اولمادی بیلمم ندن ویران بو عالم یاعلی
توکدی محراب ایچره قانین ابن ملجم یاعلی
لرزیه دوشدی او ساعتده سماوات و زمین
تاجینی باشدان گوتوردی حضرت روح الامین
سسلنوردی عرشیدن قُتل الامیرالمؤمنین
بو سسیله دولدی اولدم کلّ عالم یاعلی
تا ائشیتدی بو سسی احباب و انصارون سنون
قویدولار یوز مسجده یکسر هوادارون سنون
آلدیلار اطرافووی هر مهربان یارون سنون
آغلادی بو حالته عیسی و آدم یاعلی
جنت ایچره آچدی باشین حضرت خیرالنسا
وای عم اوغلوم وای دیوب هرلحظه ایلردی نوا
گلدی داد و شیونه برپا ائدوب بزم عزا
اولدی همناله اونا سارا و مریم یاعلی
قلب پیغمبر یانوب بو حالته آغلاردی قان
ناله و فریاد و دادیله دولوب باغ جنان
آچدی باش لاهوتیان قان آغلادی قدّوسیان
محفل ماتم اولوبدور عرش اعظم یاعلی
آلموش اطرافون عیالون یاعلی قان آغلوری
زینب و کلثوم ائدوب زلفون پریشان آغلوری
باش آچوب اوغلون حسن هر لحظه هر آن آغلوری
اولدی بو غمدن حسینون قامتی خم یاعلی
بیر یارا باشوندا واردی یاامیر المؤمنین
اهل بیتون حالینی ایلوب پریشان و حزین
گه حسن باشون آلور دیز اوسته گه اوغلون حسین
دودمانون دولدوروبدور محنت و غم یاعلی
#گریز به #قتلگاه
روز عاشورا اولیدون کربلا دشتینده سن
بیر گوریدون اؤز حسینون جان وئرور نه نوعیلن
ایستی قوملار اوسته دوشموشدی او شاه ممتحن
ایله حالتده دیردی اوغلون هردم یاعلی
گه سوسوزلوقدان حسینون یاعلی ایلردی غش
گه گلوردی حاله سویلردی ایا قوم العطش
قتلیمه من بی کسون آخر ندور بو کشمکش
سن اؤزون بو حالته آغلا دمادم یاعلی
ناگهان آیریلدی لشکردن اودم شمر دغا
نه پیمبردن اوتاندی نه ائدوب سندن حیا
ایستدی اول سروری ائتسون ذبیحاً من قفا
باشینی آچدی رسول الله اکرم یاعلی
خیمه لردن چیخدی زینب دیشره باشدا اللری
قتلگاهه یوز قویوب تیترردی اما دیزلری
گلدی فریاده گوروب شمرین الینده خنجری
قارداشین ئولدورمگه اولموش مصمم یاعلی
سویلدی ظالم دایان بیر لحظه آخر وئر امان
سینه سیندن اَن وئره راحت بو قوملار اوسته جان
بیله خوار ئولدورمه آخر بیر پیمبردن اوتان
گوزیاشین توکدی یوزه چون آب زمزم یاعلی
شمر دون وئرموب امان اوغلون او نوعی جان وئره
تشنه لب کسدی باشین قانین توکوب ناحق یره
قاره یللّر اسدی یکسر دگدی عالم بیربیره
گون دوتولدی عالم اولدی اؤزگه عالم یاعلی
«عاصیم»گرچه سنه مولا واریمدور نسبتیم
چوخ امیدیم وار قبول اولسون بو جزئی خدمتیم
لطف قیل ایله کرم دلده قالوبدور حسرتیم
ایسته سن گر قبریوه بو وقفه گلّم یاعلی
- چهارشنبه
- 8
- خرداد
- 1398
- ساعت
- 15:37
- نوشته شده توسط
- ابوالفضل عابدی پور
- شاعر:
-
مرحوم حسن عاصی تبریزی
ارسال دیدگاه