صاحب تیغ دو سر فاتح خیبردی علی
اسداللهدی یداللهدی دلاوردی علی
مرد میدان عمل حیدر صفدردی علی
اونی دریای کرامت یارادیب ربّ جلیل
هل اتی گلدی اونون شأنینه قرآندا دلیل
نه علی که اونون اسرارینه حیراندی فلک
آدینی ذکر ائلیر جن بشر حور و ملک
نه علی ظالمه دشمن ولی مظلومه کمک
او علی قلزم جود و کرم و رحمتدی
قهری آتشدی اونون مهری ولی جنتدی
نه علی که او علی ماخلقه مولادی
رمز لولاک لما سرّ حق یکتادی
مَلَکُ الوَحیین اولوبدی او علی استادی
نه ملک سویلیه بیللم نه خدا و نه بشر
ها علیٌّ بشرٌ کیفَ بشر باب ظفر
او علی که آدینین ذکرینه نازل برکات
متوسل اونا خضر اولدی تاپوب آب حیات
او وئریب نوح نبی اللهه طوفاندا نجات
بطن ماهیدن ائدن یونسی آزاد اودور
فقرانی دل شبده ائلین یاد اودور
او علی که دئیرم شیر حق داوردی
مالک ملک ولایتدی شه محشردی
او علی رخت پیمبرده یاتان حیدردی
نه علی حضرت حیّ الاحدین شیری علی
بیرجه ضربتله بؤلن مرحبی شمشیری علی
او علی که اونی فاتح هامی دنیا تانیور
کعبه مولودونی پیغمبر طاها تانیور
قدرتین بیر اؤزی بیر خالق یکتا تانیور
جنگ خندق ده او گون بیر ائله طوفان سالدی
عَمری اولدوردی ملکلر اونا حیران قالدی
او علی لشگر کفّارین اساسین پوزدی
خیبرین قلعه سینین نقش نماسین پوزدی
جور و ظلم و ستمین یخدی بناسین پوزدی
ائله حکم ائتدی قضاوت اونا مشتاق اولدی
کرسی عدل و عدالت اونا مشتاق اولدی
او علی که دئدی گمره لره آگاه اولون
شرکیدن ال گوتورون طی ائدین الله یولون
باغلیانموبدی اونون اون ایکی مین آتلی قولون
بیلمیرم سرّی ندور قلبین او گون داغلادیلار
نئجه خیبر قوپاران قوللارینی باغلادیلار
او علی که بَیَنوب قادر قهار اونی
یارادیب حقّه طرفدار حق دادار اونی
قولی باغلی آپاریب مسجده اشرار اونی
فوج روبه نه روادور ائلیه شیری اسیر
حقّدن جبریله بیعت آلا باطل تلسیر
بو قضایادن اولوب بنت رسولین خبری
یارالی قوش کیمی سینمیشدی اونون بال و پری
حال محزونیله سسلیردی حق دادگری
عرض ائدیب قیل کمک ای خالق حی ازلی
بیر کسی یوخ یئته امداده کمکسیزدی علی
غصه لی حالدا دوتوب دست حسین وحسنی
مسجده گلدی غرض بنت رسول مدنی
شیر حقی قولی باغلی گوروب آرتدی محنی
غاصبان فدکه ائیله دی بو نوع ندا
شرم ائدین حقدن ای فرقه بی شرم و حیا
نه جسارتله ایاق اوسته بونی ساخلاموسوز
هانسی جرمیله بونون قوللارونی باغلاموسوز
عاق پیغمبر اولوبسوز اورگین داغلاموسوز
آچماساز قوللارونی حقّه شکایت ائدرم
تک بیر آهیله بو مسجدده قیامت ائدرم
من پیمبر قیزیام کنز حیانین گهری
او همایم کی جفا ایله سینوب بال و پری
شعلۀ آهیمین آخر او قدر وار اثری
ایسته سم قصریزی بیر آهیله ویران ائدرم
سیزلره محشرِ کبرانی نمایان ائدرم
گوردی زهرا او منافقلره یوخ جای مقال
صُمٌّ و بُکمٌ عُمیٌ دایانوبلار هامی لال
قبر پیغمبره اؤز دوتدی به اندوه و ملال
آهی آه اوسته چکوب وئردی تکان اللرینه
ایسته دی ال آپارا باشدا قرا معجرینه
مسجدین سقفی تلاطم ائلیبدیر او زمان
دئیه بیللم دیله گلدی هامی ذرّات جهان
هره اؤز فکرینه قالدی هامی اولدی نگران
وحشته دوشدی منافقلر ایتیردی اوزونی
قورخودان لرزه دوتوب چوخلاری یومدی گوزونی
گوردولر فاطمه نفرین ائده طوفان اولاجاق
آه زهرا دوتاجاق عالمی ویران اولاجاق
قاریشیب ارض وسما حشر نمایان اولاجاق
پنجۀ شیر حقّین آچدیلا بند و رسنین
باغرینا باسدی علی جان تک حسین و حسنین
بوردا بیر سوز یادیما دوشدی آلولاندی اورک
کربلا واقعه سین شرح ائلیم ایندی گرک
آه یا فاطمه بیر گونده همین چرخ فلک
فرصتی وئردی بوتون قوم جفاکار الینه
گولی بی خاری گرفتار ائله دی خار الینه
اوندا که آل عبانین اورگین داغلادیلار
زینبین قولّارونی قوم جفا باغلادیلار
