محرّران احادیث عترت نبوی
مؤلّفان تواریخ آل مرتضوی
صحیفه ی اَلم و همّ و غمّ محنتده
رسالهٔ صحف محنت و مصیبتده
نچه روایتیله مجمع مصائبدن
بیان واقعی مذکور هر مطالبدن
حدیث معتبر اخباریله قیلوب توضیح
نه خوش بیان و مضامینیله ائدوب توشیح
نکات و رمزیله اسرارینه وئروب تفسیر
یازیلّا شرح معان و بیانه شرح کبیر
بودور ملخّص ضبط مصائب الابرار
عَلیٰ روایت مُحرِق عبارت الانوار
که چون حدیقه ی گلزار سیدالثقلین
بحار عصمت درّار مجمع البحرین
دُر یگانه ی بحرالمعارف صمدی
مقرّب حرم خاصّ درگه احدی
یگانه گوهر ایمان جواهر ایقان
شه سما ٕ بحار عوالم امکان
مقام و رتبه ده فرزند صاحب معراج
طریق عشقیده نهج حقیقته منهاج
دَرِ خزائن رحمت کلید کنز خفا
وجودی قطب زمان لنگر زمین و سما
سرور و قلب و جلا ٕ العیون پیغمبر
جلال و شأن و مناقبده وارث حیدر
سفینه ی غمی طوفان نوحه فلک نجات
دوا ٕ و حبّی حیاة القلوبه عین حیات
ریاض جنّتین ابوابینه آدی مفتاح
جمالی مجلس فوز و فلاح ایچون مصباح
مراد منتخب مقصد فروع اصول
عزیز فاطمه پرورده ی کنار رسول
ازلده فردیدی چون نور نقطهٔ توحید
یتوب او وقت گنه اختیار ائدوب تجرید
لباس کثرتدن روح تک مجرّد اولا
قالا او جسمی که محدت سراده سرمد اولا
حضوره ایستدی عباسی کای جوان دلیر
گل ای جمالی شب چارده سراج منیر
گل ریاض وفا سرو بوستان هنر
نهنگ بحر غضب پور ساقی کوثر
سفر تدارکی گور روضهٔ پیمبردن
علاوه کشف غم ایله دل مکدّردن
تهیه ی سفری ساز قیل نظامیله
رهِ رسوم و قوانین احترامیله
ملاحظه ائلیوب قیل کجاوه لر تعیین
بنات عصمت کبرایه هودج زرّین
مرتّب ایله اؤزون امر قیل غلاملره
حرم کجاوه لرین باغلاسونلا ناقه لره
کلام منطق و نهج بلاغتیله مقال
دُرِ ثمینِ جواهر کلامی عین زلال
نثار ایلدی چون دُرج دُر فشانیندن
خیالی جامع اولوب مجمع بیانیندن
بنا به حکم همایون واجب الاذعان
قیلوب متابعت امر سرور دوران
او دمده حاضر ائدوب ناقه های خوشرفتار
نظامیله دوزولوب باغلانوب قطار قطار
قطاره چکدیله هامون نورد ناقه لری
جهاز ناقیه حمل ائتدیلر کجاوه لری
قُباب نور او محمللر اوسته شاد زبان
اولوب ملائکه دورینده طَرَّقوا گویان
مهار ناقه الینده قاباقدا روح الامین
صاق و صولوندا قطارین گروه کرّوبین
دالینجا قافله ی حوریان باغ جنان
ادبله ال الی اوستونده صف چکوب غلمان
پیمبران اولوالعزم و اولیا ٕ الله
گَلوب مشایعته اوصیائیله، همراه
تمامه یتدی چو ترتیب کاروان جلال
او وقت سید بطحا شهنشه متعال
اراده ایلدی قیلسون وداع فاطمه نی
بیان ائده اونا بیر نحویله مقدّمه نی
دگلدی فاطمه آگاه بستر غمده
مریض و خسته خیالی بیر اوزگه عالمده
نه گوردی باشینون اوسته او بیکس و یاری
گلوب آتاسی اویاتدی او خسته بیماری
آچان زمان گوزونی باخدی بیر حبیب اوزونه
مریض،هجر تماشا ائدوب طبیب اوزونه
