یارادان وقتیده الله تعالی بشری
صنعتینده یتوروب اوج کماله هنری
اذن وئردی بشره تا ائلیه جلوه گری
رتبه ده اشرف اولوبدور بشر خاک نشین
خلقت انگشترینه آدی اولوب نقش نگین
گویلرین اهلی دئیوبلر بوبشر قان ائده جک
یئرده افساد ائلیوب ایولری ویران ائده جک
عملی اولمیاجاق دعوی ایمان ائده جک
مقصدون سجده دی انسانی یاراتماقدا اگر
گویلرین اهلی سنه سجده ائدر شام وسحر
بویوروب یئر گویی خلق ایلین الله کریم
که منم قادرمطلق هامی افعاله علیم
بیرحساب اوسته یارانموش یریلن عرش عظیم
من بیلن نکته نی سیزبیلموسوز حکمتدی بولار
بیلورم خلق ائلین وقتیده آخر نه اولار
دولانوب چرخ زمان مفخر آدم یارانوب
مایه ی زندگی آدم وعالم یارانوب
انبیانون گوزلی حضرت خاتم یارانوب
گوردیلر اهل سما علت خلقت شرفین
بیلدیلر خالق یکتای جهانون هدفین
یارادان حکمتیله قیلدی مخیّر بشری
انتخابیله اولا حق یولونون رهسپری
گوندروب نسل بشردن بشره راهبری
تا که اتمام اولا حجّت، تانینا یائیله سین
صبغة الله اولا انسان تاپا ئوز مرتبه سین
بوهمان مهر رسالتدی تجلّا ائلیوب
مکه نین داغلارینی عشقه مصلّا ائلیوب
سنی قیرخا یتشوب حل معمّا ائلیوب
جانین آلدی الینه وحیی قرائت ائلدی
اللهین دینینه انسانلاری دعوت ائلدی
افتخاریله گرک عرض ائلیم بوردا سوزی
اوکه سروردی بوتون عالم ایجاده ئوزی
یعنی حیدر که درخشان گونه بنزوردی یوزی
کیشی خلقیندن اول شخصیدی ایمان گتوروب
حقین اثباتینه الله اونی برهان گتوروب
او که تا یازدی آدین الده شرف آلدی قلم
علی عالی اعلادی خداوند کرم
عشق آدیلان ووروب اول آدینا گویده علم
او علم دن بیریده واردی خدیجه آدینا
رمضانین اونی گلدی گنه دوشدوم یادینا
بانوی اول عالمدی گوزل شهرتی وار
نه قدر زنده دی تاریخ بشر عزتی وار
آبروداریدی عشق عالمی حیثیتی وار
اهل اسلام بیلور سو زده کی معنانی یقین
گورمیوب گنج نجابت بئله بیر در ثمین
بیرخانمدور که وفا اولدی وجودیله عجین
چوخ تلاش ایلدی رشدایلیه قرآنیله دین
ثروتین بذل ائلیوب اولدی مصیباته قرین
شعب بوطالبه چکدی اونی دنیای دنی
آغلادی حالینه آخرده رسول مدنی
گوزلرین یومدی خدیجه ائدوب عقبایه سفر
آه سوزانیله زهرا سالوب آفاقه شرر
آغلیا آغلیا دین رهبرینه وئردی خبر
گل آتا باغری دونن قانه بواثناده منم
ئوزیوی تئز یتور ای شاه زمن ئولدی ننم
یوللادی الله اوبانوی زمانین کفنین
ئوز عباسیله پیمبر گنه ئورتدی بدنین
قویدی توپراقه تانیتدیردی قرانلوق وطنین
روضه خوان اولدی ئوزی آغلادی مولای جهان
قوشولوب فاطمه ده قیلدی بو ماتمده فغان
بیر گریز ایستورم الان ویرام ای اهل عزا
قوشولوب فاطمه ده ایلیه بو غمده نوا
یادیمه دوشدی گنه واقعه ی کرب وبلا
بس ندن شاه شهیدان یخلان یئرده خدا
بیرعبا اولمادی تا ایستی گونه حایل اولا
خنجر و نیزه یریندن ایلیوب قان فوران
قان گئدوب ایستی ووروب یاره آلوب تاب وتوان
قوریان لبلرینه زحمتیله وئردی تکان
عرض ائدوب شاهد اول ای یار ثناخواندی حسین
دوغرانان پیکریله عشقووه قرباندی حسین
بو حسینوندی سنون دوش نبی ده اوتوروب
خیمه سین عشق آدینا ایستی قوم اوستونده قوروب
رنگ عوض ایلمیوب بیر سوزین اوستونده دوروب
ساتمادیم دلده اولان عشقووی درهم لره من
عشقووین یاره سینی وئرمرم عالملره من
یورولان جاندا سنوندور بو آخان قاندا سنون
یرده کی لاله لریم قانلی گلستاندا سنون
جدیمه بنزر اولان قانینه غلتاندا سنون
من فقط یوللادیقون آیه لرین ناشری ام
درگه مرحمتین بیر الی بوش زائری ام
گوئیا سس گلوب ای عاشق ممتاز حسین
سنکه اولدون منه خاطر غمه دمساز حسین
گورنه وئررم سنه ای شاهد جانباز حسین
روز محشر ده کی حکم ایلرم عالملره من
فرقیمز یوخدی اوگون شیعه لره حکم ائله سن
- یکشنبه
- 2
- تیر
- 1398
- ساعت
- 10:53
- نوشته شده توسط
- ابوالفضل عابدی پور
- شاعر:
-
حاج داود بیدق داری
ارسال دیدگاه