کوفه نین مسجدینه صبحیدی انصار گئدور
محنت اعظمه کیم اولدی خبر دار گئدور
جبرئیلین اوجالوب قُتل العلی فریادی
مرتضانی آپارور منزلینه اولادی
کوچه ده همهمه ، مسجده ولی غوغادی
یئردن افلاکه چخور آه شرر بار گئدور
ساخلیوب کهنه گلیمون هره بیر گوشه لرین
اسدالله ائلیور کوفه ده آخر سفرین
هامی آشفته دی بو جمعیده ، آشفته ترین
کربلا شاهیدی دلتنگ و دل افگار گئدور
طی ائدور کوچه لری اللرین اوستونده علی
ایاق اوستونده دورا بیلمیور اللهین الی
هامی ائیلور عجله گورمگه مولانی ، ولی
بوینی چیگنینده قالوب دالدا ، علمدار گئدور
هامی قورخور بو غم عباسی خروشان ائلیه
صبری آز غیرتی چوخ شهریده طغیان ائلیه
واردی امکان اوزون ال کوفه ده طوفان ائلیه
اودی بیر عده کنار بو سپه دار گئدور
ائله بیر حالدا سالوب کوچه ده باشین اشاقا
تیتریور قامت مردانه سی باشدان ایاقا
ئورگ ایستور گله اما ، گله بیلمور قاباقا
قدم آتدوقجا غضب ائیلیور ، اجبار، گئدور
ازدحامیله دوتوب کوفه لیلر هر گذری
بیربیرینن سوروشوب نقل ائلیوللرخبری
ابن ملجم یاخاسندا حسنین پنجه لری
شیر ائدوب کوچه ده روباهی گرفتار گئدور
ابن ملجم ائله ئوز نیتین ائیلوب ، عملی
غشوه حالینده دی دُردانه ی گنج ازلی
گوزلرین گاهی آچور گاهی یومور،مظلوم علی ...
هئچ یاراشمور بئله کی حیدر کرار، گئدور
ضعف جسمی نفسین سینه ده پنهان ائلیور
پاره پاره دانشور سوزلرین عنوان ائلیور
قان اولان دیل دوداقی عالمی ویران ائلیور
حالدان .. ایستور ائلیه بیر سوزی اظهار... گئدور
دئدی اوغلانلارنا ناله لری کم ائلیون
گئیدیگیم جامه نی اگنیمده منظّم ائلیون
باشما باغلادقوز بندوزی محکم ائلیون
مرتضا زینبینن ائتمگه دیدار گئدور
زینبین طاقتی یوخدور منی محنتده گوره
آناسز قز آتاسن غرق جراحتده گوره
قویمون ائوده منی بیر بله حالتده گور
ائوی غم خانه دی غم خانیه غمخوار گئدور
مرتضا امرینی فوراً حسن اجرا ائله دی
اسداللهی بو دیداره مهیا ائله دی
آغلیا آغلیا عباس تماشا ائله دی
ائله آغلور هامی دنیا گوزونه تار گئدور
یئتیروبلر ائوه مولانی حسینیله حسن
گوردی زینب باباسین ائیله دی اجرایِ محن
بار الها دئدی قالدیم نه یامان گونلره من
قافلم تنگه دوشوب قافله سالار گئدور
بونئجه یاره بو نه باش بو نه قامتدی بابا
بو نه امت نه دیانت نه جهالتدی بابا
سجده اوستونده سنی وُرماق عدالتدی بابا؟
هر بلا گلسه ائدور زینبی آزار گئدور
بابا یارونّن آخان قانوه زینب قربان
بوکولن قامت مردانوه زینب قربان
تک قالوب تک یورولان جانوه زینب قربان
باشووُن قانی ندن چشمیه اوخشار گئدور ؟
کوفه نین اهلی نه بی عاطفه ملتدی بابا
بیر دیین یوخ بورا درگاه امامتدی بابا
گوزون آچ باخ ائوُوَه گور نه قیامتدی بابا
گور نئجه ائوده حسین وحسنون زار گئدور
بابا بیر چاره ائله قان دوتوب عباس گوزون
داریخور قلبی دینمور غضب اوستونده سوزون
بابا آچ گوزلروی قارداشیم ئولدوردی ئوزون
الده شمشیری غضب اوسته علمدار گئدور
زینبین ناله لری عالمی ویران ائله دی
هی توکوب گوز یاشی هی اوخشادی طوفان ائله دی
تا علینین ئوزون آخرده پریشان ائله دی
گوردی مولانین ئوزه گوز یاشی خونبار گئدور
بویوروب صبر ائله، زینب، ائله مه ناله بالا
آغلیوبسان او قدر گوزده وارون هاله بالا
