باغلادی قطارینی ساربان مدینه ده
کوچ ائدور گِجیله بیرکاروان مدینه ده
غملی کاروان عجب خوشنوا گئدور گِجه
شهریار کشور پُربلا گئدور گِجه
کوی یاری قصد ائدوب آشنا گئدور گِجه
شاه کربلایه یوخ بیر اَمان مدینه ده
اَهلبیتین اول گِجه یانمادی چراغلاری
باغلادی بو دَهر دون عِترته اطاقلاری
میندیروبلَه ناقیه بیر به بیر اوشاقلاری
دوشدی یولّارا گِجه خانمان مدینه ده
قالدی بیر مریضه قیز کائناتی داغلادی
بوش قالان اطاقلاری آچدی بیرده باغلادی
گوردی کاروان گئدور باخدی باخدی آغلادی
اولدی بوش اطاقلارا نوحه خوان مدینه ده
بیلموری هَله بو قیز اِئللری هارا گئدور
کربلا سُراغینه گلشن صفا گئدور
غُنچا گُل ،گُل آچمامیش صوداَمر بالا گئدور
خسته بلبل ایلدی آشیان مدینه ده
یول قَباقینه چیخوب مَعجرین آلوب اَله
عرض ائدوب بابا دایان وئر جوابیمی هَله
منله بیر دانیش گِنه جسمه تازه جان گَله
تک قالور مریضه بیر ناتوان مدینه ده
گوردی شاه کربلا فاطمه فغان ائدوب
دُرّ اَشکینی یوزه سیل تک روان ائدوب
اَل چکوبدی باشینه بو سوزی بیان ائدوب
آغلاما قیزیم بِله باغریقان مدینه ده
آز قالوب خزان اَسه صَحن باغ و گُلشنه
گئتمگیمدَه قصدیمی ایلورَم بیان سنه
جَدّیمین جوارینی غُربت اِئتدیلر منه
دیللَره دوشر آدیم بیر زمان مدینه ده
(نادرا) بَقیعه گِئت قسمت اولسا هر زمان
توز قونان مَقابیره عَرضووِی اِئله بیان
گَل رسول اَکرمین مسجدینده بیر دایان
سیل اَشکووِی یوزه اِئت روان مدینه ده
- یکشنبه
- 13
- تیر
- 1400
- ساعت
- 17:19
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه