مژده ای اهل ولا حجّت یکتا گلدی
نائب ختم رُسُل یاور طاها گلدی
شیعه لر شوره گلوب شیعیه مولا گلدی
دل عشاقه دولوبدی گئنه ده نور جلی
دیللرین ازبری هر یئرده اولوب نام علی
کور اول ای مدّعی گؤرکیمده بو عزّت واردی
بو متانت بو جلالت بو شرافت واردی
کعبه مولودی اولا کیمده لیاقت واردی
هامیدان شیرخدا صاحب رجحان اولدی
روز میلاد علی اللها مهمان اولدی
کعبه ده قویدی قدم وقریله دنیایه علی
یارادوب شأن و شرف بیت معلّایه علی
دهریده مظهر اولوب خالق یکتایه علی
طلعتینده کیم اونون نور تجلّانی گؤروب
آند اولا عزّتینه جلوۀ جانانی گؤروب
روز میلادی او شاهین سئوینر اهل ولا
مجلس جشن و طرب ایلیر هر یئرده به پا
«یا علی» شیعه دئیر تا آدی دیللرده قالا
هر کیم ایستور کی بو درگهده پسندیده اولا
سالا میلاد او حضرتده گرک جشن یولا
راوی نقل ایلوری گؤردوک بیز اوگون بنت اسد
ال آتوب کعبه نون استارینه یوخ دردینه حد
سسلوری رحم ائله ای خالق بی مثل و احد
دردمندم کرم ائت دردیمه درمان ایله
طاقتیم یوخدی داخی حملیمی آسان ایله
منقلبدی منیم احوالیم اؤزون ایله نظر
وضعیدن مریم عذراده گؤروندی چون اثر
«اُخرُجی» سسلدون ای صاحب آیات ظفر
کعبه دی قبله گه و خانۀ داوردی بورا
خوش دگول زادگه اولسون کی مطهّردی بورا
باشا چاتدی چون او مضطر خانیمون گفتاری
ناگهان تیتردی بیتین او زمان دیواری
کنج دیواریده گؤرسندی شکست آثاری
نور نوره قاریشوب یول آچیلوب بیته او دم
سس گلوب «اُدخُلی یا فاطمه» قوی بیته قدم
سنون اول بطن شریفونده کی،گوهر یارانوب
ائتمه عیساییله مقیاس کی برتر یارانوب
هر بیر عضوی بالوین اللها مظهر یارانوب
وئره جاق شأن و شرف کعبه نون هر بیر داشینا
بوردا دنیایه گتور کعبه دولانسون باشینا
ایستورم عالمی اجلالینه حیران ائلیم
اؤز ائویمده او گؤزل اوغلوی مهمان ائلیم
سربسر خلقته بو مطلبی اعلان ائلیم
بو علی کی شه لولاکین اَوَل نائبیدی
بیتیمون صاحبی دی، خلقتیمون صاحبی دی
بو بالون کی آدینا فخر هامی افلاک ائلیر
دین و قرآنه گؤره سینه سینی چاک ائلیر
لوث اصنامیدن الله ائوینی پاک ائلیر
قاف اجلال و شرفده بلی پرچم ویراجاق
کعبه نی دولدوران اصنامی علی سیندیراجاق
الغرض بنت اسد بیته حقه قویدی قدم
سورا دیوار گئنه بیربیره اولدی ملزم
قالدی حیرتده هامی چوخلاری چیرپیندی او دم
کینه و بغض و حسد ایلدی اغیاری دچار
قاچدیلار فوراً او بیتین قاپوسین تا آچالار
هر قدر ائتدیله سعی اولمادی حاصل مقصود
حرمین درگهی نامحرمه قالدی مسدود
یعنی کی اؤزگیه فاش اولمادی سرّ موجود
عاقبت بو سؤزه دلدن هامی ائتدی اقرار
صاحب خانه بئله ایستوری اغیاره نه وار؟
کئچدی اوچ گون بو سؤزه اولدی خبردار هامی
گلدی حیرتله ائدوب کعبه نی دیدار هامی
ایستیوردی بیله آیا ندی اسرار هامی
قالدی حیرتده نظر سالدی کیم اول دیواره
