زادۀ حیدرم سلطان عشقم
قلبلرده اسن طوفان عشقم
جدّیمین شأنینه نازل دی قرآن
منده شیرازه سیز قرآن عشقم
((چاره سیز قالانلار – دردیلن یانانلار
سسلسون ئورکدن – مولا حسین جان))
گوردی تا وجهیمی یوسف اوتاندی
گویده عیسی منه پرچم دوتاندی
قویمارام آتش دوزخده یانسون
کیم منیم آتش عشقیمده یاندی
((آدیمی دیینلر – حاجت ایستیَنلر
سسلسون ئورکدن – مولا حسین جان))
مرقدیم خاک پاک کربلادور
محفل طاعت و بزم عطادور
تربتیم توتیا دور چشم حوره
آند اولا حقّه هر درده دوادور
((حسرتین چکنلر – اشک غم توکنلر
سسلسون ئورکدن – مولا حسین جان))
هاشمی سیرتم مهسا عذارم
نهضت عشقه من بنیانگذارم
کعبه دن باشرف خلق اولدی قبریم
کعبه دورت گوشه،شش گوشه مزارم
((غمده غرق اولانلار– گول کیمی صولانلار
سسلسون ئورکدن – مولا حسین جان))
کربلا دردی ، دوز قدّی خم ایلر
عالمی غرق اندوه و غم ایلر
نه ئوزوم نه باجیم حتی او یرده
شیرخوارمده درده مرهم ایلر
((قبریمی گورنلر – لذتین بولنلر
سسلسون ئورکدن – مولا حسین جان))
قویموشام باشیمه تاج شرافت
معدن عزتم کان کرامت
دردین اولسا مطبّیم کربلادور
ایلرم چاره سیز دردی طبابت
((قاپیمی دوینلر - رخت غم گیینلر
سسلسون ئورکدن – مولا حسین جان))
پرچمیم تا بو دنیا وار اسندی
ریشۀ ظلم و بیدادی کسندی
خلقتین علتی مندن علاوه
مرتضی فاطمه طاها حسندی
((عزت آختارانلار - شوکت آختارانلار
سسلسون ئورکدن – مولا حسین جان))
یاز « مصیّب » بلاغت چنگییم من
شعریوین لذت و آهنگییم من
موج توفندۀ دریای عشقم
کربلا هنگینون سرهنگییم من
((عشق اوخون ساچانلار– اللرون آچانلار
سسلسون ئورکدن – مولا حسین جان))
- جمعه
- ۲۳
- فروردین
- ۱۳۹۸
- ساعت
- ۱۴:۲۴
- نوشته شده توسط
- ابوالفضل عابدی پور
- شاعر:
-
محمد علی مصیبی
ارسال دیدگاه