روحیم قوشی دمشقیده مهماندی زینبه
زوّار اولوبدی، نی کیمی نالاندی زینبه
زینب چی ام ملک لر ائدر غبطه حالمه
دوشموش دوباره زاده ی زهرا خیالمه
بیر زینبی کی اولدی معلّمسیز عالمه
علاّمه لرده علمیده حیراندی زینبه
واقفدیلر بو محفل اُنس ایچره خاص و عام
قرآندا مریمه وئریلوب عالی بیر مقام
منده آزاتمورام او مقامی چوخالدیرام
شأن و شرفده طفل دبستاندی زینبه
زینت دگول فقط شه مردانه بو خانیم
زیوردی بلکه عترت و قرآنه بو خانیم
زیبنده بنده دور حق سبحانه بو خانیم
آد انتخاب ائدن حق سبحاندی زینبه
بو زینبه ائدردی حسین چوخلی احترام
قرآن اوخوردی بیر گونی ترتیلیله امام
وارد اولوبدی زینب، امام ایلیوب قیام
بو احترام حرمت شایاندی زینبه
نهج البلاغه ده یازیلا خطبه سی اگر
کیم نابلد اولا سئچه بیلمز، گمان ائدر
اُول خطبه-نی بیان ائلیوب شاه بحر و بر
استاد خطبه چون شه مرداندی زینبه
نطق و بیاندا حجّت داداره بنزیور
حُج و حیاده حضرت زهرایه بنزیور
قامتده قامتی اوجا سقّایه بنزیور
آللهیدن بو بنزَمه احساندی زینبه
طاهادن ای گوزوم! سنه عالی خطابه باخ
کیم آغلیا بو زینب عُلیا جنابه، باخ
گویا کی آغلیوب حسنینه، ثوابه باخ
خوش اُول کسه کی گوزلری گریاندی زینبه
چوخ گورمسوز یاناندا اود ایچره سپندلر
جسمیمده اود دوتوبدی ائله بند بندلر
چوخ دردی واردی زینبین ای دردمندلر!
چوخ آغلیون کی گوزیاشی درماندی زینبه
بیر زینبی کی پنج تنه آغلیوب مدام
قلب شریفی نی غمیله داغلیوب مدام
خاصّه حسین غمینده قرا باغلیوب مدام
دائم حسینه آغلاماق عنواندی زینبه
دوشدی گنه خیالیمه گودال قتلگاه
یاران! نئجه بیان ائلیوم آه آه آه
مقتلده جان وئرور گورورم بیر یارالی شاه
اُول یاره لی، بیر عمریدی سلطاندی زینبه
هر باجی قارداشین یارلی گورسه آغلیار
گوزیاشینی دوا ائلیوب یاره باغلیار
هر دن دییر: ئولیدی باجون؛ سینه داغلیار
سینای عشق، سینه سی سوزاندی زینبه
زینب الی باشیندا گلوب قانلی گلشنه
باخدوقجا لاله وش گولونه گلدی شیونه
دوندی مدینیه، دئدی: ای باغری قان ننه!
گل کربلایه گور نئجه بحراندی زینبه
هر قیز یامان گونه دوشنده دوشر یادینه آنا
تئز سس وئرر اوزی، بالا فریادینه آنا
سنده یئتیش بو زینبوین دادینه آنا
قارداشی جان وئرور مگر آساندی زینبه
دوندی مدینه دن نجفه اُول علی صفات
سن سن دئدی بابا حلابل مشکلات
قان دریاسیندا غرق، اولوب کشتیِ نجات
غم لر تلاطم ایلدی طوفاندی زینبه
بیر یاندا قتلگه ده حسین، یوخدی بیر کسی
بیر یاندا قیزلارین اوجالور «یاحسین» سسی
سینه ورور ملک لر اوخور قتل نوحه سی
قاندور یاغور و یا بو نه باراندی زینبه
دالدان کسوبله باشین حسینون جفائیله
محشر گوروندی زینبه بو ماجرائیله
سسلندی عرشیان اوجالی بیر صدائیله:
بیر آیری ماجرا گئنه باشلاندی زینبه
حمله ائدوبدی خیمه لره قوم دون، بلی
غارتده قورخوشوب او زمان عترت علی
هئچ کیمسه یانمادی حالینا زینبین، ولی
اؤد ویردیلار او خیمه سرا یاندی زینبه
صولماز خزاندا گلسه گلِ گلشن فدک
حسرت چکور گوره بو گولی عرشیده ملک
هر گون کی گون باتور گئینور قاره، بو فلک
فکر ایلورم کی شام غریباندی زینبه
عشق حسینه باخ، ائله بیل آیه دور بو عشق
عشق خدایه عرشیده همسایه دور بو عشق
الدن بو عشقی وئرمه کی سرمایه دور بو عشق
سرمایه، عشقِ شاه شهیداندی زینبه
قیتر قلم! سوزی سوزوموز باشلانان یئره
شهر دمشقه زینب کبرا یاتان یئره
روحیم صفالی قبرینه مهمان اولان یئره
طبعیم قوشی او یئرده نواخواندی زینبه
اُول گون کی جان وئروردی دیار دمشقیده
ذرّه صفا یوخیدی بهار دمشقیده
غم موج ائدوردی لیل و نهار دمشقیده
سؤیلوردی: گل حسین بورا زنداندی زینبه
منّت دگول دئسم باشیوین اوسته گلموشم
کرب و بلاده مقتلیوه خسته گلموشم
دیداریوه او دشتیده پیوسته گلموشم
جانیم چیخور سنون گوروشون جاندی زینبه
گل گور نه نوعی گوزلری یولدا قالوب باجون
جان اوسته، یاخشی گونلری یاده سالوب باجون
غربتده کؤینگیوی قوجاقه آلوب باجون
بو یادگار، عشقیده برهاندی زینبه
بلبل کیمی سولان چمنی یاده سالموشام
غربتدییم دئمم وطنی یاده سالموشام
بو جان وئرن چاغیمدا سنی یاده سالموشام
شاهد بو سوزده اشک فراواندی زینبه
واردور رقیّه قبری یاخوندا دئمم تکم
قالدیم او نازنین بالاوین نازینی چکم
زوّارینون یولوندا سرشکیمله گول اکم
اُول نازدانه چون گل ریحاندی زینبه
کیم شهر شامه گلسه اورَک داغلیوب گئدر
گوزیاشینی بو یئرده یوزه باغلیوب گئدر
اخلاصیله دویونجا بیزه آغلیوب گئدر
آینده، گوزلرینده نمایاندی زینبه
«سیّد بشیر»ه قسمت اولوبدور زیارتیم
شعرینده گورسنور، اونا واردور عنایتیم
محشر گونوده قویماز اونی تک، شفاعتیم
دیوان شعری سؤیمه لی دیواندی زینبه
- سه شنبه
- 6
- فروردین
- 1398
- ساعت
- 10:30
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه