• جمعه 10 فروردین 03


متن شعر ترکی احوالات حضرت امام هادی علیه السلام گریز به مجلس_یزید -(گهی بتول گوزی یاشلی کربلایه گیدر)

943

گهی بتول گوزی یاشلی کربلایه گیدر
گهی بقیعه گهی سُرّ مَن رَآیَه گیدر

امام نور هدادور خدایه آیت دور
امام قدرت قهّاره بیر علامتدور

امام اولماسا اولماز بو عالم تکوین
مدار عالم امکان وجود حجّت دور

امام اولماسا افلاک برقرار اولماز
قوام ارض و سمایه امام علّت دور

اودور خلایقه واجبدی امر و نهی امام
علی ولایتی شرط قبول طاعت دور

ولایت اولماسا اسلام فایده ویرمز
امام معرفتی افضل عبادتدور

تمام عبادت و طاعات فرض اولونسا جسد
جسد ایچینده فقط روح بیر ولایت دور

رسول اکرم ایدوب اون ایکی وصی تعیین
اولار امام امم ، پیشوای امّت دور

بو اون ایکی نفرون دوردونون علیدور آدی
او آدلار عرش خدای جلیله زینت دور

بیری بقیعیده اوز جدینون مزارینده
بریسی طوسیده گنجینه ی جلالت دور

بیری نجفده بیری سُرَّ مَن رَأده یاتوب
آلان قراریمی الدن او پاک تربتدور

پیمبره بو اونومجی وصی دور آدی علی
ابوالحسن عرب ایچره بونا کنیّت دور

آتاسینون آدی پیغمبرین آدیندان دور
نقیّ دور لقبی هادی شریعت دور

آناسینون آدی دور آسمانۀ غربی
دیه لّه ام ولد بیر حیالی عورت دور

بونون حوالی یثربدی مَسقَطُ الرَّاسی(1)
مدینه شهری بونا مسکن اقامت دور

ایکی یوز اون ایکی ایل هجرت پیمبردن(2)
گیچنده سال تولد بونا کتابت دور

قویوب جهانه قدم نصف ماه ذیحجّه
مفید مقتلی ارشادیدن روایت دور

رجب آییندا ایکیمجی و یا بشمجی گونی(3)
گلوب جهانه او گون عید ذی سعادت دور

هنوز ایلمیوب یدّی سنّینی تکمیل(4)
ئولوب آتاسی، اوزی وارث امامت دور

مدینه ده آتاسیندان صورا قالوب اون اوچ ایل
گوروب او که غم و اندوه و درد و محنت دور

مدینه حاکمی بو شاه دینه مبغضیدی
امام عصره ایدردی او که اذیّت دور

او عصریده متوکّل خلافت ایلوردی
عجبدی خلق دیموردی بو نه خلافتدور؟

بو گون امام علی النّقیدی حجّت حق
امام مفترضُ الطّاعه، کان رافتدور

امامه والی یثرب او قدر ویردی فشار
که ذکری ماوَقَعین مایه ی خجالتدور

خلیفیه شه دین نامه یازدی گوندردی
تصوّر ایله امامه نجه حقارتدور

او شان صاحبی بیر شخصه ملتجی اولدی
که ذاتی تخم زنادور خبیث فطرت دور

او کافره یتیشوب نامه ی امام مبین
گوروب رَقیمه ده مرقوم اولان شکایت دور

صلاح مملکته گوردی مقتضی گورونور
دیدی جوابی امامین فقط محبتدور

جواب یازدی که ای سیّد بنی هاشم
خلیفه مقدمیوه شائق زیارتدور

چوخ اینجیدور سنی والی اونی من عزل ایلدیم
سنی فشاره سالان مستحقّ خفّتدور

قدم عزیز ایله گل سُرَّ مَن رَآیه طرف
بغیشله گرچه بو گلماق سنه صعوبتدور

بو شهریده سنه چوخ احترام و حرمت اولور
تشرّفوز هامی عبّاسیانه منّتدور

گلوب او نامه، امام اولدی خرّم و خوشحال
دیدی مدینه دن ایمدی زمان هجرتدور

گوروب تدارکینی سُرَّ مَن رَآیه گلوب
ازلدن عترت طاها نصیبی غربتدور

جلال و عزّتیله داخل اولدی شهره امام
بولنمورم متوکّلده بو نه جراتدور

اجازه ویرمدی گلسون حضوره هادی دین
او بی حیاده بو نه بغض و نه عداوتدور

امام عصره ویروب کاروانسراده مقام(5)
نجه مقام دلیم شرحینه خجالتدور

ایدردی اوردا گدا ...
ـــــــــــــــــــــــ
(1) زیارت ناحیه مقدسه و جلاءالعیون مجلسی
(2) ارشادشیخ مفید ص60 - کشف الغمه ص 302 - تاریخ 14 معصوم ص536 جلد 2
(3) روایت ابن عباس جلاءالعیون مجلسی
(4)جلاءالعیون مجلسی
(5)جلاءالعیون مجلسی