حق منی نایل ائدوب کعبه ی آماله بالا
ائتدی شوقیله علی سجده ده ایثار گئدور
زینبیم یوزدن ائله پرده ی اندوهی کنار
فاطمه منتظریمدی یتیشور یارینه یار
فرصتیم آزدی عزیزیم ایکی گون وقتیم وار
یاره لی یاره قوناق یاره لی یبر یار گئدور
او ایکی گونده علی منزلی خلوت ائله دی
ئورگین دردینی اوچ اوغلونا، صحبت ائله دی
فرصتی هر نقدر اولدی وصیت ائله دی
بو وصیتلری حیدر قویوب آثار گئدور
دئدی اولماز بابازون دردینه عالمده دوا
ائدورم فکر شهادت نه طبابت نه شفا
یوردی دنیا منی کول باشوه اولسون دنیا
بی حیا سندن علی گور نئجه بیزار گئدور
مصلحت اوسته آچانموردی علی باغلی قولون
تار مو قدری ولی اگمه دی دنیاده یولون
ای فلک ای شرف ای عدل هاموز شاهد اولون
علی ارثیه قویوب بیر پارا دستار گئدور
پاره پاره اولان عمامه علامتدی سیزه
گینه تاکید علی عدل و عدالتدی سیزه
کوفه نین بیوه یتیمانی امانتدی سیزه
باغبان قویدی سیزه بیر ساری گلزار گئدور
قویمیون گوللریمی سوز و گداز ایلیه لر
قویمیون ئوزگه لره عرض نیاز ائیلیه لر
چکون ال باشلارینا تا سیزه ناز ائیلیه لر
ناز ایتامه اوکی اولدی خریدار گئدور
آتاسیز کورپه لرین فکرینه هر یئرده قالون
قیزلارون باشلارینا معجر و روبندی سالون
جامه سی گوردوز اگر کهنه دی پیراهن آلون
تاپشیرور بو سوزی حیدر سیزه بسیار گئدور
گئجه لر آه و نوا قالدی سیزه من گئتدیم
کوچه کوچه فقرا قالدی سیزه من گئتدیم
ائو به ائو آب و غذا قالدی سیزه من گئتدیم
ئورگیم دردی دئدی ایندی سبکبار گئدور
بیرده عباسینه شرح ائیله دی بیر مسئله نی
کی حسینین یوزونه گوز یاشی آخدی علنی
آچدی جریان عمر سعدی الی حرمله نی
بیر غمون سیرینه ببر آن، ایکی افکار گئدور
دئدی اوغلوم ئوزوی مظهر حرییت ائله
سنه تاپشیردوم حسینی، سوزومه دقت ائله
نه قدر وار نفسون قارداشوا خدمت ائله
دلبرین خدمتی ،تکلیفیدی ، دلدار گئدور
بالا کم ائیله مه سین سایه سین الله باشووون
بیلورم قدرینی، غیرتلی بالام ،گوز یاشووون
جان سنون کرب و بلا عالمی، جان قارداشووون
گوره جاقسان نئجه مشکلده گرفتار گئدور
سرّ سربسته نی کشف ائتسم اگر علتی وار
منیم اوعلومسان اوغول، سنده علی غیرتی وار
او امان نامه کی بیر عالم اونون محنتی وار
هم سنون هم ده منیم غیرتیمه ، آر ، گئدور
بیر گون ای سرو قدیم، لطمه دگر قوللاروا
الده سو جامی باخاندا ،بالالار، یوللاروا
گوره جاقسان سئخلور کیملر ، اوزون قوللاروا
عشق بازاربنه وقتینده خریدار گئدور
گورورم بیر گون اوغول، گوز قاشوا قان سوزولوب
ائله بیل کی سئنان آئینیه مرجان دوزولوب
اوندا بیل قارداشوون اللری الدن ئوزولوب
هاردا گورسون ،سوآ ، بیر طفل لبن خوار گئدور
اودون اندازه سی ، معلوم اولونار کوزدن اوغول
بیر سوزوم وار دی، یانار سینه ، بو بیر سوزدن اوغول
نهریده اوخ ووراجاقلار من اوپن گوزدن اوغول
اوندا عالم گوزووه تار گلور تار گئدور
مدعی ایستر «امانی» کیمی بیر عاشق اولا
بیلمه دی عشقی گرک سیر ائلین ،لایق اولا
شاعرین شعری گرک نفسی کیمین صادق اولا
صادق اول یوخسا ئوزوندن قاباق اشعار گئدور
- دوشنبه
- 3
- تیر
- 1398
- ساعت
- 10:29
- نوشته شده توسط
- ابوالفضل عابدی پور
- شاعر:
-
علیرضا امانی مجد
ارسال دیدگاه