ای نیزه نین اوستونده باشی آیت رحمان
ای حق دانیشوب حقدن اوتور حقه وئرن جان
قرآن اوخی قرآن اوخیان لبلره قربان
مرجاندی باشوندان سوزوری یا کی آخور قان
ای حیدره بنزر باخیشا زینبی قربان
سن حق دانیشوب دشت بلاده قانا باتدون
قربانی وئروب قربان اولوب مقصده چاتدون
آخر بو گئچن گون باجون ئولسون نجه یاتدون
گل بیر دیله آیا باجیوی گوزدن آتوبسان
معلوم اولالی وای منه کول اوسته یاتوبسان
تا کربوبلاده ایلدون دینیوه نهضت
باشلاندی باجون زینبون ئولسون سنه محنت
نهضتده اولا هر کسه محنت تاپار عزت
هر چند بیزه قوم عدو ایلدی طعنه
حشر اولسادا بیر کیمسه گورنمز بئله صحنه
تا اولدی ازل اکبریمیز دینینه قربان
قاسمده باخوب اکبره اولدی قانا غلطان
اصغر عطشی ایلدی عباسی پریشان
بیر جرعه سودان اوتری یول اوسته یارالاندی
دوغراندی قولی باش گوزی ، سو مشکی جالاندی
تا کسدی باشون شمر ، عدو تاپدی جسارت
سعد اوغلی حیا ایلمدی ائتدی حماقت
بیردن دئدی اخیامی کیم ایستور ائده غارت
کرکس کیمی اخیامه توکولدی او جماعت
الله بولوری زینبه باشلاندی قیامت
بیشرم جماعت نه دیوم اللهی داندی
سوز آنلامیان لاردا حسین غارتی قاندی
اود ووردی عدو ظلمیله اخیامیده یاندی
کیمسه ال آتوب معجره بیر هلهله دوشدی
قیزلار داغلیوب چوللره بیر ولوله دوشدی
بیر خیمه ده دوتدوم سنه من شام غریبان
یانمیشدی حسین اولدی باجون حالی پریشان
بیر قیز گئجه وقتینده گئدوب جانب میدان
یاندیردی او طفلین بابا وای ناله سی قارداش
قورتولدی داخی زینبیوین چاره سی قارداش
اوز مرحمتون زینبه ابراز ایله قارداش
گل بیر دیله بو کوفه ده اعجاز ایله قارداش
« شیدا » بو سوزدی یازدی سرافراز ائله قارداش
ای نیزه نین اوستونده باشی آیت رحمان
قرآن اوخی قرآن اوخیان لبلره قربان
- پنج شنبه
- 7
- مرداد
- 1400
- ساعت
- 20:48
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه