زینبین وار ایکی قربانی حسینجان یولوا
هم ئوزوم هم ایکی اوغلوم اولا قربان یولوا
.
گؤرورم عرصه ده یالقیز سنی قلبیم آلیشیر
گؤزیاشیم گؤزدن آخور خون دلیلن قاریشیر
ایکی اوغلومدا عزیزیم سنه خاطر چالیشیر
بودی نیت وئره لر عزتیلن جان یولوا
.
سنله پیمان السته دئمیشم منده بلی
حک اولوب سینه مه پیمان وفاق ازلی
من علینون قیزیام سنده که زهرا گؤزلی
افتخار ایلیورم خسرو خوبان یولوا
.
سؤزومی سالما یئره اذن وئر اوغلانلاریما
پیرو دین خدا گوش به فرمانلاریما
قوی ائدیم فخر حسین منده بو قربانلاریما
سن بویور گلسین عزیزیم ایکی طفلان یولوا
.
وئردی لیلا علی اکبر کیمی شهزاده سنه
جان فدا اولسون اخا نوگل باغ حسنه
صف عشقینده چاتوب نوبت لبیک منه
امر ائله رگ به رگیمدن سپرم قان یولوا
.
منی البته کفیل ائتموسن ئوز عترتوه
باخورام حظ ائدورم هیبتوه صولتوه
سنی وئررم قسم حق اوسته اولان نهضتوه
قوی اولوم منده بوگون سرزده مهمان یولوا
.
آیریلاندان وطنیمدن بیلوسن نیله میشم
صاحبیم جعفره افکاریمی واضح دئمیشم
بو گونی سن کیمی بیر عمردی من گؤزله مشم
ایستورم لایق اولام شاه شهیدان یولوا
.
زینبین فدیه ویروبدور یولوا هر زادینی
عشقووین دفترینه یاز ایکی طفلین آدینی
اکبرین تک بیله لر فیض شهادت دادینی
وئر اجازه گؤزلیم گر اولا امکان یولوا
.
خدمتیمده سنه نقصان اولا خجلت چکرم
ئورگیمده بیلوسن بوته محنت اکرم
ناامید ایتمه قاپیندان منی ای کان کرم
گلمیشم فرش ایلییم زلف پریشان یولوا
.
- دوشنبه
- 7
- مرداد
- 1398
- ساعت
- 10:16
- نوشته شده توسط
- ابوالفضل عابدی پور
- شاعر:
-
ابوالفضل عباسی معروفان
ارسال دیدگاه