بیر ظلم و عداوتین نشانی
شخصی غرض و عداوت اوسته
ضربتلدی شاه لافتانی
باش سجده گهِ عبادت اوسته
ئولدوردی علیّ مرتضانی
اجرای حق و عدالت اوسته
حقّ ئولدی بوتون سعادت ئولدی
تنها نه علی عدالت ئولدی
مانندینی میر لافتانین
دوغسون آنالار جهاندا هیهات
شأنینده علیّ مرتضانین
کلیّه عقول واله و مات
گورمز گوزی بیرده بو جهانین
بیر شخص ائله جامع کمالات
افسوس او کنز حکمت ئولدی
صد حیف او شیر صولت ئولدی
بیر ضربتیله یخوب مرادی
محرابه ولیّ ذوالجلالی
بیر ظلم الی کاخ عدل و دادی
ظالم لرین ائتدی پایمالی
سسلندی هواده بیر منادی
ئولدوردیله شیر لایزالی
شیر ئولدی بوتون شجاعت ئولدی
مردانگی و رشادت ئولدی
باش پارچالانوب توکولدی قانی
قانیله بویاندی خاک محراب
باقیدی نقدر دار فانی
سجّاده دی خاک پاک محراب
چاکِ سرِ شاه لافتانی
ساخلوبدی نشانه چاک محراب
افسوس نماز و طاعت ئولدی
زهد و ورع و عبادت ئولدی
ارکان هدایت اولدی ویران
شرع نبوی ستونی یاتدی
تعطیل اولوندی حکم قرآن
شرک اهلی لوای کفر اوجاتدی
باشدان یارالاندی شاه مردان
فضل و شرف آفتابی باتدی
جود و کرم و شهامت ئولدی
ای وای شه ولایت ئولدی
بیر عمر علی ولیّ اعلا
بی حد ستمه تحمّل ائتدی
تا ائتدی شهادتی تمنّا
باشدان یارالاندی کامه یتدی
باش وئرماقی دین یولوندا اما
ارثیه وئروب حسینه گئتدی
حقّیله ائدن قضاوت ئولدی
مظلوم لره حمایت ئولدی
بیر نوریدی بو علی حقیقت
باش پارچالانوبدی سؤندی برقی
اوندان آپاروب حسین وراثت
گون تک آدی دوتدی غرب و شرقی
باش یاره سینه ائدنده دقّت
چوخدور آتانین بالیله فرقی
چکدی بالا چوخ ریاضت ئولدی
باشدا اون ایک جراحت ئولدی
ال ساخلا داخی دایان #حسینی
یازما نجه شمر بی مروّت
ئولدوردی بتوله نور عینی
باش کسماقا ووردی یدّی ضربت
افلاکه اوجاتدی شور شینی
ذرّیۀ خاتم رسالت
زینب دئدی جاه و عزّت ئولدی
محبوب نبیّ رحمت ئولدی
- چهارشنبه
- 8
- خرداد
- 1398
- ساعت
- 14:57
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه