- شاعر:
-
استاد یوسف معزی اردبیلی
ارسال دیدگاه