اگر روح القدس دوتساالیمدن
نثار یار اولار گوهر دیلیمدن
سوزى گول ایلرم محفل بزنسین
نگاریم اگلشن محمل بزنسین
نه محفل یانه محمل، دل بزنسین
ملک لردسته دسته نازل اولسون
اولاردا فیض عشقه نایل اولسون
سولا گر غنچه، خندان ایلرم من
بوبزمى بیرگولوستان ایلرم من
چتینده اولساآسان ایلرم من
بهارى فصل پاییزه گتورّم
واریمدىدیلده انگیزه گتورّم
داراسین ساچلارین سونبول چمنده
ترانه باشلاسین بولبول چمنده
بزنسین اویناسین هرگول چمنده
گوزل بیرموسیقى چالسین بولاغلار
او آهنگیله ال ورسین اوشاقلار
گرگ معلوم اولا هر نیک و زشته
گله بوبزمه جنّتدن فرشته
دوباره اولمیامایل بهشته
بو یرده انبیاده حاضر اولسون
زآدم تابه خاتم ناظر اولسون
دُرارین خامه توکسون دفتراوسته
عرضده عارض اولسون جوهراوسته
سپولسون بزم یاره زر زر اوسته
گل اى آغ بیرچگیم یاندیر اوزرّیک
گل اى آغ سقّلیم سن سویله تبریک
گورن به به دئسون بوشوق و شوره
کلیم عشق گلسین کوه طوره
بورونسون جامه ى نور و سروره
تمنّاایلسه دیدار یارى
بدون «لَنْ» بوگون گورسون نگارى
منه چون اهل دل مجذوب اولوبدى
سوزوم دیلرده چوخ مرغوب اولوبدى
تخیّل توسنى مرکوب اولوبدى
قلاع قافیه فتّاحى ام من
بودور فخریم حسین مدّاحى ام من
اگرچه سوزلریم چوخ ساده اولدى
ولیکن بوردا جاافتاده اولدى
اثرقویدى هامى آماده اولدى
وئروم بیر مژده احباب حسینه
که گئتسین دیلّرى باب حسینه
بودورشرطى که هاى سالسین جوانلار
حسینون درگهین چالسین جوانلار
اوشهدن مشتولوق آلسین جوانلار
کیمین اولسیدى اولادى، او گونلر
قاپوسین داشلیاردى ایستینلر
بوگونده عترت طاها سووندى
که اهل یثرب وبطحاسووندى
گولومسوندى حسین لیلاسووندى
بوگونده چون گلوب دنیایه اکبر
دیورلّراوخشیور طاهایه اکبر
دئمیشدیم من ربیع الاوّل آیى
یارانمازمصطفانین بیرده تایى
اولانمازهئچ کیمین بیربیله پایى
سوزیمى من دالى آلاّم عیاندى
چون اکبر عین پیغمبریاراندى
بنى هاشم دیارینده گوزآشدى
ابالفضل تک آلاگوزقاره قاشدى
باباسى مرتضائیلن آداشدى
على نون آدى هر آدّان گوزلدى
نبات وقندوشکردى عسلدى
اوگون که دام عشق یاره دوشدوم
چوله مجنون کیمین آواره دوشدوم
دولاندیم کوچه وبازاره دوشدوم
سوتک، سئل تک هایانه گلدى آخدیم
گورنده هرگوزل دقّتله باخدیم
بوسوزده قلبوى سالماملاله
خوشوم گلمزمنیم چوخ قیل وقاله
خطادورسن دئسون باخماق جماله
جوابونده دئسم بیله روادى
جمیله باخماماق عین خطادى
باخوردوم دلبره همتا گورم وار
گل پیغمبره همتا گورم وار
علىّ اکبره همتا گورم وار
که گوردوم یوخدى مثلى، بى بدلدى
على اکبر گوزلّردن گوزلدى
باخیشدان اوو، یریشدن کبک صحرا
سوزوندن بال، قدیندن سرو رعنا
دوداقدان غنچه، یوزدن گولدى گویا
حسینون بوگولون گرگورسه بولبول
دییریوخ آیرى گول، تنهابودور گول
ائله بیرقدّوقامت واردى بوندا
ائله وجه و وجاهت واردى بوندا
ائله حسن وملاحت واردى بوندا
گلوب گورسه بونى یوسف پیمبر
دییرمندنده گویچکدى بواکبر
وئر اى حق بو پیامى جبرئیله
یتورسون فورى ابراهیم خلیله
که هاجر زینت ائتسین اسمعیله
بورا گلسین، نسیم عشق اسیلسین
علىّ اکبره قربان کسیلسین
الهى یوسف کنعاندى بو؟یوخ
ملکدور بو و یاغلماندى بو؟یوخ
چخوب سیره مه تاباندى بو؟یوخ
دینمم من نجه دلبردى اکبر
دیه بولّم فقط اکبردىاکبر
همان اکبردى پیغمبرنشانى
که روشن ایلدى نار قُرى نى
هدایت ایلسین گمراه اولانى
نیه؟ چون نورمصباح الهدادى
سلیل مصطفاو مرتضادى
همان اکبردى که کرب وبلاده
گئدوبدورهامّیدان اوّل جهاده
گلوب اخیامه نعشى بیرعباده
حسینى بیرائله احواله سالدى
ئولونجه الّرى قوینونداقالدى
همان اکبر همان نیکونسبلى
على آدلى همان اکبر لقبلى
ادبلى دور ادبلى دور ادبلى
اوزانمازدى آتانین محضرینده
مگر بیریول، اودا قان بسترینده
بشیرا شعریوه وئرمه ادامه
اگرچه ایستیوریازسین بوخامه
سوزى تشریح ائتسین خاص وعامه
نظرده آلگلان پیر و جوانى
گنه بایراملیق ایسته کربلانى
- چهارشنبه
- 4
- اردیبهشت
- 1398
- ساعت
- 10:30
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه