نصف ماه مبارک رمضان
آچیلوب باب رحمت و غفران
ایلیوب لطف قادر منّان
یر یوزین رشک روضۀ رضوان
یثربین توپراقین خدایِ جهان
ایلدی گلستان باغ جنان
اولدی بیر آفتاب تک رخشان
سبط اوّل امام کون و مکان
ایتدی دنیانی سربسر گلشن
نور چشم علی امام حسن
قدرت کردگار یکتادن
ایکی عزّ و شرفلی دریادن
یعنی صلب علیّ اعلادن
صدف پاک بطن زهرادن
صورته گلدی لفظ معنادن
دُرِ توحید کنز طاهادن
حوریان گلدی خلد اعلادن
فیض یاب اولماقا بو مولادن
ایتدی دنیانی سربسر گلشن
نور چشم علی امام حسن
مه یوزی ابروی هلالی حسن
لبِ لعلی، جمالِ آلی حسن
گون کیمی نور بی مثال حسن
جدّی تک سیرت و کمالی حسن
کرم و بخشش و نوالی حسن
هامودان منطق و مقالی حسن
خَلق و خُلقی حسن، خصالی حسن
حَسن اندر حَسن جمالی حَسن
ایتدی دنیانی سربسر گلشن
نور چشم علی امام حسن
شمس عزّت مه سپهر جلال
دُرِ گنجینۀ وقار و کمال
محرم سرّ قادر متعال
حِلمده ختم انبیایه مثال
باغ شیرخدایه تازه نهال
گولماقی جدّینی ایدن خوشحال
یوزه گوزدن توکنده اشک زلال
آناسین ایلین پریشانحال
ایتدی دنیانی سربسر گلشن
نور چشم علی امام حسن
ابر نیسان کفِ سخاوتی دور
قطراتی عِداد مِدحتی دور
عقلی حیران قویان جلالتی دور
جدّینون وارث فصاحتی دور
صولتی حیدرین صلابتی دور
خالقین گنجِ علم و حکمتی دور
شیعه نین وقتِ وجد و عشرتی دور
حسن بن علی ولادتی دور
ایتدی دنیانی سربسر گلشن
نور چشم علی امام حسن
خلقتین شاهکاریدور بو گئجه
گئجه لر افتخاریدور بو گئجه
برطرف دل غباریدور بو گئجه
جلوه گر حق نگاریدور بو گئجه
هامی بیر مِی خماریدور بو گئجه
شب میلاد یاریدور بو گئجه
صلواتین بهاریدور بو گئجه
بو، « #حسینی» شعاریدور بو گئجه
ایتدی دنیانی سربسر گلشن
نور چشم علی امام حسن
- دوشنبه
- 3
- تیر
- 1398
- ساعت
- 9:55
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه