قالمیشام عراقیده
درد بی دوایه گل
دوغرانوب جگرلریم
ای رضا هرایه گل
اون بیر ایلدی ای بالا من قفسده قالمیشام
بلبل رسالتم عطری گولدن آلمیشام
سن گورن بابان دگول حبسده قوجالمیشام
بیر علیل ناتوان جان ویرور نوایه گل
فرش یوخ ئوزوم غریب یر رطوبی بیر چراغ
گردنیمده سلسله ایلیوب ورم ایاق
بیر بلالی سیّدم گل اوغول منه قوناق
ای بلا چکن بالا مرکز بلایه گل
من سپهر حقیده گر ایشیقلی اولدوزام
محبس عراقده بیر غریب و یالقوزام
دشمن اینجیدور منی فرض ائدور اوغولسوزام
غرق محنت و غمم سنده آه و وایه گل
قلب زاریمه اوغول زهر کین ائدوب اثر
دل یانوب دوداقیلن اودلانوب داخی جگر
چوخ زماندی حسرتون ای رضا اتان چکر
وئر رضا قضایه سن جانب رضایه گل
گل که ایندی محبسه شاه انس و جان گلر
یانیمه منیم بالا حالیمه یانان گلر
شاه محشرین قزی فاطمه آنان گلر
واردی سنده چوخ وفا محفل وفایه گل
باغدا گول سولان زمان چوخ چتیندی بلبله
بیرده باور ائتمه سن یثربه بابان گله
زهردن یانور جگر گردنیمده سلسله
یوز وئروب بلا منه گورمگه جفایه گل
« نادری » بشر اولار گرچه جایز الخطا
یاز خدا جزا گونی بیته ، بیت ایده عطا
سنده چون غریبسن ضامنون اولار رضا
دورگلان زیارته دشت کربلایه گل
- شنبه
- ۱۰
- فروردین
- ۱۳۹۸
- ساعت
- ۱۶:۴۷
- نوشته شده توسط
- ابوالفضل عابدی پور
- شاعر:
-
مرحوم حاج قدرت اله نادری
ارسال دیدگاه