آلوبدی غم منی اصحاب مهربانیم ئولوب
نظاره بیر یئره قیل گور نچه جوانیم ئولوب
دولانموری دیلیم آغزیمدا تا دیم سؤزومی
زبسکه غالب اولوب تشنه لیک،زبانیم ئولوب
بابام شبیهی اولان جسمیم ایچره جانیمدی
نئجه ویروم قلج اکبر ئولنده جانیم ئولوب
قالوبدی اصغریمون قانی اللریمده نشان
گلوم الیمده سولوب مرغ آشیانیم ئولوب
گوزوم ایوینده باتوب قانه نوجوان قاسم
صنوبریم یخیلیب،سرو بوستانیم ئولوب
بو هولناک بیاباندا قاطعیم پوزولوب
دوشوبدی قولّاری سرخیل کاروانیم ئولوب
دوزلموری داخی عباسدن صورا قدّیم
بئلیم سنوبدی که سردار کامرانیم ئولوب
نگون اولوب علمیم دشمنیم ایاق گوتورور
ائدلّه قتلیمه جرأت که پهلوانیم ئولوب
او دم که شمر منی ئولدورر سکینه دیر
او بلبلم که گلوم سولدی باغبانیم ئولوب
- سه شنبه
- 11
- آذر
- 1399
- ساعت
- 22:34
- نوشته شده توسط
- یوسف اکبری
ارسال دیدگاه