نئجه که بلبلی شیدا طراوتلی چمن ساخلار
بو رسمیلن اگر امن اولسا انسانی وطن ساخلار
ایاقین نیش خار اینجیتسه گلشندن کوسر بلبل
بوداغینده وئرر یر نازه باشلار یاسمن ساخلار
ولی بیر گون حسینه قالماسا شهرینده امنیّت
ویرار چوللرده خیمه آبروی پنج تن ساخلار
او بلبل تک حسینده دلخوشیدی قبر زهرایه
گوروب گر بی خبر گئتسه ئورک دردین علن ساخلار
بقیعه نصف شب گلدی گوزی یاشلی ئورک یاره
اگیلدی ئوپدی اول قبری که اسرار کهن ساخلار
ئورکلندی دئدی بیر یول منه سس وئر ننه زهرا
منی عشقون سفر اوسته ای اللرده ئولن ساخلار
بقیعین تپراقی صد حیف حسینه اولمادی قسمت
وجودون بو چولون هر ذرّه سین درّ عدن ساخلار
بو تپراق قوی سنیلن مجتبانی آلسون آغوشه
تراب کربلاده منله دلبند حسن ساخلار
حسینون واردی امّا بیر نئچه سندن تمنّاسی
یانیقلی سوزلری که قلبیمی بیت الحزن ساخلار
دوشر باشیم نه طوفانه او چولده سن که آگه سن
سولار گلزار طاها گللرین زاغ و زغن ساخلار
منای کربلاده ذبح اولار قربانلاریم یکسر
کمکسیز عترت نالانیمی دشت و دمن ساخلار
دؤنر نامه یازانلار قولیدن،عهده وفا ائتمز
یالین خنجرلریلن دوره می اهل فتن ساخلار
اوگون عباسیمون امدادینه مندن قاباق سن گئت
سینان باشی سینان سینون مبرّا هرندن ساخلار
یخلسا زینیدن قولسوز دوشر جسمی نه احواله
اگر ال اولماسا انسان نئجه سالم بدن ساخلار
و بیرده نصف شبده نصفی یانمش خیمیه باش چک
نئجه گور قورخوشان آهولری اول شیرزن ساخلار
یاریم گونده قوجالمش زینبه اوردا تسلّی وئر
دئنن قرآنی پاینده او قوللاردا رسن ساخلار
ئوزومده تکجه بیر کوینک نشانه ساخلارام سندن
منی اول کهنه پیراهن ائله شاه زمن ساخلار
گییرم اگنیمه اول کوینگی آخر وداعیمده
اگرچه زینبون قلبین بو ایش غرق محن ساخلار
رقیّم آغلاماز ائتمز گله گوشواره سین آلسام
گورر چون شاه ئوزی اگنینده کهنه پیرهن ساخلار
غرض هر سؤز دئدی زهرایه عاشوراده دوز چیخدی
حسین باش وئرسه ده عهد خدای ذوالمنن ساخلار
منی حیران ائدوب یابن الحسن جدّون بو ایثاره
ئورکده بیر سوزوم وار قیمتین اهل سخن ساخلار
بیری الله یولوندا هر نئیندن کئچسه ده آخر
اقلاً جان وئرن وقته ئوزونه بیر کفن ساخلار
دئدی پاره حصیر اولسا منه گودالیده بسدی
مگر حقّ عاشقی دلده حریم ما و من ساخلار
او قربانگاه عشقه گتدی آخر شیرخوارینده
ال اوسته گوردولر اول شاهی بیر طفل لبن ساخلار
گزور آواره الده گوهری بازار عشقینده
حجازین تاجری الده عجب درّ یمن ساخلار
وئروب ششماهه سربازه قوجاقدا شاه عالم یئر
دئیور یارب ئوزون بو گوهره شایسته قیمت وئر
ال اوزدوم شیرخواریمدن شرافت معتبر قالسون
اگر سن راضی سن نینک ربابیم قوی ملر قالسون
