ای عاشق نیکو سیرِ شبه پیمبر
وی شیعهٔ پرشور علی ساقی کوثر
کلیّه سماوات و زمین اولدی منوّر
یعنی آنادان گلدی وجوده علی اکبر
اکبر نجه اکبر/پیغمبره بنذر
تا نور جمال علوی جلوه گر اولدی
بیر بزم صفا عالم امکاندا قورولدی
حق پرچمی دربار ولایتده ورولدی
یعنی آنادان گلدی وجوده علی اکبر
الله بیر اوغول ائتدی عطا سرور دینه
عنوان مسرّت یتیشوب اهل یقینه
دربار حسین فخر ائلدی عرش برینه
یعنی آنادان گلدی وجوده علی اکبر
هاتف یری وار اولسا همین باره ده گویا
چون اولدی حسین صاحب فرزند دل آرا
آفاقی معطّر ائلدی اول گل زیبا
یعنی آنادان گلدی وجوده علی اکبر
تا ظاهر اولوب گوهر گنجینه ی اعظم
چوخ وئردی صفا مقدم مولود مکرّم
گویا گورونوب صورت پیغمبر اکرم
یعنی آنادان گلدی وجوده علی اکبر
عاجزدی دیلیم وصف ائدم اول ماه لقانی
حیرتده قویوب واقعه سی کون و مکانی
مولودی مجلّل ائلدی ارض و سمانی
یعنی آنادان گلدی وجوده علی اکبر
بیر نوع تلألو ائدوب اول نور درخشان
قالدی بولود آلتیندا سماده مه تابان
لیلانی سرافراز ائلدی رحمت رحمان
یعنی آنادان گلدی وجوده علی اکبر
هر خلق اولانون خلقتینون واردی اصولی
بی مثل یاراتموشدی خدا شبه رسولی
قویدی متحیّر هامی اوهام و عقولی
یعنی آنادان گلدی وجوده علی اکبر
«دلکش»بو سوزون واردی پسندیده مقامی
محشرده توجه ائلسون عصرین امامی
آخرده ده تکرار ائله اوّل کی کلامی
یعنی آنادان گلدی وجوده علی اکبر
- چهارشنبه
- 4
- اردیبهشت
- 1398
- ساعت
- 10:46
- نوشته شده توسط
- ابوالفضل عابدی پور
- شاعر:
-
مرحوم احمد رمضانی
ارسال دیدگاه