دوروب اوتوردی گوروب دردینین دواسی گلوب
قیزین عیادتینه مهربان آتاسی گلوب
ضعیف حالتیله که باشلیوب نوای حجاز
بیان حالینه آچدی زبان عجز و نیاز
دئدی بو حالیله سندن خجالتیم چوخدور
ایاقه دورماقا عفو ایله طاقتیم یوخدور
منیم عیادتیمه خوش گلوب صفا گَتدون
حیات تازه وئروب دردیمه دوا گتدون
بئله گَلولّه مگر ناخوشین عیادتینه
بئله مراقب اولالّار مریض حالتینه
شکایت ایلمرم لیک اولموشام دلگیر
بوگون منه آناسیزلیق چوخ ایلوری تأثیر
آناسیزام نظرونده او علّته خوارم
قبیله ایچره ذلیلم علاوه بیمارم
اگرچه بو مرضیمده کمال شدت وار
بو درده داروی وصلون شفادی صحت وار
یارالی دللری قلب امامی یاندیردی
کباب ائدوب اورگین حالینی دولاندیردی
تکلّم ایلماقا اشگ چشم اولور مانع
گره لننده نفس آه دل اولوب دافع
چو آهیله قاریشوق سینه دن اوجالدی سسی
اولوب مریضه سینین همزبان و هم نفسی
ای بستر فراقده بیمار فاطمه
درد و بلای هجره گرفتار فاطمه
وار بیر سؤزوم نهانی سنه اولماسان ملول
راز نهانی ایلرم اظهار فاطمه
ایام وصل گچدی یتیشدی زمان هجر
یتدی سنیله آخره دیدار فاطمه
وار بیر اوزاق سفر یولوم اوسته مسافرم
سمت عراقه گئتماقا ناچار فاطمه
صبر ایله چوخدا آغلاما یاندیرما قلبیمی
توکمه سرشک دیدهٔ خونبار فاطمه
حقون وار آغلاماقدا ولی صبری قیل شعار
هرچند هجره صبردی دشوار فاطمه
لابدسن گرک قالاسان سن مدینه ده
وار قالماقوندا بیر نچه اسرار فاطمه
اوّل بودور که باب سفر سنده گورمورم
باعثدی بو نقاهت آزار فاطمه
بیر سرّی ده بودور کی پیاده گئدنمه سن
شامه اسیر قوم ستمکار فاطمه
زینب گرک یانیمجا گئده اهل بیتیمه
اولسون خرابه لرده پرستار فاطمه
بیر آیریلوق خبری آلدی طاقتین الدن
گلوب نوایه چکوب آه آتشین دلدن
عرض ایلدی زمانه ده سرداریم ای بابا
غم بسترینده غم گونی غمخواریم ای بابا
یوخ منده تاب هجروه مشکل دوام ائده
درد فراقوا بو دل زاریم ای بابا
گئتسن آپار یانونجا آنام یوخدی ناخوشام
کیمدور قالان یانیمدا پرستاریم ای بابا
تأخیره سال و یا سفرون گون بگون منیم
یوز دوندروبدی شدّته آزاریم ای بابا
شاید بو عنقریب اجل درک ائده منی
تاپشور مزاره سن منی سالاریم ای بابا
اولدی علاوه دردینه بیر درد بی دوا
عرض ائتدی ای قیلان منی مین درده مبتلا
غم بسترینده خسته و بیمارم ای بابا
رنجورم و علیل و دل افکارم ای بابا
بیر درد بی دوایه منی گردش فلک
ائتموش دچار علاجینه ناچارم ای بابا
یوخدور امید من بو مرضدن خلاص اولام
بیر بیله محنته کی گرفتارم ای بابا
ئولمک گلوبدی شأنیمه الحق حیاتیدن
مأیوسم ایمدی مرگه سزاوارم ای بابا
گفتاره گلدی پادشه خطّه ی حجاز
گویا بو دللریله اونا ائتدی کشف راز
صبر ایله ای علیله و بیچاره فاطمه
صبر ایلماقدان اؤزگه ندور چاره فاطمه
چوخ غصه ایلمه مرضی غصه آرتیرور
چون غصه پرورش وئرور آزاره فاطمه