بالا قیزلار دولاشوب بیر بیرینه آغلادیلار
ناظریدون اُسرانین او زمان گوز یاشینا
نئجه دوزدون اولارون قمچی دینده باشینا
چالیشار دریادا کشتی نئجه کی طوفاندا
قورخوشوردی بالا قیزلار او سیاق بحراندا
قالدی باشسیز شُهدا نعشی او گون میداندا
قوم کین جبراً آیریدی باجینی قارداشدان
دئیه بیللم اوجالوب ناله گویه داغ داشدان
اُسرانین اورگی قان اوزه گوز یاشی آخیر
یاندیریر باغرینی هجر آتشی شدتله یاخیر
زینب هر لحظه دونور مقتله حسرتله باخیر
دئییر ای یاره لی چاره کسیلیبدیر مندن
آنام اوغلی منی جبراً آییریلار سندن
اُسرانی ائله کی ناقه سوار ایله دیلر
او بلا کشلره آیدین گونی تار ایله دیلر
زینبی مین غم و اندوهه دچار ایله دیلر
توش اولوبدور او یدالله قیزی مین تیر و غمه
شیر زن قوللاری باغلاندی طناب ستمه
حاصل آیریلدی قطار اُسرا دوشدی یولا
زینب حسرتله باخیر گاه ساغا گاه سولا
دود آه اسرادن یئری وار گون دوتولا
او اوزاق یوللاری بیلمم نئجه طی ائیله دیلر
ناقه لر اوسته او یورقون بالالار نئیله دیلر
#گریز #راه_شام
اسرانی ائله کی وارد شام ائیله دیلر
شامین اهلی اولارا گوندوزی شام ائیله دیلر
طعنه قول باغلیلارا خلق عوام ائیله دیلر
گوردولر آل علی نین کسیلیبدیر چاراسی
هره بیر نوع ویروبدور اولارا دیل یاراسی
او شقی لر او زمان بیر بیرینه سویله دیلر
یول وئرین وارد بازار اولا بو خارجی لر
ال چالوب طعنه ویروب گولدوله جشن ائیله دیلر
کیمسه قول باغلی لارین یانمادی گوز یاشلارینا
بام لردن اولارون سپدیله کول باشلارینا
گوردی زهرا قیزی شام اهلی دوشونمور ادبی
نه بیلیرلر قوناغا حرمتی نه رسم و دبی
کیمدی بیلمیرلر اولار زینبین اصل و نسبی
رگلرینده علوی قانی ائدیبدیر هیجان
اوز دوتوب ملت شامه ائله دی بئیله بیان
اولون آگه بیزی ای ملت نادان تانیون
دییلوک خارجی بیز ناب مسلمان تانیون
حق بیزیک نازل اولوب جدیمه قرآن تانیون
نور نورانی ناب حق دادار بیزیک
یولوموز حق یولودی حقه طرفدار بیزیک
خارجی سویله میون بیزلره ای ملت شام
جدیم احمددی آنام فاطمه حیدریدی آتام
آند اولا حقه ائدیب قارراشیم حق اوسته قیام
ایمیوب باش گوروسوز دور زمان زمان اوباشینا
باش اوجالدوب ویریلیب باشی جدانین باشینا
تانیون سیز منی اسپهر حیا اولدوزویام
منم ام النجبا سفره عصمت دوزویام
فاتح خیبر آتام شیر خدانین قیزیام
زینبم شیر زنم گرچه بلا خسته سیم
بو قولی باغلیلارین حامی سر دسته سیم
بیر باخین نیزه لر اوستونده آی اولدوزلارا سیز
اونلارین آردیجا قول باغلی گزن قیزلارا سیز
گولمه ین ناقه ده قارداشسیز اوغولسوزلارا سیز
اونلارون حالینه سیز آغلامیسیز آغلامیون
داغلیدیر قلب لری سیز تزه دن داغلامیون
نجبازاده دی پیغمبره نسبتدی بولار
خسته رنج و غم و درد و مصیبتدی بولار
حرمت ائیلین بولارا لایق حرمتدی بولار
ویرمایون دیل یاراسی قلبیلرین پئیلمین
بوندان آرتیق بولارون باغرینی قان ائیلمین
بونلارون نیسگیلی چوخ صبریمی تالان ائلییر
پوزور احوالیمی بالمره پریشان ائلییر
بو پریشان بالالار باغریمی لاپ قان ائلییر
گئچیرم گه بولارون ساغینا گه سوللارینا
یانیرام بند رسن یاره لیین قوللارینا
منده کی ایستیرم اذن وئرم گوز یاشیما
آغلیام ظلموله اللرده اولن قارداشیما
ساربانلار نه ائدیم قمچی ویریلار باشیما
ساربانه بیری یوخدور دئیه ای کینه سیر
جرمودور قارداشینا آغلاسا بیر باجی مگر
#قنبری نین نقدر سینه ده واردور نفسی
وای حسین وای اولاجاق دیلده نوا زمزمه سی
دنیا وارکن قالاجاق کرب و بلا واقعه سی
اهتزاز ائیلیجک حق علمی یاتمیاجاق
چون حسینین قانی الله قانودور باتمیاجاق
- دوشنبه
- 3
- تیر
- 1398
- ساعت
- 10:14
- نوشته شده توسط
- ابوالفضل عابدی پور
- شاعر:
-
اکبر قنبری تیکمه داش
ارسال دیدگاه