ایدردی اوردا گدا و غریبلر مسکن
او یر امامه گور انصافیدور، مروتدور

گیچوبدی بیر نچه گون منزل ایلدی تعیین
امام نقل مکان ایتدی گوردی فرصت دور

پیمبر اوغلی او یرده ایگرمی ایل قالدی
یتیشدی قلبینه هر نه مصیبت و غمدور

بو مدّتی نه چکوب عاجزم ایدم تقریر
دیمه بو مدتی بیر گون امام راحتدور

او سروره متوکّل او قدر ظلم ایلیوب
دگول بیانه گلن جای بهت و حیرتدور

امام عصری سالوب ذلّتیله آت دوشونه
امامه ایلدی هر نوع هتک حرمتدور

گون ایسّیسینده پیاده او قدری یول گیتدی
وجودی ایتدی عرق گور نه وضع و حالتدور

اولان وجودینه بسته قوام کُن فَیَکون
گوره بو ذلّتی الحق بیوک حقارتدور

امام او کافری نفرین ایدوب هلاک اولدی
خدا یانیندا دعای امام اجابتدور

اولوب خلافته بی شرم معتمد غاصب
اونون خمیره سی شرک و نفاق و نخوت دور

بو فکریدیدی علیّ النّقینی ئولدورسون
جفا و خدعه و تلبیس او شومه عادتدور

امامی بیر گیجه جبراً گتوردی مجلسینه
او بی حیا نجه گور معدن خباثت دور

امام داخل اولوب مجلسه باخوب نه گوروب(1)
خلیفه شرب ایدوری مقصدی اهانت دور

باخون حیایه امامه تعارف ایتدی شراب
تعجّبم او لعینده بو نه جسارت دور

امام عصر بویوردی خلیفه معذورم
شراب آل رسوله خلاف عادتدور

شرابی امّتینه جدّیم ایلیوبدی حرام
شرابی هر کیم ایچه مُبغِض شریعت دور

حرامزاده حیا ایتمدی او سروردن
دیدی نه موعظه دور بو نه طرز صحبت دور

سن ایچمه من ایچرم بزم عیش و نوشیمه باخ
سرود زینت بزم سرور و عشرت دور

دایانما باشلا خوش آوازیله اوخی اشعار
ایشیتمیشم که حجاز اهلی با فصاحت دور

گوروب او حالی امامین پوزولدی احوالی
علاج یوخ داخی گوردی تقیّه سنّتدور

گلوب تکلّمه بیر نچه شعر ایدوب انشاد
او شعرلر ادبی نکته دور نصیحت دور

کلامینون بودی مضمونی ایّها السُّلطان
اوتان حیا ایله باخ گور بو نه جهالتدور

بو روزگار وفاسیزدی، کاینات ئوله جاق
نه یاتموسان گوزون آچ بو نه خواب غفلتدور

او شه لری که اوجا قصرلرده ساکنیدی
قرارگاه لری ایمدی خاک ذلّت دور

اولار که دور و برینده قویاردی مستحفظ
هاموسی قبریده بی حفظ و بی حراستدور

هانی ملوک سَلَف نولدی صاحبان خدم
گیچن گلنلره حکمت یوزیله عبرت دور

بو سوزلری ایشیدنده خلیفه هوشه گلوب
دیدی که منده بو نه دین و نه دیانتدور؟

تمام خلق ئوله جاق ایمدیکه نه عیشیدی بو
بو منزیلیمده کی، ذرّیّه ی رسالتدور

امام عصریدن اول ظالم عذرخواه اولدی
امام گوردی که فرصتدی وقت عودت دور

قِییتدی منزیلینه دل شکسته پژمرده
امامه باخ نجه گور مبتلای عسرت دور


#گریز

ایکی امام علی نام، نسل خیر الانام
گیدوبدی بزم شرابه عجب شباهت دور

بیری امام علیّ النّقیّ هادی دور
بیریده سیّد سجّادیدن عبارت دور

یزید ساخلادی سجّادی پای تختینده
دیموب امانت طاهایه بو خیانت دور

وجودی ناخوش، ئوزی بسته ی غُل جامع
علیل امامه مگر بو جفا عیادتدور

گهی شراب ایچوب، اوینیوب گهی شطرنج
گهی دیردی عجب وقت استراحت دور

اولیدی کاش بو گون بدریده ئولن اشیاخ
بو انتقام اولارین فعلینه شراکت دور

یزید مجلسینون ماجراسی قورتولماز
ایداخ تمام نظر اوزگه بیر روایتدور

آدیم « حسینی » اوزوم « سعدیِ زمانم » من
امیدیم عترت اطهاریدن شفاعت دور
ـــــــــــــــــــــــــــ
(1) مروج الذهب مسعودی

  • پنج شنبه
  • 23
  • اسفند
  • 1397
  • ساعت
  • 12:39
  • نوشته شده توسط
  • ابوالفضل عابدی پور

برای بارگذاری فایل در سایت اکانت مداحی بسازید



ارسال دیدگاه



ورود با حساب گوگل

ورود کاربران