جدّه ن قالور یانوندا پرستار اولور سنه
جانسوزدور آنان کیمی همواره فاطمه
زینب یانیمجا گتمسه کیم غمگسار اولور
ویرانه لرده عابد بیماره فاطمه
قارداشلارین امان سفر اوسته عمولرین
عباس و عون و اکبر مه پاره فاطمه
فال نکو دگل بو قدر آه و زار ائدوب
توکمه سرشک صفحه ی رخساره فاطمه
چون اکبرینده گیماقینی بولدی آشکار
آرتوردی شورین عرض ائدوب ای باب تاجدار
فکر ایله بیر علاج منه سروریم بابا
اندوه و غصه دن اریوب پیکریم بابا
چارم ندور یانور اورگیم بیر قبیله دن
قالمور یانیمدا بیرجه نفر یاوریم بابا
تأثیر ائتمیوب آناسیزلیق بوگون کیمی
مدّتدی کیم وفات ائلیوب مادریم بابا
ایمدی ائدر منه آنامون ئولماقی اثر
بیربیر بوگونده تازه لنور غملریم بابا
باری بیریسی عمه لریمدن مدینه ده
یابیر نفر یانیمدا قالا خواهریم بابا
هئچ کیمسه تیره بخت منیم کیمی اولمادی
گوردی نه لر زمانه ده بو گوزلریم بابا
قارداش فراقی هجر پدر فرقت عمو
یتمز دئسم نهایته حسرت لریم بابا
تاب ایلیم اگر هامی درد و مصیبته
بیر درده تاب ائتماقا یوخ یاوریم بابا
گتسه مدینه دن منه لازم دگل حیات
ماه مدینه اکبر گل پیکریم بابا
بو طرز سؤزلریلن اول علیله ی بیمار
ائدردی درد دل بی قرارینی اظهار
گهی سکوتده غم بسترینده محنتدن
چکردی آه جگر سوز فرط حسرتدن
شرار آهی ووروب خرگه سپهره شرار
ائدنده ناله گلوب نالیه در و دیوار
ائدنده صفحه ی رخساره خون دل جاری
وئرردی شاه شهیدان بو نوع دلداری
سنی حمایت ظلّ خدایه تاپشوردوم
ائت محافظت کبریایه تاپشوردوم
وئروب زلال مقالیله قلبینه تسکین
ائدوب او زار و علیلی وداع باز و پسین
دئدی بابا گئدوسن عرضیمی ائشیت باری
سن ایمدی یادینه سال اکبرین من زاری
منی مباد فراموش ائده خیالیندن
مریض هجر اولا محروم اونون وصالیندن
اونا بو منزلیم اولماز اگر چه شایسته
نولور گلوب منی بیرجه گوره ایاق اوسته
قبول ائدوبدی اونون خواهشین امام انام
الین قویوب گؤزی اوسته یریندن ائتدی قیام
گورن زمان آتاسین فاطمه روانه ی راه
چخوب مشایعته اوتلی سینه سیندن آه
دالینجا هر سفرینون ائدلّه آب فشان
ائدردی فاطمه گوزدن سرشک ناب افشان
ائدوب یانان اورگین اوتلی سینه سینده سپند
آلیشدی شعله ی آهیله اولدی دود بلند
قدم کناره قویوب حجله دن ولی الله
آپاردی فاطمه نین صبر و طاقتین همراه
یتیشدی گوردی دوروبلار جوانلار آماده
علیّ اکبره دوشدی گوزی او اثناده
بویوردی فاطمه نین وار علی سلامی سنه
سلامدن صورا بیر مختصر پیامی سنه
فراش محنت و فرقتده بی قرارون دور
تیکوبدی گوز یولوا دورما انتظارون دور
زیاده مایلیدی شوق وصل دیداره
همان او شوقیله یوز قویدی منزل یاره
نه گوردی بستر غمده او ناتوانی یاتوب
اولوبدی گل یوزینون رنگی ارغوانی یاتوب
غم ایچره جسمی نهان جهان شبیهی جسم ایچره
نهان غم ایچره عیان جسم ایچینده جانی یاتوب
باخاندا غم گورونور آشکار جسمی ایتوب
