عمریمون مثالی بنزر آفتاب بامه قارداش
آز قالور غروبه یتسون یوخ محل دوامه قارداش
موسم خزان یتوشدی بلبل آیریلور چمندن
مسکنیم اولوبدی غربت آیری دوشموشم وطندن
هر کس ایلسه عیادت مرگ بسترینده مندن
سرعتیله عازم اولسون بو دیار شامه قارداش
من نجه دیوم که سن گل چون باشین بدنده یوخدی
نه باشین نه اللرین وار پیکرینده یاره چوخدی
زخمدار صدرین اوستی جایگاه سانسیز اوخدی
کربلاده شرح صدرین گوستروب انامه قارداش
دود آهیمین دالینجا سینه ده شراره واردور
هر سوزیمده چوخ یانقلی نکته لر اشاره واردور
ماتمون علامتیندن باش و تنده قاره واردور
بو ئورکده یاره لر وار گلمز التیامه قارداش
ئولدورر منی فراقون گرچه درد اولوب بهانه
حسرتیله اولام ایمدی دار فانیدن روانه
ساخلیوب اورک باشیندا کوینگون باجین نشانه
تا بو پیرهن یتورسون عطریوی مشامه قارداش
بی جهت دگل که گلدیم بیرده سمت شام شومه
چکدی اُلفت رقیه زینبی بو مرز بومه
بنزدوبدی شامین اهلی عترتین اسیر رومه
چکدیلر بیزی بو یرده بزم بار عامه قارداش
خورداجا قیزین رقیه گلمدی بو یرده قالدی
جان ویروب قوری یر اوسته جانیمه شراره سالدی
هی بابا بابا دیردی تا باشون دیز استه آلدی
بُلمورم نه گوردی وئردی خاتمه کلامه قارداش
اشتراک نهضتینده صاحب جلالت اولدوم
لیک اونون مصیبتینده همدم ملالت اولدوم
عاقبت سنون یانیندا حیف اولا خجالت اولدوم
چون خرابه مدفن اولدی دختر انامه قارداش
دامیدن خلاص اولدی گیتدی اول غزاله الدن
اختیاریمی آپاردی دختر سه ساله الدن
گلمدی مصیبتینده چاره غیر ناله الدن
ایلدیم قانین حواله دست انتقامه قارداش
«منطقی» سنون قاپوندا بسکه اشکبار اولوبدی
دامنیندن اشک چشمی در شاهوار اولوبدی
سن کیمی بزرگواره چوخ امید وار اولوبدی
مفتخردی متکی دور بیر بویوک مقامه قارداش
- سه شنبه
- 6
- فروردین
- 1398
- ساعت
- 11:49
- نوشته شده توسط
- ابوالفضل عابدی پور
ارسال دیدگاه