دونوب باغریم بو غربتده منیم قانه حسین قارداش
ویرور زینب یورولموش جانی جانانه حسین قارداش
گل ای اولان گوزوم ضیاسی
اورکده واردی دل یاراسی
باجون جان اوسته دی قارداش گل اول بیردم منه همدم
سنه عاشق اولان زینب ندن حالی اولور برهم
بو مرده قلبیمه سن ویر حسین جان تازه دن بیردم
بولورسن عاشقون دوزمز بوهجرانه حسین قارداش
گل ای اولان ...
بهارعمرومه اسدی خزان سالسون شررجانه
رضا اولما دوشوم بو غربت ایچره درد هجرانه
چکورآخردمی زینب یتوبدی عمری پایانه
دم عیسی گتور مرحم بو نالانه حسین قارداش
گل ای اولان ...
گوزوم یولدا آخور اشکیم اورکده غم یاراسی وار
گویول ایستورسنی هردم هوای کربلاسی وار
اُولور امّا ولی تنها نه باجی نه آناسی وار
یانورنار فراقه گل چو پروانه حسین قارداش
گل ای اولان ...
دوشوبدورگویلومه عطرون آلام گَل ای گُل یاسیم
گُلستان گُللریم هاردا هانی اکبر هانی قاسیم
دی گلسون مشکلوم واردی منیم غیرتلی عباسیم
گوزوم یولدا آخان اشکیم دونوب قانه حسین قارداش
گل ای اولان ...
جمال انورون گورسون اولوبدی گوزلریم مایل
ولی افسوس اجل قویماز اولام بو امره من نایل
گیدورقبره باجون زینب غم اوسته غم اولور حاصل
منی گل قویما قویسون قبره بیگانه حسین قارداش
گل ای اولان ...
فلک سندن منی بولمم ندن بیله اوزاق سالدی
منی شامات آلارکامه سنی کربو بلا آلدی
دویونجا گورمدیم قارداش مزارینده گوزوم قالدی
منیم تک بیر باجی گلمز بو دورانه حسین قارداش
گل ای اولان ...
یولون سال شامه گل قارداش غریبه آغلین اولماز
غریبم آغلاماز کیمسه گوزومی باغلین اولماز
بو غربت ایچره من اوللم سینه سین داغلین اولماز
یوروب غملر دویوب زینب شیرین جانه حسین قارداش
گل ای اولان ...
اولوب «عدلی» بیزه خادم گنهکاردی سرافکنده
ولی عمرون ویروب باشه اولوب محفلده گلشنده
قیامتده شفیع اولسان حسین اولماز او شرمنده
اورک دردین دیر آغلار او یزدانه حسین قارداش
گل ای اولان ...
- پنج شنبه
- 23
- اسفند
- 1397
- ساعت
- 17:30
- نوشته شده توسط
- ابوالفضل عابدی پور
- شاعر:
-
حاج اصغر فرشچی
ارسال دیدگاه