ز بسکه واردی بدیهی غم نهانی یاتوب
هلال تک اریوب هاله ملال ایچره
ملال محض قالوب جسمیدن نشانی یاتوب
ضعیف اولوب بدنی مویه دن دونوب مویه
سالوب یوزینه سیه زلف سایبانی یاتوب
قوای جسم دوشوب قوّه دن مقوّا تک
قیام ائتماقا یوخ طاقت و توانی یاتوب
علیل و خسته وجودی قالوب وجودیندن
نشانه محض رگ و پوست و استخوانی یاتوب
نفس چکنده گلور ذکر کلمه ی یا دوست
به سان نی اوجالور ناله و فغانی یاتوب
چکنده آه بلند آهیدن اولور یاهو
چخوبدی نُه فلکه بانگ الامانی یاتوب
یوموب گوزینی گئدوب هوشه هر دولب خاموش
دوشوب تکلّم گفتاریدن زبانی یاتوب
سرشگ چشمی آخوب یوزده یاعلی یازیلوب
ز بس علی آدینی ورد ائدوب لسانی یاتوب
گوروب وصالده تأخیر بو خیالیله
مگر گوره یوخودا اکبر جوانی یاتوب
گورن زمان یوخودا اکبری باشی اوسته
گوزون آچوب باشی اوسته باخاندا آهسته
نه گوردی طالع ناساز سازگار اولموش
او خوابیدن اویانان بخت اونیلا یار اولموش
یریندن ایستدی هرچند ایلسون حرکت
میسّر اولمادی فی الفور ال وئروب رقّت
قویوب یوزینی علی اکبرین قدملرینه
دیردی درد دلین همزبان برادرینه
که ای سالان منی گوزدن گوزون فداسی علی
منی مریض ائلین دردیمین دواسی علی
نه جان لیاقتی وار ای گُل حدیقه ی ناز
ائدم قدم لرون آتدا بو جانی پای انداز
بو منزل غم و محنت فزایه خوشگلدون
بو غصه خانه مصیبت سرایه خوشگلدون
فدا قدملریوه سالموسان عجب یاده
عیادت ائتماقا بو مبتلایه خوشگلدون
اوجالدی عرشه سر فخر باشیم اوسته سنون
نهال سرو قدون سالدی سایه خوشگلدون
مریض فرقتوم درد عشقدور مرضیم
یتیشدی وصلیله دردیم دوایه خوشگلدون
خیال فرقتویله علیله ام قارداش
ائدوب فراقی مبدّل لقایه خوشگلدون
چوخ التفات ائلیوب گلموسن عیادتیمه
بو گلماقون سبب اولدی چوخ استراحتیمه
اگر گلوب بو قراریله گونده بیر ساعت
یانیمدا اگلشوب ائتسن تحمل زحمت
نچه گونه کیمی صحّت تاپار بو آزاریم
اولور خلاص مرضدن بو جسم بیماریم
گلوب او عاشق هجران کشیده گفتاره
شکایت شب هجران ائدردی دلداره
یارالی دللریله قلب یاره ، یاره ووروب
بو یاره کارگر آرتوق اولوب دل یاره
گوروب کی مطلب بو بیماره عکس اولوب معلوم
وقوع واقعه دن بی خبردی بیچاره
زمان هجر تمنّای ولی وار اما
قالور زمانه ده حسرت اولونجه دیداره
گوروب کمالی اونون غیردور علی اکبر
خیال ائدوب که گتورسون بو سرّی اظهاره
گنه ملاحظه ائتدی کی آیریلوق خبرین
نه نوع شرح ائلسون اول علیلهٔ زاره
دلی دوتولدی دیلنده دینمدی دلدن
اودم اجازه وئروب اشک چشم خونباره
کی شرح قصّه هجرانی چشم خونباری
سرشگیله رقم ائتدی بیاض رخساره
خط فراق خطیندن اوخوندی آیهٔ هجر
یازیلدی لوح خیال علیل بیماره
دئدی بو آغلاماقون باعثی ندور قارداش
گوزون فداسی اولوم ایله سرّینی منه فاش
سن آغلاما سنی هرگز گورنمرم گریان
ائدر بو آغلاماقون گوگلومی لبالب قان
