نه وار ایاقیمدن آچان
زنجیری یارب
نه بیر کسه وار حالیمون
تأثیری یارب
ای یوسفی اخلاص ائدن
زندان غمدن
چک بو غریبی ساحله
طوفان غمدن
بو توزلی یوز بو یاشلی گوز بو آغ محاسن
رد ایلمه بو بی کسین بو التماسین
من بی پناهین مستجاب ایله دعاسین
قورتار بو ظلمت خانه دن بو پیری یارب
خلوت یر ایستردیم اولا حاصل فراغت
معبودیمه تا ایلیم یالقوز عبادت
افسوس آلوب آرامیمی قید اسارت
شایسته گورمه چوخ منه تحقیری یارب
نه وار دیزیمده ای خدا طاقت قیامه
نه واقفم صبحه نه ظهره عصره شامه
اوغلوم رضایه یازمیشام اشکیله نامه
بُلمم نه اولدی علت تأخیری یارب
بیر بیله طغیان ایلمز ظلمنده ظالم
یوخ سندن ئوزگه حالمه زنداندا عالم
رحم ایله بیر یر قالمیوب جسمیمده سالم
جان اوستیم وار حالمون تغییری یارب
یوخدور سراقیم نه گجمدن گوندوزومدن
سنابن شاهک چوخ ووروب سیلی یوزومدن
اشکیله دل قانی اولور جاری گوزومدن
اقراره گلمز حالمون تقریری یارب
ای ایلین ارحامدن اطفالی خارج
ای چاره سیز لر دردینه حاذق معالج
زنداندا قالماز اون بیر ایل باب الحوائج
آخر بو مظلومین ندور تقصیری یارب
کُنده ایاقیمده خدا بوینومدا زنجیر
محبس رطوبی دور ز بس اولدوم زمین گیر
ائتمز ندن بو ناله لر هارونه تأثیر
گورمور مگر بو نالۀ شبگیری یارب
پیرم پرستاره بو گون وار احتیاجیم
نه وار یانیمدا محرمیم اوغلوم نه باجیم
صبر ایلرم هر محنته یوخدور علاجیم
بیچاره مظلومین ندور تدبیری یارب
چوخدان الهی حسرتم آزاد هوایه
صبحین نسیمی دگمیوب من بینوایه
نه آی سالار نورین نه گون بو غم سرایه
آزاد ایله بو یاره لی نخجیری یارب
هر شب یاتوب اطفالیمی رؤیاده گورَّم
بو خسته جانی یثرب بطحاده گورَّم
بعضاً گلوب اوغلوم رضا بغداده گورَّم
مبهمدی بو رؤیالرین تعبیری یارب
شکر ائت « کریمی » اولموسان دائم مکرم
لطف ایلیوب الله سنه اکثیر اعظم
البیت بیت فی الجنان اولموش مسلم
آلما الیمدن بو گوزل اکثیری یا رب
- یکشنبه
- 11
- فروردین
- 1398
- ساعت
- 15:22
- نوشته شده توسط
- ابوالفضل عابدی پور
ارسال دیدگاه