سعادت قلّه سین فتح ائتمگه سالک صعود ایستر
ئوزون ناظر اولان یرده نه قاضی نه شهود ایستر
بو قربانگاه تفتیده همان جدّیم دیین یئردی
قباقیمده تماماً لشکریم سان وئردی جان وئردی
نه امر ائتسون مطیعم ذرّه قلبیمده هراس اولماز
حسینه هر نئی سن بذل ائدوبسن ناسپاس اولماز
اماناتون که ائتدیم مسترد قلبیمده دینجلدی
الیم چیخدی بوشا تکجه گمانیم اصغره گلدی
اجل تیری گلوب پروازه تشنه حلقینی بیچدی
قوزی قربانیمی گتدیم لب دریاده قان ایچدی
منای عشقیمی تزئین ائدوبدور اصغرین قانی
قویوب سینای حیرتده خجل موسی بن عمرانی
خدایا سنّینه باخما سلامتدی سلیم اوغلوم
اگرچه بی تکلّم دی مکلّف دی کلیم اوغلوم
گرک قرآن آچا باب بقا تورات و انجیله
اودور ششماهه موسی سین ربابیم گوندروب نیله
اونی وئردی یو کابد نیله ایمن قالدی دشمندن
بشیکدن بو ئوزون آتدی حمایت ایلسون مندن
اگرچه خوش دگول عشّاق آرا تبعیض و فرق اولسون
سودان او امنیت تاپدی بو گلدی قانه غرق اولسون
اگر دریانی موسی قومینه خاطر شکاف ائتدی
بو قانلان شیعیانی نار دوزخدن معاف ائتدی
حریم قدسوه گلدی او نعلینی ایاقینده
بو قول باغلی گلوب کوی حقه بابا قوجاقینده
بحمدالله بالام فرعونیانه اولدی مستولی
گوزی آخر نگاهینده دئیوردی یفقهوا قولی
گلور اشباع اولا الآن بو ذرّه نور سینمده
باخور وجه اللهه ارنی دیینمور طور سینمده
قبول ایله بو قربانی سینوب قلبیم غمیم چوخدی
سنه لبیک اقرار ایلینمور چون دیلی یوخدی
بیلورسن کربلاده هر بلا گلسه شکیبایم
ئوزون وئر تسلیت الآن که محتاج تسلّایم
الولاندی ئورک گوردوم بو طفلین قانلی لبخندین
ایتیردیم ال ایاقیم آچمادیم قنداقینون بندین
دوتوب اوجومدا قانین بو سارالمیش صورته یاخدیم
قولی باغلیدی قنداقه بالام چرپندی من باخدیم
دوداقی تیتریوردی صبریمون سررشته سین کسدی
اوخی دوتدوم چکم بیردن گوز آچدی دیزلریم اسدی
بلا دشتینده محکومم بلی هر حالدا حاکم سن
بو اعظم درده قلبیمده نئجه دوزدوم سن عالم سن
نقدری ایلورم تلقین وجودیم لحظه دینجلمور
خیامه گئتمگه نیلیم بو حالیلن یوزوم گلمور
آلان یوخدور قوجاقیمدن بو طفلی دیده خونبارم
آناسیندان اوتاننام گورسه بو حالدا ندی چارم
نه نوعی سویلرم نازک بوغازین اوچ پر اوخ بولدی
نه نحویلن دیه بیللم ربابه گل بالون ئولدی
اسور دامه دوشن قوش تک ئورک دینجلمسه نیلیم
اگر تلّ اوسته زینب پیشوازه گلمسه نیلیم
گمانیم هئچ کیمه گلمور یانور اعماق احساسیم
نه قاسم وار نه اکبر وار نه ده غیرتلی عباسیم
- دوشنبه
- 12
- فروردین
- 1398
- ساعت
- 17:45
- نوشته شده توسط
- ابوالفضل عابدی پور
- شاعر:
-
مهدی قلندری اردبیلی
ارسال دیدگاه