زبان حالیله وئردی جواب فاطمیه
ائدوب بو نوعیله گویا خطاب فاطمیه
ای شمع بزم محنته پروانه فاطمه
ای غصه دن دونن جگری قانه فاطمه
آلما خبر بو آغلاماقیم بی سبب دگل
چون گوزیاشی دلیلیدی هجرانه فاطمه
گل بوته سینده نالهٔ بلبل وئرور خبر
چون آفت خزانی گلستانه فاطمه
هر وصل ایچون فراق دور عالمده عالمی
محنت سرا یازوبدیلا غم خانه فاطمه
ایستر فلک جدا ائلسون یاری یاریدن
لعنت گله بو عادت دورانه فاطمه
بیر اؤزگه صورت آینهٔ دهر گوسترور
یتدی وصال گونلری پایانه فاطمه
آلدی بو آیریلیق خبری اختیارینی
بی اختیار او دم گلوب افغانه فاطمه
عرض ائتدی وئر نشان منه بیر چاره یاعلی
تسکین وئریم اونیلا دل زاره یاعلی
احوالینی سوروشماقیلان قوم و اقربا
دلدارلوق گرک وئره بیماره یاعلی
اما بو حالت مرضیمده عجب خبر
وئردون من علیل دل افکاره یاعلی
بیر شرطیله که ترک سفر قیل سفر آدی
هرگز گتورمه سن دیله گفتاره یاعلی
هرگون بو گون کیمی یوزوه باخمیام سحر
یا شام اولور گونوم گئجه تک قاره یاعلی
تأثیر ائدر داش اولسا اورک سختیدور گلر
چون سنگ خاره بو دل صدپاره یاعلی
بو آرزوئیله فکر عالمینده من هردم
ائدوم اؤزوم اؤزومی شاد گوگلومی خرّم
اگر اجل منی درک ائتسه عترت اطهار
عزا دوتوب منه قویمازلا تعزیم اولا خوار
جنازه می گوتوروللر جلال و عزّتیله
دوتالّا یاسیمی قوم و قبیله حرمتیله
دم مماتیده جان وئرمگیم اولور آسان
ائدر آتام باشیم اوسته تلاوت قرآن
گلونجه یثربه سن قورخورام اجل مهلت
او قدر وئرمیه وصلون اولا منه قسمت
قبول ائدوب سوزومی سایه باشیمه سالاسان
بابام گئدر نچه گونده مدینه ده قالاسان
اگر وفات ائلسم قوی اؤزون مزاره منی
یتور بو فخریله عالمده اعتباره منی
ئولن زمان اولاسان باشیم اوسته حاضر اگر
گوزومده قالماز ئولم حسرتیم علی اکبر
وئروب جواب آغلاما ای مهربان باجی
ای آتش فراقه یانان ناتوان باجی
معذور دوت منی بو سفردن قالانمارام
صبر ایله بی ثمردی بو آه و فغان باجی
امّا سنیله شرط ائدرم ایمدی قوی گئدوم
هر وقت کوفیه یئتیشه کاروان باجی
اوندا گلوم سنی آپاروم بیرده شرطی وار
وئرسه مجال خولی و شمر و سنان باجی
هرگز خیال ایلمه ترک وفا ائدم
گر بی وفالیق ائتمیه لر کوفیان باجی
یتسم عراقه نامه یازوب یوللارام سنه
اول نامه دن اولار سنه حالیم عیان باجی
منده بولورسن اولمادی تقصیر گلماقا
کفّار کوفه وئرمدیلر چون امان باجی
زلف سیاهه قصّه ی هجرانی مو به مو
شرح ایلرم شهادته شرح و بیان باجی
پیک صبا بو طرّه ی عنبر فشانیدن
نکهت آلوب سنه گتورر ارمغان باجی
قالماز به غیر نام نشانیم زمانه ده
ساخلا او قانلی کاکلی مندن نشان باجی
هر صبح و شام وئرّم اجازه «حقیریمه»
ائتسون بو اسم اکبری ورد زبان باجی
- پنج شنبه
- 15
- فروردین
- 1398
- ساعت
- 19:30
- نوشته شده توسط
- ابوالفضل عابدی پور
ارسال دیدگاه