کربلا ظلمیندن اهل کینه تقلید ائتدیلر
طور حق موساسینی بغداده تبعید ائتدیلر
باشلیوبلار آل سفیان ظلمینون تعقیبینه
گون بگون بیر تازه رأیین طرحینه تصویبینه
کاخ حقین انهدام و محوینه تخریبینه
هانسی حمله چوخ موثر اولدی تشدید ائتدیلر
سندیروبلار ساقی اهل ولا پیمانه سین
روی حقین ائتدیلر افسانه تر افسانه سین
سالدیلار زندانه شمع دین حق پروانه سین
کوفه زندانینده کی بیر ظلمی تجدید ائتدیلر
آل طاها یوسفی محبوس اولوب زندانیده
آرزوی مقدمین ایلردیلر کنعانیده
یاندی بیر عده جفاکش آتش هجرانیده
هانسی دل امّیدوار اولموشدی نومید ائتدیلر
گلستانه حکمفرما اولدولار زاغ و زغن
بلبلان دین ائدوبدی عالمی بیت الحزن
شاهراه حقه جمع اولدی بیر عده راهزن
غارت احکام دین حقه تأکید ائتدیلر
دین اسلامه مسلمانلار ائدوب تحصیل ننگ
قاف وحدتده اولان عنقایه دنیا اولدی تنگ
ویردیلار شاهنشه دینه ستمله پالهنگ
حاش لله بو جفاده ذره تردید ائتدیلر
گورسدوبلر جوّ ملک حقده حال انقلاب
زهرلی خرمائیله دوشدی جهانه اضطراب
ظلمیله مسموم اولوب موسای آل بوتراب
شاد اولوب فرعونیان فرعونی تمجید ائتدیلر
کاخ حقّین هفتمین رکنی تاپوب حال شکست
سجدیه باش قویدی مست بادۀ روز الست
عرض ائدوبدور قالمیشام بیر عمردور مخمور و مست
بو خمارین سنماقین هر لحظه تمدید ائتدیلر
روز اول می منه پیمانه ده چشمک ویروب
خندۀ می قلبیمی عشق آتشیله دولدوروب
ساقیِ میخانۀ وحدت مقابلده دوروب
می فروشیله منِ سرمستیدن دید ائتدیلر
من ولی جدیم حسین تک فیض دیدار آلمادیم
بیر عبای سرخ گون اوز چیگنیم اوسته سالمادیم
قان ایچینده ال ایاق لب تشنه عطشان چالمادیم
خسته ، یورقون جسمیمی اوخلار نه تهدید ائتدیلر
من حسین تک عالم اسلامه خدمت ائتمدیم
نیزه ده من کوفه و بازار شامه گئتمدیم
گر چه احکام خدادن ارتوروب اسگیتمدیم
خارجی آدلانمادیم مندن نه تفقید ائتدیلر
گه دوتار « هادی » منیم گاهی حسینین دامنین
نی کیمی هر دم سیزیلدار چوخ ائدر آه و انین
ایلیر اثبات حکم ائتسه قرائت مطلعین
کربلا ظلمیندن اهل کینه تقلید ائتدیلر
- یکشنبه
- 11
- فروردین
- 1398
- ساعت
- 12:31
- نوشته شده توسط
- ابوالفضل عابدی پور
ارسال دیدگاه