یا فاطمه بغداده گَل سبط پیمبر جان ویرور
پابند زنجیر جفا موسی بن جعفر جان ویرور
تاریک بیر زندان یری، شامه دونوبدور گوندوزی
نیتسون بو مطموره نشین، خونین جگر، مسموم اوزی
چوخدور غمی، یوخ همدمی، یرده یوزی، آغلار گوزی
پوزقون پریشان حالیله بو زار و مضطر جان ویرور
زندان نه زندان تو به تو، شرحی غمی ایلر فزون
شرحینده عاجزدور قلم، بو قدر وار قَعرُ السّجون
خشکیده بیر نی تک بدن، ماموری بیر بی رحم و دون
بار ستمدن قدّی خم سرو صنوبر جان ویرور
نه بیر کسی وار قبلیه جان اوسته دوندَرسون یوزین
نه مهربانی باغلاسون آخِر نفسده تا گوزین
آغلار ایدر معبودینه تکرار خَلِّصنی سوزین
جاندان دویوب، جانانینه محبوبِ داور جان ویرور
هارون بُلور بو سروری اوز مُلکینه گویا نقیض
اون ایلدن آرتوخ ساخلیوب کُنده اَیاقینده مریض
علّت بودور مشهور اولوب عالمده ذِی السّاقِ الرَّضیض
قانیله ساقَینی اولوب چون لاله احمر، جان ویرور
هارونه یوخ بیر کس دیسون آخِر بو نه تقصیر ایدوب
ای بی مروّت گورموسن جسمین یارا زنجیر ایدوب
سِند بن شاهک اینجیدوب از بس که چوخ دلگیر ایدوب
بیر مرغ بسمل تک قوری یرلرده تیترَر جان ویرور
موسایه نه ظلم ایلیوب هارون بیان ایتسم اگر
دل غصّه دن قانه دونر، رخساره گوز قانیاش توکر
محبسده اصلاً اُلمیوب بو ذلّتیله بیر نفر
گَل گور عزیز اوغلون نجه خوار و محقّر جان ویرور
توپراقلار اوسته بُلمورم اُلماقدا وار نه عزّ و شان
تک تک نچه اوغلون خانیم ویردی قوری یرلرده جان
امّا حسین تک جان ویرن گردونِ دون ویرموب نشان
گَلدون اوزون گوردون نجه محزون مکدّر جان ویرور
یالقوز یارالی بیر سوسوز، عطشان جگر، اودلی هوا
ویرمور امان خنجر ووران، رحم ایلمور اهل جفا
قانلی قوم اوستی ایستی گون، بیر سینه ده دورت مین یارا
سالمدی نه سینه نه اَل نه باش نه پیکر جان ویرور
بیر یالقوزی اُلدورماقا قرخ مین نفر قاتل گَلور
قان توکماقا هر تک تکی دلدن اولوب مایل گَلور
باخ گور قیزون زینب کیمی دنیایه دریا دل گَلور؟
گَلدی نه گوردی آختارور قارداشی خواهر جان ویرور
قارداشینی اُلدورماقا قاتل لر ایلور کش مکش
مقتولی بیر حاله سالوب گون ایستیسی سوز عطش
جسم شریفی گوستَرور تفسیر جلد منکمش
خشکیده لبلر العطش ایلوبدی ازبر جان ویرور
شمرین قوای عقلینی اوز نفسی مغلوب ایلیوب
منحوس بیر فعلی اونا ری فکری مطلوب ایلیوب
روح بتول اطهرین جسمین لگد کوب ایلیوب
او کش مکش، بو العطش، ایلور مکرّر جان ویرور
رُمحِ سِنانیله سَنان منحور ایدوبدور حنجرین
منحور حنجردن وورور شمر ستمگر خنجرین
بی خانمان زینب دوتوب بی رحم قاتل اَللرین
محبوب ذات لم یزل حنجرده خنجر جان ویرور
شمر ستمگر جهل ایدور تئز خاتمه تاپسون عمل
فکرین بُلور زهرا قیزی ایلور اودور جنگ و جدل
شمر ایستور آلسون خنجری، چکمور خانم خنجردن اَل
باخدوقجا باجی حالینه آغلور برادر جان ویرور
آدیم #حسینی دور منیم، زینت فزایِ بزم غم
پیغمبر اوغلی وورموشام شرح غمونده چوخ قلم
بو خدمته ایله عوض، جان اوسته قیل رَنجه قدم
لطف ایله عزرائیله دی رفق ایت بو نوکر جان ویرور
- شنبه
- 10
- فروردین
- 1398
- ساعت
- 16:33
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه