غم دوتوبدور قلبیمی ای مهربان پروردگار
یوخدی غمخواریم فقط سنسن الهی غمگسار
آسمان عشقده بیر گون باتوبدی بو گجه
ماه پرفیض رجبدن صلب اولوبدور اختیار
یر یوزونده گرچه وار گلزار و گلشندن اثر
لیک اثر یوخدور صفادن کیم بصیرتلن باخار
شیعه لر محزوندی محنت حاکم اولموش دللره
بیر بهانه ایستوری هرکس ایده اشگین نثار
آغلاماق تسکین اولار غمدیده اشخاصه ولی
غم بویوک بیر غمدی باور ایلمه تسکین اولار
حضرت هادی جهانی ترک ایدوبدور دردناک
گئتدی الدن رهبر معصوم عبد کردگار
عرض ایده بیلّم آچوب باشین سماده جبرئیل
وا علیّا سسلنور یکسر ملک لر بی شمار
او جوان ئولموش آتاسی سسلنور ایوای بالا
کاظمینون تُپراقندان عرشه ناله قوزانار
یرمی بش یاشیندا ئودوردی آتاسین اشقیا
بو بنی عبّاس الیندن اهل ایمان اولدی زار
یرمی ایل تحت نظر قالدی او غربتده آقا
محضریندن کسب فیض ایلردی هر خرد و کبار
آخرُالامر ایلدی مُعتَزّ او سالاری شهید
بو مصیبتدن باتوب یاسه جهان کجمدار
کربلا و کاظمینه سایه سالدی رنج و غم
چهرۀ اسلام گوردی غصّه و غمدن غبار
صلب طاقت شیعه لردن ایلدی هجر امام
اولدی حکّام بنی عباس شاد و کامکار
سینه سین چاک ایلدی اوغلی حسن ایلوب فغان
صبر سرحدّین گوروبلر گاه مولا سندیرار
بیر اوجادان سسلنور ای وای بابام مظلوم بابا
سنسیز عالمده منیمده گلشن عمروم صولار
واریری عرض ایلیاخ ای حجت روی زمین
صبر ایدنمورسن آتا هجراننه قلبون یانار
آلمیش اطرافون ولی آغلار گوزیله شیعه لر
دشمن اول جمعیّتی گورجک اوزون ایلور ستار
جرأتی یوخ بیر نفر ایتسون اهانت حضرته
چوخ جلالیلن قازیلدی حجت الله مزار
غسل وکفن ودفنی اعزازیله اولدی اهلِ دل
گه وروردی باشینه گه سینه گوردی کردگار
وار یری بوردا حسین بی کفندن یاد ایداخ
گون قباقینده قالوب عریان وجودی زخمدار
اولمادی زین العبادین بیر نفر دوتسون قولون
آز قالوردی روحی اولسون جسم پاکندن کنار
گوردی زینب ایله آغلور علی بن حسین
اوز دوتوب سجّاده اوندا گلشن دینه هَزار
ایتدی فرمایش علی جان عمَّن ئولسون آغلاما
بیر کسیم یوخدی منیم سنسن حسیندن یادگار
سن بئله ناله ایدنده خردا قزلار نیلسون
گلدی گفتاره گوزی یاشلی ولیّ کردگار
ایتدی فرمایش بی بی بیر منظره پوزدی منی
ایستدیم صبر ایلیم گتدی الیمدن اختیار
بیزلری گویا مسلمان بیلموری بو شامیان
گور نه رفتار ایلور آل اللهیلن بو اهل نار
سعدین اوغلی دفن ایدور اوز لشگریندن کیم ئولوب
ویرمدی مهلت بابامی دفن ایدم بو نابکار
اوندا زینب بیر حدیث امّ ایمن باشلادی
ایلدی آرام امامی زینب عالی تبار
قتلگاهین دوره سینده گزمه «عینی فرد» چوخ
سالما طوفان جوانلار بیر بهانه آختارار
بو اشاره بسدی زینب گوردی بیر یول قارداشین
خنجر آلتدا باش آغاردی بل بوکولدی دلفکار
- پنج شنبه
- 23
- اسفند
- 1397
- ساعت
- 11:55
- نوشته شده توسط
- ابوالفضل عابدی پور
ارسال دیدگاه