یادگاری قالاجاقدی دئدی بو اعصاره
دوردایمینجی گونی ئوز وئردی دوباره اعجاز
اول سینان یئردن او دیوار اولوبدور گئنه باز
کعبه دن نور شاخوب ائتدی ملکلر پرواز
گؤردی، هر کیمسه همان منظره نی ائتدی رصد
بیتیدن خارج اولوب فاطمۀ بنت اسد
دلبری گؤردولر آغوشیده دلخواه گلور
کوکب عشق قوجاقینده چیخوب ماه گلور
بیر گؤزل هدیه وئروبدی اونا الله گلور
جلوه¬گردی گول ئوزونده بالانون نور جلی
آناسی سسلوری جانیم سنه قرباندی علی
ئوز دوتوب فاطمه سسلندی کی ای اهل وطن
اولون آگه بگنوب، سئچدی منی حق سیزدن
اؤز ائوینده منی مهمان ایلیوب لطفیلن
بیر اوغول وئردی منه دهریده یکتا اولاجاق
بیر گون آوازه سی یکسر بو جهانه دولاجاق
بیر اوغول وئردی منه یوخ اونا دنیاده بدیل
افتخار ایلر اونا موسی و عیسی و خلیل
قدرت اللهه اونی مظهر ائدر حیّ جلیل
قید شرک و ستم و فتنه نی یئردن قیراجاق
لات و عزّا و منات و هُبَلی سیندیراجاق
بیر اوغول وئردی منه کی مین اوغولدان سر اولار
شیعیه رهبر اولار، شیرلره سرور اولار
رتبه ده برتر اولار، نائب پیغمبر اولار
یئرده ابنای بشر گویده بونی ماه دئیر
أشهَدُ أنَّ علیّاً وَلی الله دئیر
نه علی نور رُخی اللها آیت یارانوب
صاحب منزلت و عزّت و شوکت یارانوب
کعبیه شأن و شرف، خلقته زینت یارانوب
بلّیدور منزلتی سویملی سیماسیندن
باخان حیرتده دی غیرت یاغور اعضاسیندن
نه علی جان جهاندی بشرٌ کیف بشر
آغ قماطه بوکولوب غنچۀ رضواندی مگر
بیر صفالی باخیشی هر ایکی دنیایه دگر
جمله گول ئوزلی لری غرق تماشا ائلیوب
هاشمیّونی گؤزل عشقینه شیدا ائلیوب
نه علی عالمه اظهار اولان عزّ و جاهی
اولوب اول بنده کی الله ائوی زایشگاهی
حاش لله یارانا مثلی اونون واللهی
نور وارسته دی مولود مبارکدی علی
«قل هوالله احد» تکدی خدا، تکدی علی
نه علی گؤز تیکوب هر کیم اونا مستانه اولوب
دولانور باشینه عاشقلری پروانه اولوب
دل وئروب هر کیم اونون عشقینه دیوانه اولوب
مکّه اهلی او گون آیات جلی دن دانیشور
اؤزگه سؤز یوخدی هامی مدح علی دن دانیشور
نه علی جلوۀ جاوید رُخ حقدی علی
نام اعلای تعالادن مشتقدی علی
حقدن آیریلماز علی چون حقه ملحقدی علی
آیه به آیه گؤزل اللهین آیینه سیدی
خالقین مخزن اسراری اونون سینه سیدی
آل هاشمدن اشیتدی کیم او زیبا خبری
گلدی تا ایلیه دیدار او صفالی پسری
آلدی آغوشه محمّد چون او شوریده سری
شوقیلن گؤزلرین آچدی دئدی ای شاه اُمم!
انبیا خاتمی سن باری شهادت وئرورم
یا نبی! امر ائله تا عشقیمه برهان اوخویوم
بویورورسان آقا توراتیدن، اوردان اوخویوم
صُحُف، انجیل و یا آیۀ قرآن اوخویوم
مدعی لر بیله جاقلار نئجه انسانم من
مظهر ذات حقم، ناطق قرآنم من
- پنج شنبه
- 23
- اسفند
- 1397
- ساعت
- 14:31
- نوشته شده توسط
- ابوالفضل عابدی پور
- شاعر:
-
علیرضا حضرتی (ناعمی)
ارسال دیدگاه