گل قارداش حسین قلبیمی قان بو محن ایلر
قارداشسیز اُلن باجینی بس کیم کفن ایلر
قارداشدی اولان باجیلارا مونس و دلدار
بیر بیرلرینه غم گونیدی یاور و غمخوار
بس هاردا قالوب قارداشیم عبّاس علمدار
هیچ فکر ایلمزدیم که بیله باشسیز اولام من
غربتده اُلن وقتیده قارداشسیز اولام من
گور هاردا منی سالدی حسین غصّه ایاقدان
غربتده هامی اینجیدی آخِر بو قوناقدان
بیر سولدا سلام ایلورم السّاعه اوزاقدان
یاخشی بولوسن عشقیوه پابسته دی زینب
تیز گل یارالی، شامیده جان اوسته دی زینب
جان اوسته گوزوم حسرت دیدارون اولوبدی
زینب که چتین وقتیده دلدارون اولوبدی
هر یرده باجون زینب علمدارون اولوبدی
گه پرچم قرآنیوی من کوفیه ووردوم
گاهی آپاروب سر در ویرانیه ووردوم
اجرا ایلدیم امریوی فرمانیوی قارداش
تعقیب ایلدیم عهدیوی پیمانیوی قارداش
تبلیغ ایلدیم مکتب قرآنیوی قارداش
دشمنلریوی منطقیلن خوار ایلدیم من
غفلتده یاتان ملّتی بیدار ایلدیم من
یغدیم باشیما شامه حسین لشکر آپاردیم
بیر عدّه اورک داغلی قرا معجر آپاردیم
نازلی بالاوی لشکره سرلشکر آپاردیم
بولدوم که بیزه ظلم ایده جاق آل امیّه
تسخیر ایده جاق شامی شیرین دلّی رقیّه
بیر آهیله ویران ایلدی قصر یزیدی
سالدی یره تختیندن او نامرد پلیدی
شام اهلی اولوب دلدن اونون یار و مریدی
هجران غمی افسوس دل زارینی بُلدی
آز عمر ایلدی گوشه ی ویرانه ده اُلدی
نازلی بالامون محنتی آرامیمی آلدی
دردی گجه گوندوز آنامی یادیمه سالدی
گیتدیم هارا، ویرانه ده فکریم گینه قالدی
یوخ بیر کسی بو شامیده گوزلر منی بولدوم
طاقت گتوره بولمدیم آخِر گینه گلدیم
باشیمده حسین شامه گینه قاره گتیردوم
تیعید اولونوب سینه ده چوخ یاره گتیردوم
افسوس نه سوغات اونا گوشواره گتیردوم
شکوه ایدرم دائم اخا چرخ فلکدن
شرمندیم حشره کیمی او قاره لچکدن
بیر کیمسه خبر ویرسون او دلدادیه قارداش
گلدی گینه عمّن توکه گوزدن یوزه قانیاش
قبری اولاجاق غربت آرا قبریوه یولداش
حاشا گوزلیم رخت وفانی سویا زینب
حاشا سنی غربتده قیزیم تک قویا زینب
قارداشیم اُلندن صورا همرازیمیدون سن
بلبل کیمی سینمده هم آوازیمیدون سن
ویرانه بوجاقینده گل نازیمیدون سن
صبحه کیمی منله گجه بیدار قالاردون
مظلوم اوتوراندا آنامی یاده سالاردون
فریاده دل زاریمی هر ثانیه گتدون
شمعی دل شب مسکن پروانیه گتدون
آخِر آتا باشین دل ویرانیه گتدون
عاشقلری اوز عشقیوه حیران ایلیوبسن
یورقون جانی مهمانیوه قربان ایلیوبسن
ای نیمه ی شب منزل ویرانه گلن باش
وی کرب و بلادن منه شامه کیمی یولداش
بیچاره باجون شامیده جان اوسته دی قارداش
ویرانیه گلدون آنام اوخشاردی اُلنده
گل ایمدی حسین جان ویرورم شامیده منده
بیر یولدا حسین گل سنه قربان منه خاطر
ویرانه ده غمدن پوزولان گلشنه خاطر
چولدن چوله دوشدوم بولوسن من سنه خاطر
سنده یارالی گل منی دلشاد ایله قارداش
روحیم قوشونی جسمیدن آزاد ایله قارداش
ترک ایتدیم حسین خیمه لری تا من خسته
چاتدیم ایله که قتلگهه قلبی شکسته
گزدیم سنی گودالیده تاپدیم یوزی اوسته
باران بلا گویدن او صحراده یاغاردی
باشسیز بدنی گورجاق حسین باشیم آغاردی
- سه شنبه
- 6
- فروردین
- 1398
- ساعت
- 11:44
- نوشته شده توسط
- ابوالفضل عابدی پور
- شاعر:
-
حاج فرهاد فکری اردبیلی
ارسال دیدگاه