گنه قراریمی شوقِ رُخ نگار آپارور
اُمید وصل یتر دلدن اِختیار آپارور
چمنده بلبلِ شیدا دیمه عبث دولانور
اونی گلین یاننا عشقِ آه و زار آپارور
شکسته بال و پرین شاخه و گل اوسته دوشر
کمال لذّتی له خطِ وصلِ یار آپارور
حجاز لحننی ساز ایلیوب فصاحت له
صفای قلبله بیر سِیر مرغ زار آپارور
مکانی شاخه و گل دلده شورِ عشق افزا
نه آفتِ گل و نه فکر روزگار آپارور
دوتوب ترانه سی یکسر سراچه چمنی
کوگلده کی کدرین سِیر جوی بار آپارور
خزان اولاندا گیدر صبر و طاقتِ بلبل
اَسَر سموم گلن عطری هر نه وار آپارور
چمن سولار سارالور گلشنون گِیدر حُسنی
طراوت گلی بو چرخِ کَج مَدار آپارور
هَزاره اوز باشنا ترکِ گلستان ایلمز
اونی کناره چمندن فشارِ خار آپارور
باخون حسینه نچه پر شکسته بلبل تک
جفا الی وطن ندن ایدوب کنار آپارور
عزیز فاطمیه بسکه عرصه تنگ اولدی
شهِ حجازی عراقه همان فشار آپارور
حرملرین باجسین خوردا قزلارین گوتوروب
اوز اختیاری دگل جورِ بی شمار آپارور
محمد حَنفیه اولوب دی مُستحضر
که قارداشی گیدوری خورد و هم کبار آپارور
اوزین یتوردی حضورِ امامه عرض ایلدی
بویور بو نوع سنی هانسی اِعتبار آپارور
فدا اولوم سنه گل گتمه کوفیه قارداش
جلالون ایلر عراق اهلی تار و مار آپارور
آتام کیمی سنیده الدوروله اَهل عراق
اگر چه نامه لر ایلوب اُمیدوار آپارور
اگر اوزون گیدی سن گیت آپارما اهل حرم
حرم آپارماقون اَلدن آلور قرار آپارور
حرم لرون باجیلار قوی مدینه ده قالسون
سنی که جذب ایلیوب جلوهء نگار آپارور
جوان لارون بلورم بند بند دوغرالار
اسارته حرمون شمر نا بکار آپارور
سکینه رحم ایله هاردا گوروب حسین سیلی
دوتوم یانین دادی عباس نامدار آپارور
که قورخورام سالالار قولارین ابوالفضلون
بو سوز خیاله گلور الدن اِختیار آپارور
مدینه دن گیدی سن اوزگه بر ولایته گیت
اگر حسین سنی بو حالتِ فکار آپارور
فرنگه گیت سنه چوخ اِحترام ایللّر
سنیله فخر بسی اَهل زنگ بار آپارور
بویوردی چاره سی یوخ اختیار اوزوم له دَگل
منی عراقه طرف حکمِ کردگار آپارور
حبیب بیله سووب تشنه قانی مه بویانام
او دور حسینوی شوقِ لقای یار آپارور
گرک اسیر اولا حقّ ایستیوب باجیم زینب
یانی جا شامه طرف بر بُلوک قطار آپارور
خرابه لرده گرک جان ویره رقیه قیزیم
اونی دمشقه همان تربتِ مزار آپارور
امامِ عصر بویوردی که صبر ایله قارداش
چتن دی هجر غمی لیک اِصط بار آپارور
خلاصه هادی عالم اولوب رَوانهء راه
حرم لرین باجسین بیله بلمه خوار آپارور
زَرینه دوزیدی اورتوک لری کجاوه لردن
جلال و شوکت له شاهِ کام کار آپارور
خانم باجلارینی مندورر کیجاوه لره
دیزین خم ایلوری عباسِ جان نثار آپارور
قلج لار الده جوانانِ هاشمی یکسر
نچه مُجلّله بانوی با وِقار آپارور
آناسی لیلنی هر یرده شبهِ پیغمبر
مِنَنده مَحمله ایلور اوزی سوار آپارور
سریه نون باشنا قاسمی دُونر دُولا نور
نه عزّتی له آناسین او گل عُذار آپارور
رباب اصغرینی گل کیمی اوپر ایگلر
نشانه حَرمَلیه طفلِ شیر خوار آپارور
اتور یره قوجاقندان اوزین علی اصغر
معاینه هوسِ تیرِ جان شکار آپارور
قَضا قباقه دوشوب پای قتله سرعتله
او کاروانی چکور لیل و النهار آپارور
خلیل وارثی تا، یتدی کَعبه عشقه
نه کَعبه کَعبه او کَعبیله افتخار آپارور
او وقت اولوب که تمامی فدالرین ویردی
او وقتی یاد ایلدوق جا دل انزجار آپارور
اوزیده ویردی سوسوز جان منای عشقنده
جداده شامه باشین فُرقه و شرار آپارور
حرم لرین هاموسی زینب آردی جان اَما
جوان لارین اوزی سلطانِ کام کار آپارور
جدا باشندا باشی بیر مه مُنور تک
سالوب دالنجا نچه باش نِجُوم وار آپارور
گوتورموری گوزینی بیر دم اهل بیتندن
همیشه تحت نظرده او شهریار آپارور
گهی باخاندا آخور قانلو گوزلریندن یاش
گورنده قیزلارینی دشمن اشکبار آپارور
ووراندا باش لارینا تازیانه اَهل ستم
امان کبارلره چاره سیز صغار آپارور
ولی تمام ینه پشت پناهیدی زینب
کیمه امان بس او زهرایه یادگار آپارور
بیری دیردی نه دن عمه ساربان منی بس
پیاده آبله پا بلکه زخم دار آپارور
بیری دیردی مگر عمه شامه چوخ قالوروخ
بزی بو سرعتله قوم بَد شعار آپارورر
مُفصل اولدی سوزون ایله مُختصر (صحاف)
جهاندا منطقی سوز وجه اختصار آپارور
- چهارشنبه
- 17
- شهریور
- 1400
- ساعت
- 11:33
- نوشته شده توسط
- یوسف اکبری
- شاعر:
-
مرحوم صحاف تبریزی
ارسال دیدگاه