آخشام چاغیدی چخدی غرض جانی زینبون
تاخیره دوشدی شام غریبانی زینبون
من بیلمیرم عزایه گلن اولدی اولمادی
گوز یولدا قالدی دیدۀ گریانی زینبون
الله غریبلر یاسینا کیم گلرمگر؟
مجلس قوتاردی اولمادی مهمانی زینبون
بعضی دیورنمازینی سجاد آقا قیلیب
تاپشوردی قبره حجّت سبحانی زینبون
گیتدی حسن حسین باجیسی تپراق التینا
دللرده قالدی دردفراوانی زینبون
ایکاش بیر مسافراولیدی مدینیه
شاید گلیدیلر یاسا اعوانی زینبون
جنّتده مرتضایه خبر ویردی فاطمه
اولدی عم اوغلی اولمادی درمانی زینبون
دور پیشواز ایداخ بیزه زینب قوناق گلیر
هجران کشیده دی یورولوب جانی زینبون
زینب نه زینب عاشق دلدادۀ حسین
عشقین گواهی حال پریشانی زینبون
زینب نه زینب آل علینون مدافعی
نسوانه اسوه منطق برّانی زینبون
تبعیدیدی دمشقیده زندانیلر کیمین
ئولدی قوتاردی مدت زندانی زینبون
بُلمم جانی چخاندا نه چکدی نلر دیدی
گلدی و یا که گلمدی جانانی زینبون؟
لال اول دیلیم مگرباجیدان قارداشی کوسر؟
دوندی وصاله شامیده هجرانی زینبون
معناده چاتدی زمزه سی قانلی تربته
آغلاتدی دردی شاه شهیدانی زینبون
دوشدی طلاطمه شهدانین بدن لری
اصغر اویاندی اولدی نواخانی زینبون
باجاییدی امام اوزی سقانی سسلیه
عباس؟ دور یتور باشا پیمانی زینبون
ای پرچمی یاتان اله بیر قاره پرچم آل
چون یولدادور دو دیدۀ گریانی زینبون
شام ایچره چوخدی دشمن اولاد فاطمه
دورسون ایاقه یوخ داخی امکانی زینبون
ویر ال ال گیداخ باجیما تعزیه دوتاخ
بُلسونله واردی عزت شایانی زینبون
خوش گلدون ائت قوناقلارا شیرین دیلونله سن
اؤزعُهدَه مَه قرائت قرانی زینبون
ویرانه دن رقیّه نیده سسلرم گلر
آباد اولا گرک دل ویرانی زینبون
تأخیره دوشسه دفنی پریشان اولار آنام
مظلوم آنامدی ایندی نگهبانی زینبون
غسالیه دیاخ سویی توکسون یاواش یاواش
چون اینجیوبدی قمچیدن هر یانی زینبون
شامین یولیندا بسکه دگوب تازیانه لر
وار پیکرینده چوخ یارا پنهانی زینبون
مندن اؤتؤرباجیم اؤزینی زحمته سالیب
شاهددی باشدان الدن آخان قانی زینبون
قبره قویاندا آنّینینی خوشدور اؤزوم اؤپم
تکمیل ائدیب قیامیمی ایمانی زینبون
اولسون گرک به کوری چشم یزیدیان
شام ایچره صحن و گنبد و ایوانی زینبون
اؤپسونله شیعیان علی آستانه سین
دوتسون دمشقی شهرت وعنوانی زینبون
یاز دفتره «کلامی» آدون اولما نا امید
محشر گونی چاتار سنه احسانی زینبون
- سه شنبه
- 6
- فروردین
- 1398
- ساعت
- 12:48
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه