صاحب اجلال و شرف جلوه وجه الحسنم
منتَظَرِ منتظِران مهدی صاحب زمنم
نیمه شعباندا گلن جلوه لی مولود منم
منجی دهرم بیلیسوز مهدی موعود منم
زاده نسل و شجر احمد محمود منم
من بشرم کیف بشر بنده مسعود منم
هست منم بود منم وعده معبود منم
لطف منم جود منم غایب موجود منم
رود منم عود منم نغمه داوود منم
خیر منم سود منم کعبه مقصود منم
کیمدی وئرن جامعه نین وضعینه بهبود منم
تیغ عدالتله ائدن ظالمی نابود منم
حامی ناموس بشر ظلم ائوینه ریشه کنم
عصمته سرلوحه منم سهو و خطادن بَریَم
میکده معرفتون خاتمه سیز ساغریم
عدل و عدالت گویونون ماه ملک منظریم
جدیمون آئینه سیم فاطمه نین دلبریم
کنز نهانم صدف حجب و حیا گوهریم
عالمه اعلان ائدورم شیعه لرین رهبریم
اوچ یوز اون اوچ یاوریمون رهبریم سروریم
مهدی بیا مهدی بیا نغمه سینه مشتریم
کیم منه لبیک دییه دایم اونون یاوریم
حیدره لبیک دیون منده ئوزوم حیدریم
پیرو سر خط ولا راه علیدن گئدنم
حیدره لبیک دیین راه ولایتده یاشار
شان و شرف صاحبیدی اوج سعادتده یاشار
ذلته اگمز باشینی دائمی عزتده یاشار
شیعه ی باغیرت اولار سنگر غیرتده یاشار
امتیمون یاوریدور سینه ملتده یاشار
جدیمون عشقیله گئجه گوندوزی هیئتده یاشار
مهدی که سیز قائلیسوز حلقه حکمتده یاشار
اللهین ئوز حکمتیدی پرده غیبتده یاشار
حضرت مهدی دئمیون حیف اولا غربتده یاشار
بیر گونی زهرا گوزلی مسند قدرتده یاشار
ظلم ائده نون گردنینی دست حقیلن اگنم
شیعه گرک صبر ائلیه تا دم وصلت یئتیشه
حکم خدا وعده وئرن لحظه و ساعت یئتیشه
حجت حق کامل اولا حضرت حجت یئتیشه
ابر ذلالت چکیله نور ولایت یئتیشه
روشن ائده یئر یوزونی شمع هدایت یئتیشه
منتقم نسل علی ختم امامت یئتیشه
الده عدالت علمی شاه عدالت یئتیشه
قائم حق قائم اولا آیری قیامت یئتیشه
شیعه با غیرتیلن وقت زیارت یئتیشه
وای او زماندان الیمه مسند قدت یئتیشه
عالمه اثبات ائدرم فاطمه نین اوغلی منم
منه سیزون تک گزورم وصلتیمون لحظه سینی
تا باشیزون اوسته سالام رحمت حق سایه سینی
گلسم عدالت سوزونون عالمه ساللام سسینی
مد نظرده دوتارام ئوز آنامون جلوه سینی
کیم سینه سین یاره لیوب من یارارام سینه سینی
عممه قمچی وورانون داغلیارام پنجه سینی
خیمه لری یاندیرانون یاندیرارام خیمه سینی
هانسی دنی پرپر ائدوب فاطمه نین غنچه سینی
نسلینی یئردن کسرم محو ائدرم ریشه سینی
حضرت حیدر بابامون شاد ائدرم شیعه سینی
امت پیغمبر ایچون مژده رحمت وئرنم
شیعه دیور گوزاشیمیز سیل رواندور آقا گل
بیزلره زندان مثلی دهر و زماندور آقا گل
مهر و محبت سارالوب فصل خزاندور آقا گل
ارض و سما حادثه دن قدی کماندور آقا گل
قاندی که ناحق توکولور یئر یوزی قاندور آقا گل
شیعه نون اطرافی دولی طعنه ووراندور آقا گل
چوخلاری بیلمور که هله قبله هایاندور آقا گل
گل بو یولی ایری گئدن چرخی دایاندور آقا گل
گوزلریمیز یولدا قالوب چوخ نگراندور آقا گل
قدی کمان فاطمه نون قبری نهاندور آقا گل
من گلرم سینه لرن دردینی والله بیلنم
گلسم اگر یئر یوزونی باغ و گلستان ائدرم
یئر یوزی میزاندا دگول من اونی میزان ائدرم
سفره عدل و شرفه عالمی مهمان ائدرم
سیف یداللهیله من قان ائدنه قان ائدرم
شیعیه کیم طعنه ووروب قانینه غلطان ائدرم
شیعه لرین مشکلینی من ئوزوم آسان ائدرم
اوچ یوز اون اوچ یاوریمی دینه نگهبان ائدرم
کشف حجاب ایلیه نی خانه سی ویران ائدرم
شاهلاری تختدن سالارام اصغره قربان ائدرم
فاطمهنون سینه سینون دردینه درمان ائدرم
منتقم آل علی دست جفانی کسنم
- چهارشنبه
- 4
- اردیبهشت
- 1398
- ساعت
- 11:31
- نوشته شده توسط
- ابوالفضل عابدی پور
- شاعر:
-
ابوالفضل عباسی معروفان
ارسال دیدگاه