آلدیم خبر عشقیمدن، سرّ اوچ شعبانی
گوش دله ذکر ائتدی، ناگاه بو عنوانی
وار سوّم شعباندا، عالی شعف اعلانی
بیر عطرلی گل آچمیش توحید گلستانی
خوش عطریله دولدورموش، بو عالم امکانی
گل صاحبی پیغمبر، زهرادی نگهبانی
بیر گلدی ائدر رشگین، گلشنده اولان گول لر
بیر گلدی که زلفیندن، شرمنده دی سنبل لر
بیر گلدی که عشقیندن، شور اوسته دی بلبل لر
عالمده اونا اولموش، وابسته هامی دل لر
تسخیر ائلیوب عشقی، بو محور دنیانی
دنیا بوئی عاشقدور، سرگشته و حیرانی
بیر گلدی که عالمده، خوش نشو و نما ایلر
بیر گلدی دوداقیندن، تر غنچه حیا ایلر
بیر گلدی بهشت اوندان، مین کسب صفا ایلر
بیر گلدی که آفاقی، پُربوی وفا ایلر
مدهوش ائدن عُشّاقی، خوش نکهت و ریحانی
خوش عطرینین عالمده، جانلار اولا قربانی
بیر گلدی اونا هرگز، بیر شبه و بدل اولماز
گل چوخدی بونا امّا، همتا و مثال اولماز
دنیانی گوزل دوتسا، بیر بیله گوزل اولماز
چوخ شَأنیلی وار بیله، بیر شَأنی اجلّ اولماز
بیر شاهد زیبادور، چوخ وار شرف و شانی
گورموبدی جهان بیله، بیر شاهد زیبانی
هر جلوه سی شرح ایلر، مین نکتۀ مستوری
مین نرگسی مست ایلر، بیر نرگس مخموری
خورشیدی خجل ایلر، آنّندا اولان نوری
شوریده ائدر خلقی، باشینده اولان شوری
بی پرده تانتدیرّام، بو عاشق شیدانی
اؤز آدی حسین، دینین، دلباخته قربانی
امّا نه حسین جدّی، مادح اؤزی ممدوحی
هم میر عرب جانی، هم فاطمه نین روحی
احکام خداوندین، هم مُجمل و مشروحی
هم کشتی قرآنین، جان بر کف اولان نوحی
همّتله ائدن خاموش، هر موجۀ طوفانی
طوفاندان آلان سالم، قرآنی و قرانی
دانشکدۀ دینده، آزاده لره استاد
میدان تعارضده، بیر صاحب استعداد
کاخ ستم و جهلی، نهضتله ائدن برباد
سلطان عدالت جو، تاجِ مللِ آزاد
آزاده لرین فخری، فرزانه لرین شأنی
زنده ائلین قانی، تاریخ مسلمانی
دلباختۀ قرآن، دین عاشق و جانبازی
دین اوسته اولان باشی، سرنیزه سرافرازی
نهضت یارادان باشدا، یتمیش ایکی سربازی
دنیایه سالان لرزه، بیر نهضت ممتازی
قانیله ائدن صادر، علم و عمل اعلانی
اعلانی ائدن احیا، انسانی و انسانی
وقت اولدی قدم قویسون، بو عرصۀ دنیایه
لاریبدن امر اولدی، فردوسده لعیایه
باشدا نچه حوریّه، گئت منزل زهرایه
اول قابله فخریله، سن دختر طاهایه
دوت زهرۀ زهرادن، اول مهر درخشانی
انوار حسینیله، دنیا اولا نورانی
گور قابله نین شأنین، باخ عزّت مولوده
گور حضرت زهرانی، باخ چاتدیقی مقصوده
دنیایه حسین گلدی، باخ طالع مسعوده
قویدی یره اؤز آنّین، شکر ایلدی معبوده
ذکر ائتدی ازل دلده، نام حف یکتانی
گوستردی نمایان بیر، روحیّۀ روحانی
یعنی که حسینم من، شوریدۀ عالی جاه
هر یرده اولام عشقِ، جاناندی منه همراه
معنای حقیقتدن، دنیانی ائدن آگاه
مشهور ابی عبدالله، معروف فنا فی الله
ابقا یارادان دینه، دین اوسته آخان قانی
توحیده ائدن گلشن، بیر قانلو بیابانی
زهرا اونا باخدوقجا، دل مهری گلوب جوشه
بلبل تک اولوب مونس، اُول غنچۀ خاموشه
سالدی بشیگه گاهی، جان تک آلوب آغوشه
گه یوز یوزینه قویدی، تا اخذ ائلسون توشه
گه اؤپدی محبّتله، لعل لب خندانی
گه ایگلدی بیر گول تک، اُول نوگل رعنانی
گه گوردی که ناز ایلر، گهواره پناهینده
دوزموش عرق اولدوز تک، اؤز جبهۀ ماهینده
مین پیچ بلا واردی، هر موی سیاهینده
گوز محو تماشاسی، بیر طرز نگاهینده
گوز دویموری گوردوقجا، اول سرو دل آرانی
حیرتده قویور مطلق، ارباب تماشانی
«تائب» بو گلین گئتدی، سوز بدو بهارینده
زهرا یوزینه گلدی، مرضیّه جوارینده
مین موج بلا گوردی، اؤز چشم خمارینده
یاد ائتدی خزانیندن، بیر نهر کنارینده
بیر یر که دوشر اوردا، گل پیکر خندانی
قانیله اولان سیراب، لعل لب عطشانی
- پنج شنبه
- 22
- فروردین
- 1398
- ساعت
- 10:25
- نوشته شده توسط
- ابوالفضل عابدی پور
- شاعر:
-
صادق تائب
ارسال دیدگاه